ગુજરાત / સાણંદના મોટી દેવતીમાં દીપડાનો કાયમી વસવાટ? એક મહિનામાં બીજીવાર દેખાયો

શહેર બહારના વિસ્તારોમાં અવારનવાર દેખા દેતો દીપડો હવે સાણંદના મોટી દેવતી ગામમાં પ્રમાણમાં ઘણું આરામદાયક રહેઠાણ બનાવી ચૂક્યો હોવાની શક્યતા છે. ગામલોકો અને વન વિભાગના અધિકારીઓએ એક જ મહિનામાં બીજી વખત અહીં દીપડાની હાજરી નોંધતાં આ શક્યતા વધુ મજબૂત બની છે. વન વિભાગે તપાસેલાં તાજાં પગલાંનાં નિશાન પુખ્ત દીપડાનાં હોવાનું જણાયું છે. વારંવાર દીપડો દેખાવાની ઘટનાઓ પરથી એવું પણ જણાઈ રહ્યું છે કે આ પ્રાણી માત્ર આ વિસ્તારમાંથી પસાર થઈ રહ્યું નથી, પરંતુ તેણે અહીંના વિસ્તારમાં નિયમિત વસવાટ માટેનું ક્ષેત્ર બનાવી લીધું હોઈ શકે છે.

મોટી દેવતી આસપાસનો વિસ્તાર દીપડાને લાંબા સમય સુધી રહેવા માટે અનુકૂળ બની શકે તેવી અનેક વિશેષતાઓ ધરાવે છે. આ વિસ્તારમાં આવેલી અનેક જૂની ઈંટની ભઠ્ઠીઓ હવે બંધ પડી છે. સમય જતાં આ ભઠ્ઠીઓ અને તેની આસપાસના વિસ્તારોમાં ગાંડા બાવળ, ઝાડી-ઝાંખરાં અને અન્ય વનસ્પતિ ઊગી નીકળી છે. તેના કારણે માનવ અવરજવરથી દૂર એવા એકાંત અને નિર્જન વિસ્તારો ઊભા થયા છે. ગામની આસપાસનાં ખેતીનાં ખેતરો અને ઝાડીવાળા વિસ્તારો પણ દીપડાને હલનચલન કરવા માટે ખુલ્લી જગ્યા પૂરી પાડે છે.

વિસ્તારમાં એક જ દીપડો

જોકે વન વિભાગના અધિકારીઓએ વિસ્તારમાં એક જ દીપડો છે કે એકથી વધુ દીપડા છે તે અંગે હાલ કોઈ ચોક્કસ નિષ્કર્ષ પર આવવામાં સાવચેતી રાખી છે. અલગ અલગ પ્રસંગે નોંધાયેલા પગલાંનાં નિશાનમાં તફાવત જોવા મળ્યો હોવાનું અધિકારીઓએ જણાવ્યું છે, જોકે જમીનની સ્થિતિમાં ફેરફાર થવાથી પણ પગલાંનાં નિશાનના આકાર અને કદ બદલાઈ શકે છે. મોટી દેવતીમાં દીપડો લાંબા સમય સુધી રહેવાની શક્યતાએ ગામલોકોમાં મતભેદ ઊભા કર્યા છે. કેટલાક ગ્રામજનોનું માનવું છે કે દીપડાની હાજરીથી નીલગાય અને જંગલી ભૂંડની સંખ્યા નિયંત્રણમાં રાખવામાં મદદ મળી શકે છે. આ બંને પ્રાણીઓ વારંવાર ખેતરોમાં ઘૂસી પાકને નુકસાન પહોંચાડે છે.

નાયબ વન સંરક્ષક મીનલ જાની

અમદાવાદનાં નાયબ વન સંરક્ષક મીનલ જાનીએ જણાવ્યું હતું કે કેટલાક ખેડૂતોએ દીપડાને આ વિસ્તારમાં જ રહેવા દેવાની વિનંતી કરી છે, કારણ કે તે નીલગાય અને જંગલી ભૂંડની વસ્તીને નિયંત્રણમાં રાખવામાં મદદરૂપ થઈ શકે છે.

આ પણ વાંચો : ચાલુ ટ્રેનમાં મુસાફરોની ઊંઘનો તસ્કરો ઉઠાવે છે લાભ, મોબાઈલ-લેપટોપ ચોરીની વધતી ફરિયાદોથી રેલવે પોલીસ સામે મોટો પડકાર

શહેરની નજીક ‘વાઈલ્ડ એજ’

મોટી દેવતી વિસ્તાર કલ્હાર બ્લૂઝ એન્ડ ગ્રીન્સથી આશરે ૪.૭ કિ.મી. અને ઘુમા વિસ્તારમાં આવેલી સેરેનદીપ મેન્શન્સ સોસાયટીથી આશરે ૭.૧ કિ.મી. દૂર આવેલો છે. શહેરની આસપાસના ખેતીપ્રધાન અને ઝાડીવાળા વિસ્તારોમાં વન્યજીવોની અવરજવર માટે આ પટ્ટો મહત્ત્વનો બની રહ્યો છે. વન વિભાગે જોકે હજુ સુધી એ વાતની પુષ્ટિ કરી નથી કે મોટી દેવતીમાં જોવા મળેલો દીપડો એ જ છે, જે જુલાઈની ૨૦ અને ૨૧ તારીખ વચ્ચે રાતે સેરેનદીપ મેન્શન્સ નજીક જોવા મળ્યો હતો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ