Ramayana Review / રણબીર કપૂર-યશની ‘રામાયણ’માં ભવ્ય વિઝ્યુઅલ્સ સાથે દિલને સ્પર્શી જાય તેવી લાગણીઓ

રામાયણ ભારતીયો માટે માત્ર એક ધાર્મિક કથા નથી, પરંતુ લાગણી અને આસ્થાનું પ્રતીક છે. રામાનંદ સાગરની ટીવી રામાયણ અને 1990ના દાયકાની એનિમેટેડ રામાયણે દર્શકોનાં દિલમાં ખાસ સ્થાન બનાવ્યું હતું. બીજી તરફ, તાજેતરમાં આવેલી 'આદિપુરુષ'ના નબળા VFX, સંવાદો અને પાત્રોના ચિત્રણથી દર્શકો નિરાશ થયા હતા. ત્યારે નમિત મલ્હોત્રા અને નિતેશ તિવારીની અંદાજે ₹4,000 કરોડના બજેટવાળી રામાયણ પાસેથી અપેક્ષાઓ ઘણી વધારે હતી.

ફિલ્મની ખાસ વાત એ છે કે તેની શરૂઆત ભગવાન રામથી નહીં, પરંતુ રાવણના વંશ અને તેની તપસ્યાથી થાય છે. બ્રહ્મા અને શિવને પ્રસન્ન કરીને લંકાનો રાજા બનેલો રાવણ અનેક રાજ્યો પર વિજય મેળવે છે અને ધીમે ધીમે અધર્મના માર્ગે આગળ વધે છે. ત્યારબાદ ભગવાન વિષ્ણુ રામ અવતાર ધારણ કરે છે. ગુરુ વિશ્વામિત્ર પાસેથી રામ-લક્ષ્મણનું શિક્ષણ, તાડકા અને સુબાહુનો વધ, સીતાનો સ્વયંવર, કૈકેયીનાં બે વચનો અને રામનો વનવાસ વાર્તાને આગળ વધારે છે.

જટાયુ-રાવણનું ભયંકર યુદ્ધ ફિલ્મનાં મહત્વનાં પ્રસંગો

વનવાસ દરમિયાન શૂર્પણખાની મુલાકાત, લક્ષ્મણ દ્વારા તેનું નાક કાપવું, ખર-દૂષણ અને 14,000 રાક્ષસો સાથેનો સંઘર્ષ, સીતાનું અપહરણ અને જટાયુ-રાવણનું ભયંકર યુદ્ધ ફિલ્મનાં મહત્વનાં પ્રસંગો છે. દિગ્દર્શક નિતેશ તિવારીએ 'દંગલ' અને 'છિછોરે'ની જેમ અહીં પણ લાગણીઓને પ્રાધાન્ય આપ્યું છે. ફિલ્મનો પહેલો ભાગ ખૂબ જ પ્રભાવશાળી છે, જ્યારે બીજો ભાગ થોડો ખેંચાયેલો લાગે છે. અયોધ્યા, મિથિલા, લંકા, દેવલોક અને જંગલોનાં દૃશ્યો ભવ્ય છે. જોકે, કેટલાક રાક્ષસોના VFXમાં ખામી જોવા મળે છે.

ફિલ્મની બીજી મોટી તાકાત હંસ ઝિમર અને એ.આર. રહેમાનનું સંગીત છે. ખાસ કરીને રામના વનવાસનું દૃશ્ય અને તેનું બેકગ્રાઉન્ડ મ્યુઝિક દર્શકોને ભાવુક કરી દે છે.

રણબીર કપૂર રામની સાદગી અને શાંતિ સારી રીતે રજૂ

અભિનયની વાત કરીએ તો રણબીર કપૂર રામની સાદગી અને શાંતિ સારી રીતે રજૂ કરે છે, જોકે અરુણ ગોવિલ સાથે સરખામણીમાં થોડા નબળા લાગે છે. સાઈ પલ્લવી સીતા તરીકે સુંદર લાગે છે, પરંતુ તેમની લાગણીઓ અને રણબીર સાથેની કેમેસ્ટ્રી વધુ અસરકારક બની શકી હોત. રવિ દુબે લક્ષ્મણ અને રકુલ પ્રીત સિંહ શૂર્પણખા તરીકે પ્રભાવિત કરે છે. અરુણ ગોવિલ રાજા દશરથ તરીકે ખાસ લાગે છે. લારા દત્તા, વિવેક ઓબેરોય સહિતના સહાયક કલાકારોનું કામ પણ સારું છે.

આ પણ વાંચો : અમદાવાદમાં 10 વર્ષ બાદ પાર્કિંગ ફી વધારવાની તૈયારી, ટુ-વ્હીલર-કાર પાર્ક કરવા માટે હવે કેટલો ચાર્જ ચૂકવવો પડશે?

પરંતુ ફિલ્મમાં સૌથી વધુ ધ્યાન ખેંચે છે યશનો રાવણ અવતાર. તેમની દમદાર સ્ક્રીન પ્રેઝન્સ, અહંકાર અને અભિનય પાત્રને યાદગાર બનાવે છે. એકંદરે, VFXની કેટલીક ખામીઓ છતાં ભવ્ય દૃશ્યો, શાનદાર સંગીત અને લાગણીઓ માટે આ ફિલ્મને એક તક આપી શકાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ