ક્રાઈમ / ભાવનગર નકલી દારૂકાંડમાં મોટું અપડેટ, વધુ 6 આરોપીઓની ધરપકડ, 9 દિવસના રિમાન્ડ પર

નકલી દારૂકાંડમાં વધુ 6 આરોપીઓની ધરપકડ થઈ છે. ધરપકડ બાદ તમામ 6 આરોપીઓને 4th એડિશનલ ધર્મેન્દ્ર જોશીની કોર્ટમાં રજૂ કરાયા હતા જ્યાં કોર્ટે 9 દિવસના રિમાન્ડ મંજૂર કર્યાં હતા. આ રીતે હવે કુલ 37 આરોપીઓની ધરપકડ થઈ ચૂકી છે.

મુખ્ય આરોપી રઈસની પણ ધરપકડ થઈ ચૂકી છે

ઉલ્લેખનીય છે કે કૌભાંડના મુખ્ય આરોપી રઈસની મધ્યપ્રદેશના ભોપાલ ખાતેથી ધરપકડ કરવામાં આવી હતી. મિથેનોલયુક્ત ઝેરીલો દારૂ બનાવીને લોકોના જીવ જોખમમાં મૂકનારા આ નેટવર્કનો પર્દાફાશ થતાં અત્યાર સુધીમાં 13થી વધુ લોકોના મોત થયા છે. મુખ્ય આરોપી પકડાતા હવે દારૂના આ કાળા કારોબાર સાથે જોડાયેલા અન્ય આરોપીઓ અને સમગ્ર સપ્લાય ચેઇનના રાઝ ખુલવાની પૂરી શક્યતા છે.

ઉજ્જેનથી લાવ્યાં હતા દારુ

આરોપી ગૌતમ સોલંકીએ કબૂલાત કરી હતી કે તે મનોજ નામના શખસ મારફતે મુખ્ય આરોપી રઈસના સંપર્કમાં આવ્યો હતો. ત્યારબાદ ભાવનગરમાં નકલી દારૂ બનાવવાનું કાવતરું રચવામાં આવ્યું હતું. રઈસ અને તેનો સાથી ઝુબેર અમદાવાદ તથા ઉજ્જૈનથી દારૂ બનાવવા માટેનો કાચો માલ, ખાલી બોટલો, સ્ટીકરો, ઢાંકણા અને અતિ જોખમી એવું મિથેનોલ રસાયણ લાવ્યા હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ