ગાંધીનગર / સરકારી કર્મચારીઓનો શ્રાવણ સુધર્યોઃ મોંઘવારી ભથ્થાના બાકી એરીયર્સ અંગે નીતિન પટેલની મોટી જાહેરાત

• ગુજરાતમાં સરકારી કર્મચારીઓ માટે મોટા સમાચાર
• રાજ્ય સરકાર દ્વારા મોંઘવારી ભથ્થાના બાકી એરીયર્સની જાહેરાત
• 9 લાખ 61 હજારથી વધુ કર્મચારીને મળશે લાભ

રાજ્ય સરકારના 9 લાખ 61 હજારથી વધુ અધિકારી, કર્મચારી, પેન્શનરોને મોંઘવારી ભથ્થાના બાકી એરીયર્સનો લાભ આપવાની જાહેરાત નાયબ મુખ્યમંત્રી નીતિન પટેલ કરી છે. રાજ્ય સરકારના અને પંચાયતના કર્મચારીઓ તેમજ પેન્શનરો મળી કુલ 9,61,638 કર્મચારીઓને તેનો લાભ મળશે. જેના માટે રાજ્ય સરકારને રૂ. 464 કરોડનો વધારાનો ખર્ચ થશે

નાયબ મુખ્યમંત્રી નીતિન પટેલે જણાવ્યું કે, રાજ્ય સરકારના 9 લાખ 61 હજારથી વધુ અધિકારીઓ,કર્મચારીઓ અને પેન્શનરોને તા.1/07/2019થી 5% મોંઘવારી ભથ્થું આપવાનો રાજ્ય સરકારે નિર્ણય કર્યો હતો. આ મોંઘવારી ભથ્થુ જાન્યુઆરી-2020થી દર માસે પગાર સાથે ચુકવવામાં આવી રહેલ છે. તા.01/07/2019થી તા.31/12/2019 સુધી એમ કુલ-૬ માસના મોંઘવારી ભથ્થાના તફાવતની રકમ રાજ્યના કર્મચારીઓ તથા પેન્શનરોને ચુકવવાનો નિર્ણય કર્યો હતો. તે પૈકી જૂલાઈ-2019થી સપ્ટેમ્બર-2019ના રકમની ચૂકવણી કરવામાં આવી હતી અને બાકી રહેતા ઓક્ટોબર-2019થી ડિસેમ્બર-2019 સુધીના 3 મહિનાના મોંઘવારી ભથ્થાના એરીયર્સની ચુકવણી બાકી હતી. તે એરીયર્સની રકમ ઓગસ્ટ માસના પગારની સાથે ચુકવવાનો નિર્ણય કર્યો છે

મુખ્યમંત્રીશ્રી વિજયભાઇ રૂપાણી સાથે પરામર્શ કર્યા બાદ અધિકારી/કર્મચારીઓ/પેન્શનરો રાજ્ય સરકાર દ્વારા આ બાકી મોંઘવારી ભથ્થાના તફાવતની રકમ ચૂકવવાનો નિર્ણય કરવામાં આવ્યો છે. સાતમાં પગારપંચનો લાભ મેળવતાં રાજ્ય સરકારના તથા પંચાયતના અધિકારીઓ, કર્મચારીઓ, પેન્શનરોને ઓક્ટોબર-2019થી ડિસેમ્બર-2019 સુધી એમ 3 મહિનાના મોંઘવારી ભથ્થાના આ એરીયર્સની રકમ ઓગસ્ટ માસના પગારની સાથે ચુકવાશે. આ ચૂકવણાના કારણે રાજ્ય સરકારને અંદાજે કુલ-464 કરોડનું વધારાનું ભારણ થશે. રાજ્ય સરકારના કુલ-૫,૧૧,૧૨૯ જેટલા કર્મચારીઓ તથા ૪,૫૦,૫૦૯ જેટલા પેન્શનરોને આનો લાભ મળશે.