પીએમ કિસાન યોજનાનો લાભ લઇ રહેલા ખેડૂતો માટે રાહતના સમાચાર સામે આવ્યાં છે. કેન્દ્ર સરકારે e-KYCની તારીખ લંબાવીને 22 મે, 2022 કરી દીધી છે.
11માં હપ્તાની રાહ જોઈ રહેલા ખેડૂતો માટે સારા સમાચાર
e-KYC પ્રક્રિયા પૂર્ણ કરવાની તારીખ લંબાવીને 22 મે, 2022 કરાઇ
આ યોજના હેઠળ લગભગ 12.53 કરોડ ખેડૂતો રજિસ્ટર્ડ છે
પીએમ કિસાન યોજનાના 11માં હપ્તાની રાહ જોઈ રહેલા ખેડૂતો માટે સારા સમાચાર સામે આવ્યાં છે. એટલે કે, જો તમે આ યોજનાનો લાભ સતત મેળવવા માંગતા હોવ તો પહેલાં ઝડપથી e-KYC પ્રક્રિયાને પૂર્ણ કરી લો. કારણ કે મોદી સરકારે ખેડૂતોને રાહત આપતા e-KYC પ્રક્રિયા પૂર્ણ કરવાની છેલ્લી તારીખ લંબાવીને 22 મે, 2022 કરી દીધી છે જે પહેલાં 31 માર્ચ 2022 રખાઇ હતી.
પીએમ કિસાન પોર્ટલ પર અપડેટ કરેલી માહિતી પર નજર કરશો તો ખેડૂતો હવેથી આ પ્રક્રિયા 22 મે, 2022 સુધીમાં પૂર્ણ કરી શકશે. તમને જણાવી દઈએ કે, આ પહેલાં છેલ્લી તારીખ 31 માર્ચ 2022 રખાઇ હતી. જણાવી દઇએ કે, પીએમ કિસાન સન્માન નિધિ યોજના હેઠળ લગભગ 12.53 કરોડ ખેડૂતો રજિસ્ટર્ડ છે. જો તમે ઇ-કેવાયસી (E-KYC) નથી કરાવ્યું તો તમારો આગામી હપ્તો અટકી શકે છે. આથી આજે તમને e-KYC ની પ્રક્રિયા વિશે વિગતવાર જણાવીશું.
જાણી લો e-KYCની સરળ રીત
સૌ પ્રથમ, તમે તમારા મોબાઇલ ફોનનાં બ્રાઉઝર જેવાં કે Chrome નાં આઇકોન પર ક્લિક કરો અને ત્યાં pmkisan.gov.in ટાઇપ કરવાનું શરૂ કરો.
હવે તમે PM કિસાન પોર્ટલનું હોમ પેજ ઓપન કરો, બાદમાં તેની નીચે જાઓ કે જ્યાં તમને e-KYC લખેલું દેખાશે.
હવે તેની પર ક્લિક કરો અને તમારો આધાર તમે નંબર એન્ટર કરો અને પછી સર્ચ બટન પર ક્લિક કરો.
હવે તેમાં આધાર સાથે લિંક કરેલો મોબાઈલ નંબર એન્ટર કરો. ત્યાર બાદ તમારા મોબાઈલ નંબર પર 4 અંકનો OTP આવશે કે જેને આપેલા ખાલી બોક્સમાં લખી નાખો.
ત્યાર બાદ તમને એકવાર ફરી આધાર ઓથેન્ટિકેશન માટે બટનને ક્લિક કરવાનું કહેવામાં આવશે. ત્યાર બાદ 6 અંકોનો વધુ એક OTP તમારા આધાર સાથેના લિંક મોબાઇલ નંબર પર આવશે. હવે તેને ભરીને સબમિટ કરી દો.
જો બધું બરાબર કર્યું હશે તો e-KYC પૂર્ણ થઇ જશે નહીં તો તમને Invalid લખેલું દેખાશે. જો આવું થયું તો તમારા આગામી હપ્તા અટકી શકે છે. આથી, તમે આધાર સેવા કેન્દ્ર પર જાઓ અને તેમાં સુધારો કરી લો.
જો તમારું e-KYC પહેલેથી જ પૂર્ણ થઈ ગયું હોય તો eKYC is already done નો મેસેજ દેખાશે.
જાણો ક્યારે આવી શકે છે 11મો હપ્તો
પીએમ કિસાન યોજના હેઠળ, દરેક નાણાકીય વર્ષમાં મોદી સરકાર ખેડૂતોને 6000 રૂપિયા આપે છે, જે 2000-2000ના ત્રણ હપ્તામાં તેમના એકાઉન્ટમાં મોકલવામાં આવે છે. આ અંતર્ગત દર વર્ષનો પ્રથમ હપ્તો 1 એપ્રિલથી 31 જુલાઈ સુધીમાં આવી જાય છે. આ સાથે બીજો હપ્તો 1 ઓગસ્ટથી 30 નવેમ્બર સુધીમાં તો ત્રીજો હપ્તો 1 ડિસેમ્બરથી 31 માર્ચ સુધીમાં ખેડૂતોના ખાતામાં મોકલવામાં આવે છે.