પાકિસ્તાન / બોમ્બ ધડાકાથી ધણધણી ઉઠ્યું પાકિસ્તાન, આત્મઘાતી હુમલામાં 14 લોકોનાં મોત

પાકિસ્તાનના સ્વાતમાં સ્યુસાઇડ અટેક થયો છે. જેમાં રવિવારે સ્વાતમાં કાબલ પોલીસ સ્ટેશનના ગેટ બહાર થયેલા આત્મઘાતી હુમલામાં ઓછામાં ઓછા 7 લોકોના મોત થયા છે અને 18 ઘાયલ થયા છે. સ્વાતના જિલ્લા પોલીસ અધિકારી મુજબ આત્મઘાતી હુમલાખોરે ત્યારે વિસ્ફોટકમાં ધમાકો કર્યો જ્યારે પોલીસકર્મીઓએ તેને પોલીસ સ્ટેશનના પ્રવેશદ્વાર પર રોકવાનો અને તપાસ કરવાનો પ્રયાસ કર્યો હતો.

પાકિસ્તાની મીડિયા અનુસાર પોલીસે આ અંગે કહ્યું કે, “આ અટેકમાં શરૂઆતમાં સાત લોકોના મોત થયા અને 18 અન્ય ઘાયલ થયા. અમારી પોલીસ હાઈ અલર્ટ પર છે અને કોઈપણ અણધારી પરિસ્થિતિનો સામનો કરવા માટે સંપૂર્ણ તૈયાર છે. જેમાં સુરક્ષા દળોએ વિસ્તારની ઘેરાબંધી કરી દીધી છે અને વધુ પુરાવા ભેગા કરવા માટે તપાસ ચાલુ છે.”

આ ધમાકો ત્યારે થયો જ્યારે સ્વાત ઘાટીમાં તાજેતરમાં વધેલી આતંકવાદી હિંસા વિરુદ્ધ કાબલ ચોક પર લોકોનું એક મોટું વિરોધ પ્રદર્શન ચાલી રહ્યું હતું. આ જોરદાર ધમાકામાં અનેક લોકો હતાહત થયા હતા ત્યારબાદ પોલીસ, રેસ્ક્યુ ટીમ અને સ્થાનિક અધિકારીઓએ તરત જ ઈમરજન્સી કાર્યવાહી શરૂ કરી હતી.

ઉલ્લેખનીય છે કે, સ્વાત અમન જિર્ગા (સ્થાનિક આદિવાસી પરિષદ)એ સ્વાતમાં શાંતિ રેલીનું આયોજન કર્યું હતું. તેમાં ભાગ લેનારાઓએ નારા લગાવ્યા અને પ્લેકાર્ડ ઉપાડ્યા હતા જેમાં આ વિસ્તારમાં શાંતિની માંગ કરાઈ રહી હતી, જ્યાં છેલ્લા ઘણા મહિનાઓમાં સુરક્ષાની સ્થિતિ બગડી છે.

વધુ વાંચો : ઇન્ડોનેશિયામાં મધદરિયે ફેરીમાં લાગી આગ, 5નાં મોત, 41 લોકો લાપતા

આ હુમલામાં ઘાયલ થયેલા લોકોને સારવાર માટે નજીકના સૈદુ શરીફ ટીચિંગ હોસ્પિટલ લઈ જવામાં આવ્યા હતા. સાથે સુરક્ષા કર્મીઓએ વિસ્તારની ઘેરાબંધી કરીને સર્ચ ઓપરેશન શરૂ કર્યું છે. અધિકારીઓ હુમલા સાથે જોડાયેલી પરિસ્થિતિઓની તપાસ કરી રહ્યા છે. સેનાના જવાનો પણ મોકાના સ્થાને આવ્યા હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ