રેસિપી / શિયાળામાં કોઈ પણ સમયે ભૂખ સંતોષે છે મેથીની આ વાનગી, હેલ્થ માટે છે બેસ્ટ

પાલક-મેથી મુઠિયા

સામગ્રી

• 6 કપ પાલક ઝીણી સમારેલી
• 2 કપ મેથી ઝીણી સમારેલી
• 4 ટેબલ સ્પૂન ઘઉંનો લોટ
• 2 ટેબલ સ્પૂન ચણાનો લોટ
• 2 ટેબલ સ્પૂન રવો
• 1 ટી સ્પૂન આદું પેસ્ટ
• 5 ટીસ્પૂન લીલાં મરચાં ઝીણાં સમારેલા
• 1 ટી સ્પૂન જીરૂં
• 2 ટી સ્પૂન તેલ
• 2 ટેબલ સ્પૂન લીબુંનો રસ
• 1 ટી સ્પૂન ખાંડ
• 1/4 ટી સ્પૂન બેકિંગ સોડા
• મીઠું સ્વાદાનુસાર

વઘાર માટે

• 4 ટીસ્પૂન તેલ
• 1 ટીસ્પૂન રાઈ
• 2 ટીસ્પૂન જીરૂં
• 1/2 સ્પૂન હીંગ

રીત

એક બાઉલમાં મેથી અને પાલકને બરાબર ધોઈ લો. તેના પર થોડું મીઠું નાંખીને આઠથી દસ મિનિટ માટે એક બાજુ પર મૂકી દો. ત્યાં સુધીમાં મુઠિયા મૂકવા માટે પાણી ધીમા તાપે ગરમ કરવા મૂકી દો. મુઠિયા મૂકવાની ડિશ પર થોડું તેલ લગાવી લો. ત્યાર બાદ પાલક-મેથીને હાથ વડે બરાબર નીચોડીને પાણી કાઢી લેવું. એક મોટા બાઉલમાં પાલક-મેથી, બધાં જ લોટ, આદું-લસણની પેસ્ટ, લીલાં મરચાં, જીરૂં, લીબુંનો રસ, તેલ, ખાંડ, બેકિંગ સોડા અને મીઠું નાંખીને બરાબર મિક્સ કરી લો. થોડું પાણી નાખી કડક લોટ બાંધી લો. તેમાંથી લુઆ લઈને બોલ આકારના બનાવો. જરૂર પડે તો કોરો લોટ લેવો. હાથ વડે મુઠિયા બનાવીને તેને તેલ લગાવેલી ડિશ પર મૂકો. ધ્યાન રાખવું કે મુઠિયા એકબીજા પર ચોંટી ન જાય. તૈયાર થયેલી મુઠિયાની ડિશને કુકરમાં મૂકી લગભગ 20થી 25 મિનિટ સુધી ચઢવા દેવા. તૈયાર થયેલા મુઠિયાને બહાર કાઢી ઠંડા થવા દેવા. ત્યાં સુધી વઘાર તૈયાર કરી લેવો. વઘાર માટે સૌપ્રથમ એક નાના પેનમાં તેલ ગરમ કરવું. તેલ ગરમ થઈ જાય એટેલે તેમાં રાઈ અને જીરૂં નાખવું. તતડે એટલે તેમાં હીંગ નાંખવી. ત્યાર બાદ તેમાં મુઠિયા નાંખીને બરાબર હલાવો. ચારેક મિનિટ સુધી બરાબર હલાવો. હલાવતી વખતે ધ્યાન રાખવું કે મુઠિયા તૂટી ન જાય. ત્યાર બાદ ગરમા ગરમ મુઠિયા પીરસવા માટે તૈયાર છે.