જાણી લેજો / હવેથી આ 7 લોકોને નહીં મળે રેશન કાર્ડ, જોઈ લેજો ક્યાંક તમે તો લિસ્ટમાં નથી ને?

દેશની રાજધાની દિલ્હીમાં એક મોટો ફેરફાર થવા જઈ રહ્યો છે. દિલ્હી સરકારે જાહેર વિતરણ પ્રણાલીમાં આ ફેરફાર કર્યો છે. આ માટે દિલ્હી સરકારે ફૂડ સિક્યોરિટી રૂલ્સ, 2026 નું નોટિફિકેશન જારી કર્યું છે. આ અંતર્ગત નવા રેશન કાર્ડ માટે પરિવારની વાર્ષિક આવક હવે 1 લાખથી વધારીને 1.2 લાખ કરી દીધી છે. હવે જે લોકોને નવું રેશન કાર્ડ જોઈએ, તેમને પોતાના પરિવારની આવકનું સર્ટિફિકેટ આપવું પડશે. આ સર્ટિફિકેટ દિલ્હી સરકારના મહેસૂલ વિભાગ દ્વારા જારી કરાયેલું હોવું જોઈએ.

મોબાઇલથી થશે એપ્લાય

માહિતી પ્રમાણે, નવા રેશન કાર્ડ માટે ઓનલાઇન જ એપ્લાય કરવાનું રહેશે. એટલે કે કશે જવાની જરૂર નહીં રહે. મોબાઇલ કે લેપટોપથી નવા રેશન કાર્ડ માટે એપ્લાય કરી શકાય છે. આ અરજીનું કડક વેરિફિકેશન થશે. સાથે જ ફરિયાદોને સમયસર ઉકેલવા માટે પણ એક સિસ્ટમ બનાવવામાં આવી છે. નેશનલ ફૂડ સિક્યોરિટી એક્ટ, 2013 અંતર્ગત જારી કરાયેલ નિયમોનો હેતુ વધુમાં વધુ ફાયદો પહોંચાડવાનો છે. આમાં ખામીઓને દૂર કરવાની સાથે જ સબસિડીવાળી જરૂરી ખાવા-પીવાની વસ્તુઓની આપૂર્તિમાં જવાબદારીને વધુ મજબૂત બનાવવામાં આવી છે.

આ લોકોને નહીં મળે નવું રેશન કાર્ડ

નવા નિયમો હેઠળ, પરિવારોને સબસિડીવાળું રાશન પૂરું પાડવા માટે કેટલીક શરતો લાદવામાં આવી છે. આ લોકોને રેશન મળશે નહીં -

• જો કોઈ પરિવારની વાર્ષિક આવક ₹1.2 લાખથી વધુ હોય, તો તેઓ રેશન કાર્ડ માટે પાત્ર રહેશે નહીં.
• જો પરિવારમાં કોઈ સભ્યની પાસે પોતાની માલિકીની મિલકત છે. (A થી E કેટેગરીમાં).
• જો કોઈ સભ્ય આવકવેરો ચૂકવે છે, તો તેઓ તેઓ પણ રેશન કાર્ડને પાત્ર નહીં રહે.
• જો કોઈ પરિવારનો સભ્ય ફોર વ્હીલર અથવા કાર ધરાવે છે, તો તેમને રેશનકાર્ડ મળશે નહીં. ઘરનું ગુજરાન ચલાવવા માટે કોમર્શિયલ વાહન કે ફોર વ્હીલર હોય, તો આ નિયમ લાગુ પડશે નહીં.
• જો 2 કિલોવોટથી વધુનું વીજ કનેક્શન છે તો પણ રેશનકાર્ડ માટે પાત્ર રહેશે નહીં.
• જો સરકાર અથવા સરકાર સાથે જોડાયેલી સંસ્થા માટે કામ કરે છે, તો તેમને નવું રેશનકાર્ડ મળશે નહીં.
• જો પહેલાથી જ કોઈપણ સરકારી અથવા રાજ્ય યોજના હેઠળ ફૂડ સબસિડી મળે છે, તો તેમને નવું રેશનકાર્ડ મળશે નહીં.

ઘરની સૌથી મોટી મહિલા જ ઘરની મુખિયા

ઘરની સૌથી મોટી મહિલાને જ ઘરનું મુખિયા માનવામાં આવશે. જો ઘરની સૌથી મોટી સ્ત્રી 18 વર્ષથી ઓછી ઉંમરની હોય, તો તે પુખ્ત વયની થાય ત્યાં સુધી પુરુષ સભ્યને ઘરના મુખિયા માનવામાં આવશે. એટલે કે જ્યારે છોકરી 18 વર્ષની થઈ જશે તો તે આપમેળે જ ઘરની મુખિયા માનવામાં આવશે.

કેવી રીતે કરવી અરજી?

• સરકારી અધિકારીના જણાવ્યા પ્રમાણે, રેશનકાર્ડ માટેની અરજીઓ ઓનલાઇન જ કરવી પડશે.
• તેમાં સમગ્ર પરિવારની આધાર કાર્ડની વિગતો આપવી પડશે.
• રહેઠાણ પ્રમાણપત્ર આપવું પડશે.
• આવકનું પ્રમાણપત્ર પણ આપવું જરૂરી છે.
• હાલના રેશનકાર્ડની વિગતો, જો કોઈ હોય, તો તે પણ આપવી પડશે.
• સાથે જ એક સેફ-ડિક્લેરેશન આપવું પડશે, જેમાં એ વાત લખેલી હોવી જોઈએ કે પરિવાર એ કેટેગરીમાં નથી આવતો, જેને બાકાત રાખવામાં આવ્યા છે.

આ પણ વાંચો: બદલાઇ ગયું PMOનું એડ્રેસ, હવેથી ઓળખાશે 'સેવાતીર્થ', વડાપ્રધાને કર્યું ઉદ્ઘાટન

અરજીઓના વેરિફિકેશન માટે દરેક જિલ્લામાં એક સમિતિની રચના કરવામાં આવશે. આ સમિતિની અધ્યક્ષતા જિલ્લા મેજિસ્ટ્રેટ અથવા અધિકૃત અધિકારી કરશે. આ પેનલમાં બે ધારાસભ્યો, એક સબ-ડિવિઝનલ મેજિસ્ટ્રેટ અને સહાયક કમિશનર (ખાદ્ય અને પુરવઠા) પણ સામેલ હશે. સહાયક કમિશનર સમિતિના સભ્ય સચિવ હશે.

ફરિયાદોનું નિરાકરણ કેવી રીતે કરવામાં આવશે?

રેશન કાર્ડનું વિતરણ સમગ્ર દિલ્હીમાં કરવામાં આવશે. આ સિસ્ટમ જિલ્લા સ્તરે મતદારોની સંખ્યા પર આધારિત હશે. મંજૂર ખાલી જગ્યાઓ ઉપરાંત 20% વેઇટિંગ લિસ્ટ હશે. ફરિયાદો માટે બે-સ્તરીય ફરિયાદ પ્રણાલી હશે. અર્જન્ટ ફરિયાદોનો ઉકેલ 24 કલાકમાં આવશે. અન્ય ફરિયાદોનો ઉકેલ 15 દિવસની અંદર લાવવો આવશ્યક છે. જો ફરિયાદનો ઉકેલ ન આવે, તો સંબંધિત જિલ્લા-સ્તરીય અધિકારી, સામાન્ય રીતે અધિક જિલ્લા મેજિસ્ટ્રેટ, તેને સંભાળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ