સ્પોર્ટસ ડેસ્ક. ભારત અને ઓસ્ટ્રેલિયાની વચ્ચે પાંચ મેચની વન-ડે સીરિઝ શનિવારે શરૂ થઇ રહી છે. 30 મેથી ઇંગ્લેન્ડમાં યોજાનારા વર્લ્ડ કપ પહેલાં આ ભારતની છેલ્લી સીરિઝ છે. એવામાં ટીમ ઇન્ડિયા વર્લ્ડ કપ પહેલાં સીરિઝમાં સારું પ્રદર્શન કરીને સારી લય મેળવવા માંગશે. આ સીરિઝ એટલે વધારે મહત્ત્વપૂર્ણ બની જાય છે કારણ કે છેલ્લાં 14 મહિનામાં ભારત અને ઇંગ્લેન્ડની પિચનો નેચર લગભગ સમાન જોવા મળ્યો છે. ભારતમાં જ્યાં 50 ઓવરમાં એક મેચમાં એવરેજ 290 રન બને છે તો ઇંગ્લેન્ડમાં 302 રન. જ્યારે બોલિંગની વાત કરીએ તો ભારતમાં દરેક 39માં બોલ પર જ્યારે ઇંગ્લેન્ડમાં 40માં બોલ પર વિકેટ મળે છે.