અછત / દૂધની માંગ વધતા શહેરમાં ખોરવાઈ વિતરણ વ્યવસ્થા, મિલ્ક સેન્ટર પર પડાપડી

તહેવારોની સિઝનમાં દૂધ અને દૂધની બનાવટની માગ વધતાં અમદાવાદ શહેરમાં દૂધ વિતરણ વ્યવસ્થા ખોરવાઈ છે. શહેરના પૂર્વ અને પશ્ચિમ વિસ્તારના અનેક દૂધ કેન્દ્ર અને પાર્લરમાં સવારના સમયે પૂરતો જથ્થો ન પહોંચતાં ગ્રાહકોને મુશ્કેલીનો સામનો કરવો પડ્યો હતો. દૂધ મેળવવા માટે અનેક કેન્દ્ર પર લાંબી કતાર જોવા મળી હતી, જ્યારે કેટલાક વિસ્તારમાં ગ્રાહકને દૂધ વિના પરત ફરવાની ફરજ પડી હતી.

તહેવાર દરમિયાન મીઠાઈ અને ફરસાણની બનાવટમાં દૂધનો વપરાશ વધ્યો છે. ઘરેલુ વપરાશમાં પણ વધારો થતાં દૂધની માગ સામાન્ય દિવસની સરખામણીએ વધી છે. તેની સામે વિતરણ વ્યવસ્થા સમયસર જથ્થો પહોંચાડી શકી ન હોવાથી છૂટક બજારમાં દૂધની ખેંચ ઊભી થઈ હતી. દૂધની અછત હોવાની અફવાને પગલે કેટલાક ગ્રાહકે જરૂરિયાત કરતાં વધુ દૂધ ખરીદવાનો પ્રયાસ કરતાં કેન્દ્રો પર ભીડ વધી હતી.

દૂધની અછત અંગે ઊભી થયેલી સ્થિતિ વચ્ચે ડેરી સંચાલકોએ સ્પષ્ટતા કરી છે કે દૂધનાં ઉત્પાદન કે ઉપલબ્ધ જથ્થામાં કોઈ અછત નથી. તહેવારોને કારણે માગમાં અચાનક વધારો થયો છે, જ્યારે ટ્રાન્સપોર્ટેશન અને વિતરણ વ્યવસ્થામાં ટેકનિકલ વિક્ષેપને કારણે દૂધ સમયસર પાર્લરો સુધી પહોંચાડી શકાયું નથી.

આ પણ વાંચોઃ આ દિવાળીએ નોંધાયા ઈમરજન્સીના સૌથી વધુ કેસ, કૉલમાં 25 % નો ઉછાળો

ડેરી તંત્ર દ્વારા વિતરણ વ્યવસ્થા સુધારવા માટે કામગીરી હાથ ધરવામાં આવી છે. આગામી ૪૮ કલાકમાં શહેરભરમાં દૂધનો પુરવઠો સામાન્ય થઈ જશે તેવી ખાતરી પણ આપવામાં આવી છે. સાથે જ નાગરિકોને અછતની અફવાઓથી ગભરાઈને જરૂરિયાત કરતાં વધુ દૂધની ખરીદી ન કરવા અપીલ કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ