મોંઘવારીનો માર / અમૂલ બાદ હવે બરોડા ડેરીએ વધાર્યા દૂધના ભાવ, જાણો લીટરે કેટલાનો વધારો ઝીંકાયો?

વડોદરા: ગુજરાતમાં દૂધના ભાવમાં વધારાનો સિલસિલો યથાવત જોવા મળી રહ્યો છે. અમૂલ ડેરી બાદ હવે બરોડા ડેરી દ્વારા પણ દૂધના ભાવમાં વધારો કરવામાં આવ્યો છે. 13 નવેમ્બરથી અમલી બનેલા નવા ભાવ મુજબ દૂધના ભાવમાં પ્રતિ લિટર રૂ. 4 સુધીનો વધારો કરવામાં આવ્યો છે.

નવા ભાવ મુજબ અમૂલ ગોલ્ડ દૂધના 500 મિલી પાઉચનો ભાવ કેટલો થયો

નવા ભાવ મુજબ અમૂલ ગોલ્ડ દૂધના 500 મિલી પાઉચની કિંમત રૂ. 35થી વધારીને રૂ. 37 કરવામાં આવી છે. જ્યારે અમૂલ શક્તિ દૂધના 500 મિલી પાઉચનો ભાવ રૂ. 32થી વધારીને રૂ. 34 કરવામાં આવ્યો છે.

દૂધ ઉત્પાદકોના દૂધ ખરીદ ભાવમાં પ્રતિ કિલોફેટે વધારો કરાયો.

બીજી તરફ, દૂધ ઉત્પાદકોને પણ રાહત આપતા બરોડા ડેરી દ્વારા દૂધની ખરીદીના ભાવમાં પ્રતિ કિલો ફેટે રૂ. 30નો વધારો કરવામાં આવ્યો છે.

ગ્રાહકોના ઘરખર્ચ પર જોવા મળી શકે

ડેરી દ્વારા કરવામાં આવેલા આ ભાવ વધારાની અસર હવે ગ્રાહકોના ઘરખર્ચ પર જોવા મળી શકે છે. એક તરફ દૂધ ઉત્પાદકોને વધુ ભાવ મળશે, તો બીજી તરફ સામાન્ય ગ્રાહકોએ દૂધ ખરીદવા માટે વધુ નાણાં ચૂકવવા પડશે.

બે દિવસ પહેલા ગુજરાતની જાણીતી દૂધ બ્રાન્ડ અમૂલે ગોલ્ડ અને તાજા દૂધના ભાવમાં વધારો કરવાનો નિર્ણય લીધો છે. 12 નવેમ્બરથી અમલી થનારા નવા ભાવ મુજબ હવે ગ્રાહકોએ અમૂલ ગોલ્ડ અને અમૂલ તાજા દૂધ માટે વધુ રૂપિયા ચૂકવવા પડશે. જોકે, રાહતની વાત એ છે કે ગોલ્ડ અને તાજા સિવાયની અમૂલની અન્ય પ્રોડક્ટના ભાવમાં કોઈ વધારો કરવામાં આવ્યો નથી.

બીજી વખત અમૂલ દૂધના ભાવમાં વધારો કરવામાં આવ્યો

ગુજરાત કો-ઓપરેટિવ મિલ્ક માર્કેટિંગ ફેડરેશન (GCMMF) દ્વારા છ મહિનામાં બીજી વખત અમૂલ દૂધના ભાવમાં વધારો કરવામાં આવ્યો છે. આ પહેલાં મે 2026માં દૂધના ભાવમાં વધારો કરવામાં આવ્યો હતો. હવે ફરી એકવાર ગોલ્ડ અને તાજા દૂધના ભાવ વધારવાનો નિર્ણય લેવામાં આવ્યો છે. અમૂલ ગોલ્ડના ભાવમાં પ્રતિ લિટર 4 રૂપિયાનો વધારો કરવામાં આવ્યો છે, જ્યારે અમૂલ તાજાના ભાવમાં પ્રતિ લિટર 2 રૂપિયાનો વધારો કરાયો છે. નવા ભાવ 12 નવેમ્બરથી જ લાગુ થઈ જશે.

નવા ભાવ પ્રમાણે

નવા ભાવ પ્રમાણે અમૂલ ગોલ્ડના અડધા લિટરના પાઉચ માટે અગાઉ 35 રૂપિયા ચૂકવવા પડતા હતા, જે હવે વધીને 37 રૂપિયા થઈ ગયા છે. એટલે કે ગ્રાહકોએ અડધા લિટરના પાઉચ પર 2 રૂપિયા વધુ ચૂકવવા પડશે. બીજી તરફ, અમૂલ તાજાના અડધા લિટરના પાઉચની કિંમત 29 રૂપિયાથી વધારીને 30 રૂપિયા કરવામાં આવી છે. જ્યારે એક લિટર અમૂલ તાજાના પાઉચની કિંમત 57 રૂપિયાથી વધારીને 59 રૂપિયા કરવામાં આવી છે.

ગાયના દૂધના 500 મિલી પાઉચની કિંમત 30 રૂપિયા

અન્ય વેરિઅન્ટની વાત કરીએ તો ગાયના દૂધના 500 મિલી પાઉચની કિંમત 30 રૂપિયા જ રાખવામાં આવી છે. ભેંસના દૂધના 500 મિલી પાઉચની કિંમત પણ 39 રૂપિયા યથાવત્ રહેશે. અમૂલ શક્તિના 500 મિલી અને ટી સ્પેશિયલના એક લિટરના ભાવમાં પણ કોઈ વધારો દર્શાવવામાં આવ્યો નથી. આમ, ભાવવધારો માત્ર અમૂલ ગોલ્ડ અને અમૂલ તાજા પૂરતો મર્યાદિત રાખવામાં આવ્યો છે.

મુખ્ય કંપની GCMMFના જણાવ્યા અનુસાર

અમૂલ બ્રાન્ડની મુખ્ય કંપની GCMMFના જણાવ્યા અનુસાર, દૂધના ઉત્પાદન અને પ્રોસેસિંગના ખર્ચમાં ઝડપથી વધારો થવાને કારણે ભાવવધારાનો નિર્ણય લેવાયો છે. આ વર્ષે લીલા અને સૂકા ચારાના ભાવમાં વધારો થયો છે. આ ઉપરાંત પશુઆહારમાં ઉપયોગમાં લેવાતા ખોળ, મકાઈ અને ગોળની રસી એટલે કે શીરાના ભાવ પણ વધ્યા છે. દૂધના પેકેજિંગમાં વપરાતી ફિલ્મ અને ઉત્પાદન પ્રક્રિયામાં જરૂરી બળતણ પણ મોંઘું થયું છે. આ તમામ કારણોને પગલે દૂધના ઉત્પાદન પાછળનો ખર્ચ વધ્યો છે.

વરસાદની અનિયમિતતાની અસર

કંપનીએ વધુમાં જણાવ્યું છે કે ગુજરાત સહિત દેશના અનેક વિસ્તારોમાં ઓછો અને અનિયમિત વરસાદ પડવાને કારણે પરિસ્થિતિ પડકારજનક બની છે. વરસાદની અનિયમિતતાની અસર પશુઓ માટેના ચારા અને દૂધ ઉત્પાદન પર પડી રહી છે. આવી સ્થિતિમાં દૂધ ઉત્પાદકોને યોગ્ય ભાવ મળી રહે અને મુશ્કેલ સમયમાં તેમને આર્થિક સહાય મળી રહે તે માટે ગ્રાહકો માટે દૂધના ભાવમાં વધારો કરવો જરૂરી બન્યો હતો. કંપનીના જણાવ્યા અનુસાર, આ નિર્ણયનો હેતુ દૂધ ઉત્પાદકોને યોગ્ય વળતર આપવાનો છે.

અલગ અલગ વેરિઅન્ટ્સમાં ફેટનું પ્રમાણ પણ અલગ હોય

દરમિયાન, દૂધના અલગ અલગ વેરિઅન્ટ્સમાં ફેટનું પ્રમાણ પણ અલગ હોય છે. ફુલ ક્રીમ મિલ્કમાં ફેટનું પ્રમાણ સૌથી વધુ હોય છે અને તેમાં ઓછામાં ઓછું 6 ટકા ફેટ હોય છે. આ દૂધ વધુ ઘટ્ટ અને પોષણથી ભરપૂર માનવામાં આવે છે. ટોન્ડ મિલ્ક હોલ મિલ્ક એટલે કે ફુલ ક્રીમ દૂધમાં સ્કિમ્ડ મિલ્ક અને પાણી ઉમેરીને તૈયાર કરવામાં આવે છે. આ પ્રક્રિયાથી તેમાં ફેટનું પ્રમાણ ઘટાડીને લગભગ 3 ટકા સુધી લાવવામાં આવે છે.

આ પણ વાંચોઃ વિસાવદરના સુખપુરમાં યોજાશે 25 હજાર પાટીદારોનું સંમેલન, લેઉવા પટેલ સમાજનો હુંકાર

ડબલ ટોન્ડ મિલ્કમાં ફેટનું પ્રમાણ વધુ ઘટાડીને લગભગ 1.5 ટકા કરવામાં આવે છે. ઓછી કેલરીવાળો આહાર પસંદ કરનારા લોકો માટે આ દૂધ યોગ્ય માનવામાં આવે છે. જ્યારે બલ્ક ટોન્ડ મિલ્કની વાત કરીએ તો તે મધર ડેરીના વેન્ડિંગ બૂથ પર પાઉચ વગર સીધું વેચવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ