નેશનલ / ઈરાનની દાદાગીરીનો અંત! PM મોદીના IMEC પ્રોજેક્ટથી દુનિયાને તેલ સંકટમાંથી ઉગારશે ભારત, જાણો શું છે પ્લાન..

ઈરાન અને અમેરિકા-ઈઝરાયેલ વચ્ચેના સંઘર્ષને કારણે હોર્મુઝ જલડમરુમધ્યમાં તેલના જહાજોની અવરજવર જોખમમાં મુકાઈ છે. આ સંકટને ટાળવા માટે ખાડી દેશોએ ભારત-મધ્ય પૂર્વ-યુરોપ આર્થિક કોરિડોર પર ધ્યાન કેન્દ્રિત કર્યું છે. આ પ્રોજેક્ટ દ્વારા પાઈપલાઈન, રેલવે અને રોડ માર્ગોનું એવું જાળ બિછાવવામાં આવશે જે ઈરાનના ચોકપોઈન્ટને બાયપાસ કરીને સીધું યુરોપ અને ભારતને જોડશે. સાઉદી અરેબિયા અને ઈઝરાયેલ જેવા દેશો પણ આ વૈકલ્પિક માર્ગોના સમર્થનમાં છે, જે વિશ્વની ઉર્જા સુરક્ષા માટે પાયાનો પથ્થર સાબિત થશે.

દાયકાઓથી હોર્મુઝ સ્ટ્રેટ વિશ્વના તેલ પુરવઠા માટેની મુખ્ય લાઈફલાઈન રહ્યું છે, પરંતુ વર્તમાન તણાવે આ સાંકડા દરિયાઈ માર્ગની નબળાઈને ખુલ્લી પાડી દીધી છે. ઉર્જા ક્ષેત્રના નિષ્ણાતોને ડર છે કે જો ઈરાન આ માર્ગને સંપૂર્ણપણે બંધ કરી દે, તો ગણતરીના દિવસોમાં જ વૈશ્વિક ઉર્જા પુરવઠો ઠપ થઈ શકે છે અને પેટ્રોલ-ડીઝલના ભાવ આસમાને પહોંચી શકે છે. આ મોટા જોખમને ટાળવા માટે, ખાડી દેશો હવે હોર્મુઝ પરની પોતાની અવલંબન ઘટાડવા માટે પાઈપલાઈન અને રેલવે નેટવર્કનો વિકાસ કરી રહ્યા છે. આ આખી પ્રક્રિયાના કેન્દ્રમાં વડાપ્રધાન મોદી દ્વારા સમર્થિત IMEC પ્રોજેક્ટ છે, જે ભારતને મધ્ય પૂર્વના માર્ગે સીધું યુરોપ સાથે જોડવાની ક્ષમતા ધરાવે છે.

તાજેતરના અહેવાલો મુજબ સાઉદી અરેબિયાએ પહેલેથી જ તેનો 'ઈસ્ટ-વેસ્ટ પાઈપલાઈન' પ્રોજેક્ટ તેજ કરી દીધો છે, જે તેલને સીધું લાલ સમુદ્ર (Red Sea) સુધી પહોંચાડે છે. આ માસ્ટરસ્ટ્રોકને કારણે તેલના જહાજોએ હોર્મુઝ સ્ટ્રેટમાં જવાની જરૂર રહેતી નથી. આ ઉપરાંત, અરબ દ્વીપકલ્પને ઈઝરાયેલના હાઈફા બંદર દ્વારા ભૂધ્ય સમુદ્ર સાથે જોડવાની અત્યંત મહત્વાકાંક્ષી યોજના પર પણ કામ ચાલી રહ્યું છે. લેબનીઝ કન્સ્ટ્રક્શન ફર્મ 'કેટ ગ્રુપ'ના સીઈઓ ક્રિસ્ટોફર બુશે પુષ્ટિ કરી છે કે આંતરરાષ્ટ્રીય બજારમાં વિવિધ પાઈપલાઈન પ્રોજેક્ટ્સને લઈને રસ અત્યંત ઝડપથી વધી રહ્યો છે, કારણ કે દરેક દેશ હવે સુરક્ષિત સપ્લાય ચેઈન ઈચ્છે છે.

વૈશ્વિક સ્તરે ભારતની ભૂમિકા હવે માત્ર એક મોટા ગ્રાહક તરીકેની નથી રહી, પરંતુ એક મજબૂત નેતૃત્વકર્તા તરીકે ઉભરી છે. વડાપ્રધાન મોદીએ તાજેતરમાં જ IMEC અને I2U2 (ભારત, ઈઝરાયેલ, યુએઈ અને અમેરિકા) જૂથ હેઠળ સહયોગ મજબૂત કરવા માટે જે આહવાન કર્યું હતું, તે હવે જમીની સ્તરે ઉતરી રહ્યું છે. આ કોરિડોર માત્ર વ્યાપારિક જ નહીં પરંતુ વ્યૂહાત્મક રીતે પણ ભારતને વિશ્વની ઉર્જા સુરક્ષાની ગેરંટી પૂરી પાડનાર દેશ બનાવે છે. અમેરિકી રાષ્ટ્રપતિ ડોનાલ્ડ ટ્રમ્પે પણ ખાડી દેશોને પ્રોત્સાહન આપ્યું છે કે તેઓ પોતાના તેલ માર્ગોની સુરક્ષા માટે હિંમત બતાવે અને ઈરાનના પ્રભાવવાળા રસ્તાઓ છોડી નવા વિકલ્પો અપનાવે.

આ પણ વાંચો: "જો મમતા બેનર્જી સત્તામાં આવશે તો બધા હિન્દુઓએ બંગાળ છોડવું પડશે", TMC પર ભડક્યાં મિથુન ચક્રવર્તી

ઈઝરાયેલના પીએમ બેન્જામિન નેતન્યાહુ પણ આ વૈકલ્પિક રસ્તાઓના પ્રબળ સમર્થક છે. તેમનું માનવું છે કે સૈન્ય કાર્યવાહી માત્ર તાત્કાલિક રાહત આપી શકે છે, પરંતુ લાંબા ગાળાની શાંતિ અને સ્થિરતા માટે ઈન્ફ્રાસ્ટ્રક્ચરમાં વ્યૂહાત્મક ફેરફાર જરૂરી છે. પશ્ચિમ દિશામાં પાઈપલાઈન બિછાવીને ઈરાનના ભૌગોલિક પ્રેશર પોઈન્ટને બાયપાસ કરવાથી જ વિશ્વની અર્થવ્યવસ્થા સુરક્ષિત રહી શકશે. ભારતનો આ મેગા પ્રોજેક્ટ ભવિષ્યમાં ઈરાનના ચક્રવ્યૂહને તોડવા માટેનું સૌથી ધારદાર હથિયાર સાબિત થશે, જે લાખો લોકોના ખિસ્સા પર પડનારા મોંઘવારીના બોજને હળવો કરશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ