રાહત / મોંઘવારીથી ત્રસ્ત જનતા માટે રાહતના સમાચાર, પેટ્રોલ-ડીઝલ થઇ શકે છે સસ્તુ, OPEC દેશોએ લીધો આ નિર્ણય

• પેટ્રોલ અને ડીઝલ થઇ શકે છે સસ્તું
• ઓપેક દેશો ક્રૂડનું ઉત્પાદન વધારવાનો કર્યો નિર્ણય
• ઉત્પાદન વધતાં ક્રૂડ ઓઇલની કિંમતો ઘટશે

પેટ્રોલ ડીઝલના ભાવમાં ભલે એક રૂપિયો પણ કેમ ઓછો ન થાય, સામાન્ય માનવની રાહતની લાગણી અનુભવાય છે. કારણ કે પેટ્રોલ ડીઝલના ભાવો વધતા એક પણ ચીજવસ્તુ બાકી નથી જેના ભાવ આસમાને પહોંચ્યા ન હોય. શાકભાજી, તેલ , કઠોળ , દૂધ ઉત્પાદનની વસ્તુઓ સહિત તમામના ભાવમાં વધારો નોંધાયો છે ત્યારે હવે જનતાને મોંઘવારીથી થોડી રાહત મળી શકે છે.

ક્રૂડ ઓઇલના ઉત્પાદનમાં કરાશે વધારો

ઓપેક, રશિયા અને અન્ય સહયોગી દેશો ક્રૂડ ઓઈલનું ઉત્પાદન વધારીને 6.48 લાખ બેરલ પ્રતિ દિવસ કરવા માટે સહમત થયા છે.રશિયા સહિત સહયોગી દેશો જુલાઇ અને ઓગસ્ટમાં ક્રૂડનું ઉત્પાદન વધારશે. આ નિર્ણયથી સમગ્ર વિશ્વમાં પેટ્રોલ અને ડીઝલના ભાવમાં ઘટાડો થવાની આશા વધી ગઈ છે. કોરોનાના સમયગાળા દરમિયાન લોકડાઉનના કારણે ક્રૂડ ઓઈલનો વપરાશ નોંધપાત્ર રીતે ઘટી ગયો હતો અને ક્રૂડ ઓઈલના ભાવમાં નોંધપાત્ર ઘટાડો થયો હતો. ત્યારબાદ તેલ ઉત્પાદક દેશોએ ભાવ સ્થિર કરવા માટે ક્રૂડ ઓઈલના દૈનિક ઉત્પાદનમાં ઘટાડો કર્યો હતો. આ દેશો કોરોના પહેલા ક્રૂડ ઓઈલના ઉત્પાદનના સ્તરને હાંસલ કરવા માટે ધીમે ધીમે તેનું ઉત્પાદન વધારી રહ્યા છે. હાલમાં દરરોજ 4.32 લાખ બેરલ ક્રૂડ ઓઈલનું ઉત્પાદન થઈ રહ્યું છે.

રશિયા-યુક્રેનના યુદ્ધને લીધે ક્રૂડ ઓઈલના ભાવ વધ્યા

ફેબ્રુઆરીના એન્ડમાં રશિયા અને યુક્રેનના યુદ્ધની શરૂઆત થઇ ત્યારથી આંતરરાષ્ટ્રીય બજારમાં ક્રૂડ ઓઇલના ભાવમાં વધારો થયો છે. રશિયા પર આકરા પ્રતિબંધો લાદવાને લીધે ક્રૂડ ઓઇલનો પુરવઠો ખોરવાઇ ગયો હતો. જેથી હાલ વિશ્વ મોંઘવારીનો સામનો કરી રહ્યું છે, કારણ કે પેટ્રોલ અને ડીઝલના વધતા ભાવ વિશ્વના મોટાભાગના દેશોમાં મોંઘવારી વધારવામાં મહત્વની ભૂમિકા ભજવે છે.

અમેરિકામાં રેક્રોર્ડબ્રેક સ્તરે પહોંચી ક્રૂડ ઓઇલની કિંમતો

જો કે ઓપેક દેશોની ક્રૂડ ઓઈલનું ઉત્પાદન વધારવાની કોઈ યોજના ન હતી પરંતુ યોજનાથી વિપરીત ઉત્પાદન વધારવાનો આ નિર્ણય એવા સમયે લેવામાં આવ્યો છે જ્યારે અમેરિકામાં ક્રૂડ ઓઈલની વધતી કિંમતોને કારણે પેટ્રોલની કિંમત રેકોર્ડબ્રેક સ્તરે પહોંચી છે. વર્ષ 2022ની શરૂઆતથી અમેરિકામાં કાચા તેલની કિંમતમાં 54 ટકાનો વધારો થયો છે. જો કે આ સમાચાર આવ્યા તે પહેલા ન્યૂયોર્કમાં કાચા તેલનો ભાવ 0.9 ટકા ઘટ્યો છે અને તે 114.26 ડોલર પ્રતિ બેરલ પર ટ્રેડ થઇ રહ્યો છે . ક્રૂડ ઓઈલના ઉત્પાદનમાં આ વધારો કરવાથી  ઈંધણના વધેલા ભાવને ઘટાડવામાં મદદ મળશે અને મહામારીમાઁથી બહાર નીકળેલી વૈશ્વિક અર્થ વ્યવસ્થામાં મોંઘવારીનું સ્તર નીચું આવશે.