ગુજરાત / નિકોલમાં તિજોરીમાંથી રૂ.14.39 લાખના દાગીના ગાયબ થવાનું રહસ્ય ખૂલ્યું, પ્રેમીના ડરથી યુવતીએ જ દાગીના કાઢ્યાની કબૂલાત

અમદાવાદના નિકોલમાં રહેતા એક પરિવાર માટે તિજોરી ખોલવાની સામાન્ય લાગતી ઘટના અચાનક સસ્પેન્સથી ભરાઈ ગઈ હતી. ઘરમાં સુરક્ષિત રાખેલા લાખો રૂપિયાના સોનાના દાગીના ગાયબ હતા. કોઈ બહારની વ્યક્તિ ઘરમાં ઘૂસી હતી? તિજોરીની ચાવી કોની પાસે હતી? કે પછી ઘરની અંદર જ કોઈએ દાગીના કાઢ્યા હતા? પરિવાર સામે અનેક સવાલો ઉભા થયા હતા. જોકે પિતાએ પોતાની પુત્રી મીના (નામ બદલ્યું છે) પાસે કડક પૂછપરછ કરતાં સમગ્ર કહાણી પલટી ગઈ હતી.

મીના કોલેજના બીજા વર્ષમાં અભ્યાસ કરે છે. કોલેજ દરમિયાન તેની મુલાકાત હાર્દિક પંચાલ સાથે થઈ હતી. બંને એક જ વર્ગમાં અભ્યાસ કરતાં હોવાથી શરૂઆતમાં તેમની વચ્ચે મિત્રતા થઈ હતી અને ત્યારબાદ બંને વચ્ચે પ્રેમસંબંધ બંધાયો હતો. હાર્દિક મીનાને કહેતો હતો કે તેના માતા-પિતાને પણ આ સંબંધની જાણ છે અને બંનેનાં લગ્ન થશે. આ વિશ્વાસના આધારે હાર્દિક મીનાને અલગ અલગ હોટલમાં લઈ જતો હતો અને ફરિયાદ મુજબ તેની સાથે શરીર સંબંધ પણ બાંધતો હતો.

આ કહાણીમાં અચાનક વળાંક આવ્યો

થોડા સમય બાદ આ કહાણીમાં અચાનક વળાંક આવ્યો હતો. હાર્દિકે પોતાના પિતાના કાપડના ધંધામાં નુકસાન થયું હોવાનું કહી મીના પાસે પૈસાની મદદ માગવા લાગ્યો હતો. મીનાએ પૈસા આપવાનો ઇનકાર કરતાં હાર્દિકે કથિત રીતે તેના અંગત ફોટા અને વીડિયો વાઈરલ કરવાની ધમકી આપી હોવાનો આક્ષેપ છે. આ પછી મીના મુશ્કેલીમાં મુકાઈ ગઈ હતી. પરિવારને સમગ્ર વાત જણાવવાને બદલે તેણે હાર્દિકની ધમકીઓથી ડરીને ઘરની તિજોરી તરફ નજર કરી હતી.

દાગીના ઘરની તિજોરીમાં રાખવામાં આવ્યા હતા

મીનાની બંને બહેનોનાં લગ્ન થઈ ચૂક્યાં હોવાથી તેમના સોનાના દાગીના ઘરની તિજોરીમાં રાખવામાં આવ્યા હતા. મીનાએ ધીમે ધીમે તિજોરીમાંથી દાગીના કાઢવાનું શરૂ કર્યું હતું. ફરિયાદમાં કરવામાં આવેલા આક્ષેપ મુજબ સોનાની લકી, પેન્ડેન્ટ, ચેઈન સહિતના દાગીના મળીને બે મહિનામાં કુલ રૂપિયા 14.39 લાખના દાગીના મીનાએ હાર્દિકને આપી દીધા હતા. ફરિયાદ મુજબ હાર્દિકે મીના સાથે મળીને આ દાગીના વર્ષા ગોલ્ડ જવેલર્સ અને હર્ષ જવેલર્સ ખાતે વેચી દીધા હતા. ત્યારબાદ મીનાએ હાર્દિક પાસે દાગીના પરત માગ્યા હતા. ત્યારે હાર્દિકે તેને સમાન ડિઝાઇનના નવા દાગીના અપાવી દેવાનું કહ્યું હતું. મીના તેના વચન પર વિશ્વાસ કરતી રહી હતી, પરંતુ દાગીના પરત આવ્યા નહોતા.

સાસરીમાં જવાનું હોવાથી દાગીનાની જરૂર પડી

દરમિયાન મીનાની બહેનોને સાસરીમાં જવાનું હોવાથી દાગીનાની જરૂર પડી હતી. પરિવારજનોએ ઘરની તિજોરીનું લોકર ખોલ્યું ત્યારે અંદરથી દાગીના ગાયબ હોવાનું સામે આવ્યું હતું. તિજોરીમાંથી દાગીના ગાયબ થતાં પરિવારને ઘરમાં ચોરી થઈ હોવાની આશંકા હતી. ત્યારબાદ પિતાએ પરિવારના સભ્યોની પૂછપરછ શરૂ કરી હતી. આખરે પિતાની કડક પૂછપરછ સામે મીના ભાંગી પડી હતી અને તેણે તિજોરીમાંથી દાગીના કાઢીને હાર્દિકને આપ્યાની કબૂલાત કરી હતી.

પોતાના પ્રેમસંબંધ અને અંગત ફોટા-વીડિયો વાઈરલ કરવાની ધમકી

મીનાએ પરિવારને હાર્દિક સાથેના પોતાના પ્રેમસંબંધ અને અંગત ફોટા-વીડિયો વાઈરલ કરવાની ધમકી આપવામાં આવતી હોવાની વાત પણ જણાવી હતી. આ સમગ્ર મામલે મીનાએ હાર્દિક પંચાલ વિરુદ્ધ નિકોલ પોલીસ સ્ટેશનમાં બળાત્કાર અને વિશ્વાસઘાત સહિતની ફરિયાદ નોંધાવી છે. અહીં નોંધવું જરૂરી છે કે બળાત્કાર, ધમકી અને અન્ય આરોપો ફરિયાદમાં કરવામાં આવેલા આક્ષેપો છે અને તેની સત્યતા અંગેની અંતિમ હકીકત પોલીસ તપાસ તથા કાયદાકીય પ્રક્રિયા બાદ સ્પષ્ટ થશે.

આ પણ વાંચો : વડોદરામાં Fake Paytmથી ઠગાઈ! રોકડ લઈને નકલી પેમેન્ટ મેસેજ બતાવતો આરોપી ઝડપાયો

હવે પોલીસ સમગ્ર ઘટનાની તપાસ કરી રહી છે. હાર્દિકે દાગીના કેવી રીતે વેચ્યા, મીનાને ધમકીઓ આપવા માટે કોઈ ડિજિટલ માધ્યમનો ઉપયોગ કરવામાં આવ્યો હતો કે નહીં અને સમગ્ર ઘટનામાં અન્ય કોઈ વ્યક્તિ સંડોવાયેલી છે કે નહીં તે સહિતના મુદ્દાઓની તપાસ કરવામાં આવી રહી છે. આમ, એક તિજોરીમાંથી ગાયબ થયેલા રૂપિયા 14.39 લાખના દાગીનાની તપાસ આખરે પ્રેમસંબંધ, ધમકી અને કથિત બ્લેકમેલિંગની કહાણી સુધી પહોંચી છે. સમગ્ર ઘટનાના અનેક પાસાં હવે પોલીસ તપાસમાં ખૂલવાના બાકી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ