OMG / ના હોય! દર વર્ષે 1.5 ઇંચની સ્પીડથી ચંદ્ર પૃથ્વીથી દૂર જઇ રહ્યો છે? એવું કેમ, જાણો કારણ

મિશિગન સ્ટેટ યુનિવર્સિટીના એક સંશોધકે ચોંકાવનારી બાબત જણાવી છે. ભૌતિક અને ખગોળશાસ્ત્રી ડૉ. સ્ટીફન ડિકર્વીએ જણાવ્યું છે કે, પૃથ્વીથી ચંદ્ર દૂર જઈ રહ્યો છે. ચંદ્ર દર વર્ષે 1.5 ઇંચના દરે પૃથ્વીથી દૂર જઈ રહ્યો છે. આથી પૃથ્વીનું પરિભ્રમણ પણ ધીમું થઈ રહ્યું છે, જેના કારણે ભવિષ્યમાં દિવસની લંબાઈ વધી શકે છે. ઉલ્લેખનીય છે કે, ચંદ્રની રચના લગભગ 4.5 અબજ વર્ષ પહેલાં થઈ હતી જ્યારે ગ્રહ જેવી વસ્તુ પૃથ્વી સાથે ટકરાઈ હતી. આ ખગોળીય ઘટના વખતે ચંદ્ર પૃથ્વીની ખૂબ નજીક હતો અને ઘણો મોટો પણ દેખાતો હતો.

• કેમ દૂર જઈ રહ્યો છે ચંદ્ર?
  

ડૉ. સ્ટીફન ડિકર્વીના મતે, ભરતી-ઓટને કારણે ચંદ્ર આપણાથી દૂર જઈ રહ્યો છે. ચંદ્રના ગુરુત્વાકર્ષણ બળથી આપણા મહાસાગરોમાં મોટા મોટા ઉભાર બને છે. જેમાં એક ઉભાર ચંદ્રની તરફ હોય છે, જ્યાં ગુરુત્વાકર્ષણ બળ સૌથી મજબૂત હોય છે, અને બીજો ચંદ્રથી દૂર હોય છે, જ્યાં ગુરુત્વાકર્ષણ બળ સૌથી ઓછું હોય છે. આ બંને ઉભાર ચંદ્રની એકઝેક્ટ સામે  રહેતા નથી, પરંતુ પૃથ્વીના પરિભ્રમણને કારણે થોડા આગળ તરફ ખેંચાય છે. આ ખેંચાણને કારણે ચંદ્ર ધીમે ધીમે આપણાથી દૂર થઈ રહ્યો છે.

• આ રીતે મપાયુ અંતર
  

વૈજ્ઞાનિકો પૃથ્વીથી ચંદ્રનું અંતર માપવા માટે લેસરનો ઉપયોગ કરે છે. તેઓ ચંદ્ર પર મોકલેલા અવકાશયાન અને અવકાશયાત્રીઓ દ્વારા રખાયેલા અરીસાઓ પર લેસરનો પ્રકાશ નાખે છે. આ પ્રકાશને ચંદ્ર સુધી જવા અને પરત આવવામાં લાગતા સમયને માપીને તેઓ ચંદ્રનું અંતર અને તેની ભ્રમણકક્ષામાં થતા ફેરફારોને સચોટ રીતે નક્કી કરી શકે છે.

વધુ વાંચો : આકાશમાં કેટલા તારા છે?, વૈજ્ઞાનિકોએ મગજનું દહીં કરતા સવાલનો જવાબ શોધી કાઢ્યો!

• ગતિ કેમ ધીમી પડે છે?
  જેવી રીતે પૃથ્વી ચંદ્રની ગતિ વધારે છે તેનાથી પૃથ્વીનું પરિભ્રમણ ધીમું થાય છે. આવું એટલા માટે થાય છે કેમ કે પૃથ્વીનું પરિભ્રમણ બળ ચંદ્ર તરફ જતુ રહે છે. મતલબ કે, જેમ જેમ ચંદ્ર દૂર જશે તેમ તેમ દિવસમાં સેકન્ડ અને મિનિટની સંખ્યા ધીમે ધીમે વધતી જશે.  પરંતુ ડૉ. ડિકર્વીએ સમજાવ્યું કે આ ફેરફાર ખૂબ જ ધીમે ધીમે થઈ રહ્યો છે. હાલમાં ચંદ્ર પૃથ્વીથી 3,84,000 કિલોમીટર દૂર છે અને તેની તુલનામાં દર વર્ષે 1.5 ઇંચ ખૂબ જ ઓછું અંતર કહેવાય.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ