તમારા કામનું / iPhone ખોવાયો છે તો સાવધાન! Apple Supportના નામે નકલી મેસેજ-કોલથી ઠગાઈ

સાયબર ગુનેગારો હવે ખાસ કરીને એવા લોકોને નિશાન બનાવી રહ્યા છે, જેમનો આઈફોન ખોવાઈ ગયો હોય અથવા ચોરાઈ ગયો હોય. એપલ સપોર્ટના પ્રતિનિધિ હોવાનો ઢોંગ કરી ઠગો નકલી મેસેજ, ઈ-મેઈલ, એસએમએસ અને વોટ્સએપ એલર્ટ મોકલીને સંવેદનશીલ માહિતી મેળવવાનો પ્રયાસ કરી રહ્યા છે. એક વરિષ્ઠ સાયબર ક્રાઈમ અધિકારીએ જણાવ્યું હતું કે આ પ્રકારની અનેક ફરિયાદો સાયબર ક્રાઈમ હેલ્પલાઈન ૧૯૩૦ પર મળી છે. એક અધિકારીએ જણાવ્યું કે કેટલાક કિસ્સામાં પીડિતોએ એપલ સપોર્ટ પર આપેલા ‘વિશ્વસનીય નંબર’ મારફતે તેમનો ડેટા ગુમાવ્યો છે.

ઠગો સામાન્ય રીતે દાવો કરે છે કે ખોવાયેલો આઈફોન મળી ગયો છે અથવા તેને ટ્રેક કરવામાં આવી રહ્યો છે અને કોઈ અનધિકૃત વ્યક્તિ તેમના ડેટામાં લોગ ઈન કરવાનો પ્રયાસ કરી રહી છે. ત્યાર બાદ પીડિતોને એક લિંક પર ક્લિક કરવા, તેમનું એપલ એકાઉન્ટ ચકાસવા, વેરિફિકેશન કોડ આપવા અથવા ફોન પાછો મેળવવા કે તેને સુરક્ષિત કરવા માટે જરૂરી હોવાનું જણાવી અન્ય માહિતી શેર કરવા કહેવામાં આવે છે.

AIથી જનરેટ કરાયેલા ફોન કોલ પણ હવે ઠગાઈનું હથિયાર

કેટલાક કિસ્સામાં ઠગો એઆઈથી જનરેટ કરાયેલા અથવા ક્લોન કરાયેલા અવાજનો ઉપયોગ કરે છે, જેના કારણે ફોન પર વાત કરનાર વ્યક્તિ ખરેખર એપલ સપોર્ટના કર્મચારી જેવી વિશ્વસનીય લાગે છે. ફોન કરનાર એવો દાવો કરી શકે છે કે ચોરાયેલા આઈફોનને કાયમ માટે લોક થતો અટકાવવા અથવા તેમાં રહેલા ડેટાનો દુરુપયોગ રોકવા માટે તાત્કાલિક ચકાસણી જરૂરી છે. સાયબર નિષ્ણાતોના જણાવ્યા મુજબ આપણો ડર ઠગોનું સૌથી મોટું હથિયાર છે. એક વખત લોકોને વિશ્વાસ થઈ જાય કે તેમનો ફોન મળી ગયો છે અથવા કોઈ તેમના ડેટા સુધી પહોંચવાનો પ્રયાસ કરી રહ્યું છે ત્યારે તેઓ અજાણતાં જ પોતાનું એપલ એકાઉન્ટ કબજે કરવા માટે જરૂરી પાસવર્ડ અને કોડ ઠગોના હાથમાં આપી શકે છે.

ફોન ખોવાઈ જાય તો શું કરવું?

આઈફોન ખોવાઈ જાય અથવા ચોરાઈ જાય તો યુઝરે તરત જ ‘ફાઈન્ડ માય’નો ઉપયોગ કરીને ડિવાઈસને ‘લોસ્ટ’ તરીકે માર્ક કરવું જોઈએ અને જરૂરી હોય તો તેને રિમોટલી ઈરેઝ પણ કરી શકાય છે. આ ઉપરાંત મોબાઈલ ઓપરેટરનો સંપર્ક કરીને સિમ અથવા ઈ-સિમ બ્લોક કરાવવું અને ચોરી અંગે પોલીસમાં ફરિયાદ કરવી જોઈએ.

આ પણ વાંચો : સાણંદના મોટી દેવતીમાં દીપડાનો કાયમી વસવાટ? એક મહિનામાં બીજીવાર દેખાયો

આ રીતે થાય છે ઠગાઈ

ઠગો ‘તમારું ડિવાઈસ મળી ગયું છે’ જેવાં નકલી નોટિફિકેશન મોકલે છે. આ સાથે એવી લિંક્સ આપવામાં આવે છે, જે એપલની સત્તાવાર વેબસાઈટ જેવી દેખાતી નકલી વેબસાઈટ પર લઈ જાય છે. આ વેબસાઈટ પર નકશો બતાવીને ફોનનું લોકેશન મળ્યું હોવાનું દર્શાવવામાં આવી શકે છે. ત્યાર બાદ યુઝરને ડિવાઈસ ‘અનલોક’ અથવા ‘સિક્યોર’ કરવા માટે તેનો ડિવાઈસ પાસકોડ, એપલ એકાઉન્ટનો પાસવર્ડ અથવા ટૂ-ફેક્ટર ઓથેન્ટિકેશન કોડ દાખલ કરવા કહેવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ