તેલંગાણા દિવસ / આજથી હૈદરાબાદ રહેશે માત્ર તેલંગાણાની રાજધાની, આંધ્રપ્રદેશનું બનશે નવું કેપિટલ

Telangana Day : આજથી એટલે કે રવિવારથી હૈદરાબાદ હવે તેલંગાણા અને આંધ્રપ્રદેશની સત્તાવાર સંયુક્ત રાજધાની રહેશે નહીં. વાત જાણે એમ છે કે, આંધ્ર પ્રદેશ પુનર્ગઠન અધિનિયમ 2014 ની કલમ 5(1) મુજબ આંધ્ર પ્રદેશ અને તેલંગાણાની 2 જૂન, 2024થી એક સામાન્ય રાજધાની હશે. આ જ અધિનિયમની કલમ 5(2) જણાવે છે કે, હૈદરાબાદ માત્ર તેલંગાણાની રાજધાની રહેશે અને આંધ્ર પ્રદેશની નવી રાજધાની હશે.

આંધ્રપ્રદેશ પાસે હજુ સુધી કાયમી રાજધાની નથી. અમરાવતી અને વિશાખાપટ્ટનમને લઈને કોર્ટમાં હજુ પણ લડાઈ ચાલી રહી છે. આંધ્રના વર્તમાન મુખ્યમંત્રી જગન મોહન રેડ્ડીએ કહ્યું છે કે,જો તેઓ સત્તામાં રહેશે તો તેઓ વિશાખાપટ્ટનમને વહીવટી રાજધાની બનાવશે. તે જ સમયે, અમરાવતી વિધાનસભાની બેઠક હશે અને કુર્નૂલ ન્યાયિક રાજધાની હશે. આંધ્રપ્રદેશે 2014 માં વિભાજન પછી તરત જ હૈદરાબાદને તેની રાજધાની તરીકે ઉપયોગ કરવાનું બંધ કર્યું. એક રાજકીય નિરીક્ષકે કહ્યું કે, બે તેલુગુ રાજ્યો વચ્ચેનું તાજેતરનું વિભાજન પ્રતીકાત્મક હશે પરંતુ તે એક મહત્વપૂર્ણ સીમાચિહ્નરૂપ છે.

આજે છે તેલંગાણા દિવસ

તેલંગાણાના મુખ્યમંત્રી એ.રેવન્ત રેડ્ડીએ રાજ્યપાલ સી.પી. રાધાકૃષ્ણનને રવિવારે યોજાનારી રાજ્ય સ્થાપના દિવસની ઉજવણીમાં ભાગ લેવા આમંત્રણ આપવામાં આવ્યું છે. રેડ્ડીએ શનિવારે રાજભવનની મુલાકાત લીધી હતી અને રાજ્યપાલને 2 જૂનના કાર્યક્રમમાં હાજરી આપવા વિનંતી કરી હતી. નાયબ મુખ્યમંત્રી ભટ્ટી વિક્રમાર્ક પણ તેમની સાથે હતા. રાજ્ય સરકારે સિકંદરાબાદમાં પરેડ ગ્રાઉન્ડ અને ટાંકી બંધ ખાતે આ કાર્યક્રમનું આયોજન કરવા માટે વિસ્તૃત વ્યવસ્થા કરી છે. કોંગ્રેસ નેતા સોનિયા ગાંધી, મુખ્યમંત્રી, રાજ્યના મંત્રીઓ, જનપ્રતિનિધિઓ અને અન્ય મહાનુભાવો આ કાર્યક્રમમાં હાજરી આપે તેવી અપેક્ષા છે.

મહત્વનું છે કે, આજે સવારે ગન પાર્ક ખાતે શહીદ સ્તૂપમાં પુષ્પાંજલિ અર્પણ કર્યા બાદ મુખ્યમંત્રી સિકંદરાબાદ પરેડ ગ્રાઉન્ડ ખાતે વિવિધ કાર્યક્રમોમાં હાજરી આપશે. પરેડ ગ્રાઉન્ડના પરિસરમાં સ્પેશિયલ મેડિકલ કેમ્પ પણ લગાવવામાં આવ્યો છે અને પીવાના પાણીની વ્યવસ્થા અને યોગ્ય શૌચાલયની વ્યવસ્થા કરવામાં આવી છે. આ ઉપરાંત માહિતી અને જનસંપર્ક વિભાગના નેજા હેઠળ એલઇડી સ્ક્રીન અને કાર્યક્રમનું લાઇવ ટેલિકાસ્ટ યોજવામાં આવી રહ્યું છે. આ પ્રસંગે 2જી જૂને સાંજે ટાંકી બંધ ખાતે કાર્નિવલ, ફટાકડા, લેસર-શો, ફૂડ અને ગેમિંગ સ્ટોલ સહિતના વિવિધ સાંસ્કૃતિક કાર્યક્રમોનું આયોજન કરવામાં આવશે. આ સાંસ્કૃતિક કાર્યક્રમોમાં મુખ્યમંત્રી, મંત્રીઓ અને અન્ય મહાનુભાવો ભાગ લેશે.