જૂનાગઢ / નદીમાં પગ ધોતા 46 વર્ષીય વ્યક્તિ પર મગરનો હુમલો, ગંભીર ઈજા થતાં સિવિલ હોસ્પિટલમાં ખસેડાયા

જૂનાગઢ: માળિયા હાટીના તાલુકાના જંગર ગીર ગામે મગરના હુમલાની ઘટના સામે આવી છે. મહાદેવના મંદિર નજીક નદીમાં પગ ધોવા ગયેલા 46 વર્ષીય લક્ષ્મણ વાઘેલા પર મગરે અચાનક હુમલો કરતાં તેઓ ગંભીર રીતે ઘાયલ થયા હતા.

મગરના હુમલામાં પગમાં ગંભીર ઈજાઓ પહોંચી

મળતી માહિતી મુજબ, લક્ષ્મણ વાઘેલા મહાદેવના મંદિર પાસે નદીમાં પગ ધોઈ રહ્યા હતા. તે દરમિયાન અચાનક મગરે તેમના પગના ભાગે હુમલો કર્યો હતો. મગરના હુમલામાં પગમાં ગંભીર ઈજાઓ થતાં ઘટનાસ્થળે અફરાતફરીનો માહોલ સર્જાયો હતો. ઘાયલ લક્ષ્મણ વાઘેલાને તાત્કાલિક સારવાર માટે જૂનાગઢ સિવિલ હોસ્પિટલમાં ખસેડવામાં આવ્યા હતા, જ્યાં તેમની સારવાર ચાલી રહી છે.

સ્થાનિકોમાં ભયનો માહોલ

ઘટનાને પગલે સ્થાનિકોમાં ભયનો માહોલ જોવા મળી રહ્યો છે. નદી વિસ્તારમાં મગરની હાજરીને ધ્યાનમાં રાખીને ગ્રામજનોની સુરક્ષાને લઈને પણ ચિંતા વ્યક્ત કરવામાં આવી રહી છે.

આ પણ વાંચોઃ ગુજરાતમાં વહેલી વિધાનસભા ચૂંટણીની શંકા, શંકરસિંહ વાઘેલાએ કહ્યુ, ‘કોંગ્રેસમાં ફરી આવું તો ચૂંટણી વહેલી આવી શકે’

પરિવારજનો અને સ્થાનિકોએ વનવિભાગ સમક્ષ મગરને વહેલી તકે પકડી સુરક્ષિત સ્થળે ખસેડવાની માંગ કરી છે, જેથી ભવિષ્યમાં આવી ઘટના ફરી ન બને અને નદી વિસ્તારમાં આવતા લોકોની સુરક્ષા જળવાઈ રહે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ