રાજકોટ / સરાઝા હોટલ દારૂ પાર્ટી કેસ: પૂછપરછ બાદ પોલીસની ઢીલી નીતિ હોય તેમ હજુ સુધી કોઈ કાર્યવાહી નહીં

રાજકોટ: રાજકોટની સરાઝા હોટલમાં યોજાયેલી હાઈપ્રોફાઈલ દારૂપાર્ટીના કેસમાં પોલીસની તપાસની દિશા અને કામગીરી સામે સવાલો ઊભા થયા છે. દારૂપાર્ટી મામલે ફરિયાદ નોંધાયા બાદ પોલીસે આયોજક સહિત સંડોવાયેલા લોકોની પૂછપરછ તો કરી છે, પરંતુ દારૂ ક્યાંથી ખરીદવામાં આવ્યો હતો તે અંગે હજુ સુધી સ્પષ્ટ માહિતી સામે આવી નથી.

મળતી વિગતો મુજબ, દારૂપાર્ટી દરમિયાન મળી આવેલી દારૂની બોટલો વાઈન શોપમાંથી ખરીદવામાં આવી હોવાનું સામે આવ્યું છે. જોકે, આ બોટલો રાજકોટની કઈ વાઈન શોપમાંથી ખરીદવામાં આવી હતી અને દારૂનું વેચાણ કોના દ્વારા કરવામાં આવ્યું હતું તે દિશામાં તપાસનું પરિણામ હજુ જાહેર થયું નથી.

બીજી તરફ, આ દારૂપાર્ટીનું આયોજન સરાઝા હોટલમાં કરવામાં આવ્યું હોવા છતાં હોટલના સંચાલકો સામે કોઈ કાર્યવાહી કરવામાં આવી ન હોવાનો મુદ્દો પણ ચર્ચામાં છે. હોટલમાં દારૂપાર્ટી યોજાઈ હોવા છતાં જવાબદારો સામે કાર્યવાહી કેમ કરવામાં આવી નથી તેવા સવાલો ઊઠી રહ્યા છે.

પોલીસે પાર્ટીના આયોજક સહિત અન્ય વ્યક્તિઓની પૂછપરછ કરી છે, પરંતુ દારૂના સ્ત્રોતથી લઈને હોટલની જવાબદારી સુધીના અનેક મુદ્દાઓ હજુ સ્પષ્ટ થવાના બાકી છે. હવે જોવાનું એ રહેશે કે પોલીસ તપાસમાં દારૂ સપ્લાય કરનાર વાઈન શોપ સુધી પહોંચવામાં આવે છે કે કેમ અને સરાઝા હોટલના સંચાલકો સામે કોઈ કાયદેસરની કાર્યવાહી કરવામાં આવે છે કે કેમ.

Rajkot Liquor Party : રાજકોટના કાલાવડ રોડ પર આવેલી જાણીતી સરાઝા હોટલમાં બર્થડે પાર્ટીની આડમાં દારૂની મહેફિલ યોજાઈ હોવાના દાવા બાદ શહેરમાં ચર્ચા જાગી છે. સોશિયલ મીડિયા પર પાર્ટીનો કથિત વીડિયો વાયરલ થયા બાદ રાજકોટ LCB ઝોન-2ની ટીમે હોટલમાં દરોડો પાડી તપાસ હાથ ધરી હતી. પ્રાથમિક વિગતો મુજબ દિવાળી પહેલાં ચિરાગ પટેલના જન્મદિવસ નિમિત્તે યોજાયેલી આ પાર્ટીમાં 33 મહિલાઓ અને 43 પુરુષો સહિત કુલ 76 લોકો હાજર હોવાનું જાણવા મળ્યું છે.

50થી વધુ ઉદ્યોગપતિઓ હાજર હોવાની ચર્ચા

આ પાર્ટીમાં રાજકોટ અને મોરબીના 50થી વધુ નામાંકિત ઉદ્યોગપતિઓ તથા મોટા વેપારીઓ હાજર હોવાની ચર્ચા છે. આ ઉપરાંત, પાર્ટીનું જોડાણ જાણીતા ડેકોરા ગ્રુપ સાથે હોવાનો દાવો પણ સામે આવ્યો છે. જોકે, આ વિગતોની સત્તાવાર પુષ્ટિ થવાની બાકી છે. હોટલના પાર્કિંગમાં મોંઘીદાટ લક્ઝરી કારનો જમાવડો પણ ચર્ચાનો વિષય બન્યો છે.

દરોડા દરમિયાન અફરાતફરીના દ્રશ્યો

પોલીસની ઓચિંતી કાર્યવાહી દરમિયાન હોટલમાં અફરાતફરીનો માહોલ સર્જાયો હોવાના અહેવાલ છે. કેટલાક દ્રશ્યોમાં મહિલાઓ કેમેરાથી બચવા ખુરશીના કવર વડે ચહેરો છુપાવતી જોવા મળી હોવાનો દાવો કરવામાં આવ્યો છે. દરોડા દરમિયાન હોટલની વીજળી અચાનક બંધ થઈ હોવાની વાત પણ સામે આવી છે. જનરેટરની સુવિધા હોવા છતાં લાઇટ કેમ બંધ થઈ તે અંગે સવાલો ઊઠ્યા છે.

આ પણ વાંચો : ગુજરાતમાં માવઠાનો માર યથાવત્, સૌરાષ્ટ્રમાં ભારે વરસાદનું યલો એલર્ટ, 21 તાલુકામાં કમોસમી વરસાદથી ખેડૂતો મુશ્કેલીમાં

પોલીસ તપાસ પર સૌની નજર

હાલ આ મામલે પોલીસ દ્વારા તપાસ હાથ ધરવામાં આવી છે. પાર્ટીનું આયોજન કોણે કર્યું હતું, દારૂ ક્યાંથી લાવવામાં આવ્યો હતો અને તેમાં કોણ-કોણ સામેલ હતું તે તપાસનો વિષય છે. 50થી વધુ ઉદ્યોગપતિઓની હાજરી અને ડેકોરા ગ્રુપ સાથેના કથિત જોડાણ અંગે પણ સત્તાવાર પુષ્ટિ સામે આવી નથી. પોલીસ તરફથી તમામ વિગતોની પુષ્ટિ થયા બાદ જ સમગ્ર ઘટનાની સ્પષ્ટતા થઈ શકશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ