બિઝનેસ / ફરીવાર ગૌતમ અદાણી બન્યા દેશના નંબર વન અમીર ઉદ્યોગપતિ, જુઓ અંબાણી કેટલાં પાછળ?

ભારતીય અર્થતંત્રમાં ઉદ્યોગપતિઓની સંપત્તિમાં મજબૂત ઉછાળો જોવા મળી રહ્યો છે. તાજેતરમાં જાહેર થયેલ M3M હુરુન ઈન્ડિયા રિચ લિસ્ટ 2026 અનુસાર ગૌતમ અદાણી અને તેમનો પરિવાર ₹9.23 લાખ કરોડ ($96 બિલિયન) ની સંપત્તિ સાથે રિલિજયન્સ ઈન્ડસ્ટ્રીઝના મુકેશ અંબાણીને પાછળ છોડીને ભારતની રિચ લિસ્ટમાં પુનઃ પ્રથમ ક્રમાંકે પહોંચી ગયા છે. અદાણીની સંપત્તિમાં 13% નો વધારો થયો છે, જ્યારે મુકેશ અંબાણીની સંપત્તિ 10% ઘટીને ₹8.63 લાખ કરોડ ($90 બિલિયન) નોંધાઈ છે. હાલમાં અદાણી અંબાણી કરતાં ₹59,400 કરોડથી આગળ છે.

દેશમાં અમીરોની સંપત્તિ જીડીપીના અડધા ભાગ જેટલી થઈ

આ વર્ષની હુરુન યાદીમાં કુલ 1,810 એવા વ્યક્તિઓનો સમાવેશ થાય છે જેમની પાસે ઓછામાં ઓછી ₹1,000 કરોડની સંપત્તિ છે. આ તમામ અમીરોની કુલ સંપત્તિ ગત વર્ષની સરખામણીએ 12.8% વધીને ₹187.5 લાખ કરોડ ($1.96 ટ્રિલિયન) થઈ ગઈ છે, જે ભારતની જીડીપીના આશરે અડધા ભાગ જેટલી છે. ભારતમાં હવે રૅકોર્ડ 391 ડૉલર-બિલિયોનેર્સ છે, જેમાં છેલ્લા એક વર્ષમાં જ 27 નવા બિલિયોનેર્સ ઉમેરાયા છે.

ટોપ 10 માં સ્ટીલ અને મેટલ ક્ષેત્રનો દબદબો

એલએન મિત્તલ: આર્સેલર-મિત્તલના એલએન મિત્તલ અને તેમનો પરિવાર 8 સ્થાનની છલાંગ લગાવીને ₹3.39 લાખ કરોડની સંપત્તિ સાથે ત્રીજા સ્થાને પહોંચી ગયો છે. તેમની સંપત્તિમાં 93% નો જંગી વધારો થયો છે.

અનિલ અગ્રવાલ: વેદાંત રિસોર્સિસના અનિલ અગ્રવાલ અને તેમનો પરિવાર સંપત્તિમાં 87% ના વધારા સાથે ₹2.08 લાખ કરોડ મેળવીને 9મા સ્થાને પહોંચ્યો છે.

સમીર મહેતા: ટોરેન્ટ ફાર્માસ્યુટિકલ્સના સમીર મહેતા અને પરિવાર JB કેમિકલ્સ સાથેના મર્જર બાદ 52% ના વધારા સાથે ₹1.89 લાખ કરોડની સંપત્તિ સાથે 10મા ક્રમે પહોંચી ગયો છે.

ક્વોન્ટમ કમ્પ્યુટિંગ અને AI ટેકનોલોજીની ધમાકેદાર એન્ટ્રી

ટેકનોલોજી સેક્ટરમાંથી પ્રથમ વખત ક્વોન્ટમ કમ્પ્યુટિંગ અને AI ક્ષેત્રના ઉદ્યોગસાહસિકોએ આ યાદીમાં જગ્યા બનાવી છે. બેંગલુરુની QpiAi ના નાગેન્દ્ર નાગરાજા ₹1,700 કરોડની સંપત્તિ સાથે યાદીમાં સામેલ થનારા દેશના પ્રથમ ક્વોન્ટમ કમ્પ્યુટિંગ એન્ટરપ્રિન્યોર બન્યા છે. આર્ટિફિશિયલ ઈન્ટેલિજન્સ (AI) ક્ષેત્રમાંથી 19 અમીરોએ સ્થાન મેળવ્યું છે, જેમની કુલ સંપત્તિ ₹3.07 લાખ કરોડ છે. આ પૈકી 15 લોકો નવી એન્ટ્રી ધરાવે છે. 28 વર્ષીય તનાય કોઠારી અને સહજ ગર્ગ તેમની AI કંપની 'વિસ્પર ફ્લો' (Wispr Flow) સાથે સ્થાન પામ્યા છે, જેમાં દરેકની સંપત્તિ ₹4,200 કરોડ છે.

મુંબઈ અમીરોનું રાજધાની, સેલ્ફ-મેડ એન્ટરપ્રિન્યોર્સ વધી રહ્યા છે

યાદીમાં સામેલ સૌથી વધુ અમીરો મુંબઈ (465) માં વસે છે, ત્યારબાદ નવી દિલ્હી (236) અને બેંગલુરુ (129) નો નંબર આવે છે. એકલા મુંબઈમાં 93 ડૉલર-બિલિયોનેર્સ રહે છે. આ યાદીમાં રૅકોર્ડ 1,266 એવા ઉદ્યોગસાહસિકો (70%) છે જેમણે પોતાની મહેનતથી સિદ્ધિ મેળવી છે (Self-made). સૌથી નાની વયના ધનિક તરીકે 'જેપ્ટો' (Zepto) ના 23 વર્ષીય કૈવલ્ય વોહરા અને 24 વર્ષીય આદિત પાલિચા ટોચ પર છે.

વધુ વાંચો : બૂમાબૂમ કરતાં ગળું દબાવી હત્યા કરી, દુષ્કર્મ આચરી લાશ ઝાડીમાં ફેંકી, ગાંધીધામમાં મહિલાની લાશનો ભેદ ઉકેલાયો

મહિલા અમીરોમાં રોશની નાડર મોખરે

યાદીમાં 131 મહિલાઓ સ્થાન પામી છે, જેમાં 33 મહિલાઓ ડૉલર-બિલિયોનેર છે. HCL ના રોશની નાડર મલ્હોત્રા ₹2.79 લાખ કરોડની સંપત્તિ સાથે ભારતની સૌથી અમીર મહિલા તરીકે પાંચમા ક્રમે છે. જ્યારે 'એરિસ્ટા નેટવર્ક્સ' ની જયશ્રી ઉલ્લાલ ₹77,400 કરોડ સાથે સૌથી અમીર સેલ્ફ-મેડ મહિલા બની છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ