- કેન્દ્રીય મંત્રી પીયૂષ ગોયલે રાહુલ ગાંધીનો એક વીડિયો શેર કર્યો
- રાહુલ ગાંધીના નિવેદનની ટૂંકી ક્લિપની કરી ટ્વીટ
- રાહુલ જીની ભવિષ્યવાણી સાચી સાબિત થઈ: પીયૂષ ગોયલે
ચાર રાજ્યોમાં યોજાયેલી વિધાનસભા ચૂંટણીના પરિણામો સામે આવી રહ્યા છે. આ ચારમાંથી ભાજપને 3 રાજ્યોમાં જીત મળે તેવું વર્તમાનમાં લાગી રહ્યું છે, જ્યારે કોંગ્રેસ માત્ર તેલંગાણામાં જ જીત મેળવે તેવું લાગી રહ્યું છે. આ ત્રણ રાજ્યમાં જીત જોઈને ભાજપના નેતાઓ સતત કોંગ્રેસ પર નિશાન સાધી રહ્યા છે. બીજેપી નેતા અને કેન્દ્રીય મંત્રી પીયૂષ ગોયલે રાહુલ ગાંધીનું એક જૂનું નિવેદન શેર કર્યું છે. જેમાં તેમણે ભૂલથી તેમની પાર્ટીની સરકાર જવાની વાત કરી હતી.
વીડિયો શેર કર્યો
એક મહિના પહેલા કોંગ્રેસ નેતા રાહુલ ગાંધીએ પ્રેસ કોન્ફરન્સ કરી હતી. રાહુલ ગાંધીએ ભૂલથી કહ્યું હતું કે, રાજસ્થાન અને છત્તીસગઢમાં પણ સરકાર જઈ રહી છે. જોકે થોડા સમય પછી રાહુલને સમજાયું કે, તેમની સરકાર હજુ પણ આ બે રાજ્યોમાં સત્તામાં છે અને તેમણે એમ કહીને પોતાની ભૂલ સુધારી લીધી કે રાજસ્થાન અને છત્તીસગઢમાં સરકાર આવી રહી છે અને તેમની સરકાર મધ્યપ્રદેશમાં છે. પરંતુ રાહુલના નિવેદનની ટૂંકી ક્લિપ વાયરલ થઈ ગઈ હતી.
'રાહુલ જીની ભવિષ્યવાણી સાચી સાબિત થઈ'
જ્યારે પરિણામો લગભગ સ્પષ્ટ જણાવવા લાગ્યા હતા ત્યારે ભાજપના નેતા પીયૂષ ગોયલે રાહુલ ગાંધીના જૂના નિવેદનની અડધી ક્લિપ અપલોડ કરીને રાહુલની ઝાટકણી કાઢી હતી. કોંગ્રેસ નેતાનું નિવેદન શેર કરતા તેમણે લખ્યું કે રાહુલ જીની ભવિષ્યવાણી સાચી સાબિત થઈ. કોંગ્રેસ ચૂંટણીમાં હારી રહી છે.
