નેશનલ / WEFના સર્વેમાં ભારતની મજબૂત આર્થિક વૃદ્ધિની આશા, અર્થશાસ્ત્રીઓને આગામી વર્ષે ભારતની ગ્રોથ ખૂબ મજબૂત રહેવાની અપેક્ષા

વૈશ્વિક અર્થતંત્રમાં ભારે અનિશ્ચિતતાઓ અને ભૌગોલિક-રાજકીય તણાવ વચ્ચે ભારતીય અર્થતંત્ર વિશ્વ માટે એક આશાનું કિરણ બનીને ઊભરી આવ્યું છે. વર્લ્ડ ઈકોનોમિક ફોરમના તાજેતરના ‘ચીફ ઈકોનોમિસ્ટ્સ આઉટલુક’ સર્વે અનુસાર ભારત વિશ્વમાં સૌથી મજબૂત આર્થિક ગ્રોથ રેટ ધરાવતો દેશ બન્યો છે. આ સર્વેમાં સામે આવ્યું છે કે વૈશ્વિક અર્થશાસ્ત્રીઓ ભારતની આર્થિક સંભાવનાઓને લઈને અત્યંત આશાવાદી છે, જ્યારે ચીન અને યુરોપિયન દેશોનો આઉટલુક સતત નબળો પડી રહ્યો છે.

98% અર્થશાસ્ત્રીઓને ભારત પર અટૂટ વિશ્વાસ

WEF ના સપ્ટેમ્બર મહિનાના રિપોર્ટ અનુસાર, સર્વેમાં સામેલ 98% મુખ્ય અર્થશાસ્ત્રીઓને આશા છે કે આગામી 12 મહિનામાં ભારતનો ગ્રોથ રેટ સરેરાશ કે તેનાથી ઉત્કૃષ્ટ રહેશે. આ પૈકી 74% નિષ્ણાતોએ ભારતમાં ‘ખૂબ જ મજબૂત’ આર્થિક વિકાસની આગાહી કરી છે, જે May મહિનાના સર્વેમાં 52% હતી. WEF એ ખાસ નોંધ્યું છે કે તમામ વૈશ્વિક પ્રદેશોમાં ભારતનો ગ્રોથ આઉટલુક સૌથી મજબૂત છે, જેને દેશની સશક્ત સ્થાનિક માંગનો મોટો સપોર્ટ મળી રહ્યો છે. ઓગસ્ટ મહિનામાં નાણાકીય વર્ષ 2026-27 માટે ભારતનો GDP ગ્રોથ રેટ 6.7% રહેવાનો અંદાજ મૂકવામાં આવ્યો હતો.

ચીન અને યુરોપ પછાડ ખાતા નજરે પડ્યા

ભારતની સરખામણીએ એશિયાના બીજા મોટા દેશ ચીનની આર્થિક સ્થિતિ સતત વણસી રહી છે. સર્વે અનુસાર દર 3 માંથી 1 અર્થશાસ્ત્રીને ચીનમાં નબળા ગ્રોથ રેટની શંકા છે. બીજી તરફ, યુરોપ આ સર્વેમાં સૌથી નબળો પ્રદેશ સાબિત થયો છે, જ્યાં 61% અર્થશાસ્ત્રીઓ આર્થિક મંદી અથવા અત્યંત ધીમા વિકાસની આશંકા વ્યક્ત કરી રહ્યા છે. અમેરિકા અને મધ્ય એશિયા જેવા વિસ્તારોમાં સુધારા છતાં, WEF એ માત્ર ભારતને જ ‘સૌથી મજબૂત ઓવરઓલ ગ્રોથ આઉટલુક’ ધરાવતા ક્ષેત્ર તરીકે દર્શાવ્યું છે.

સ્થાનિક માંગે ભારતીય અર્થતંત્રને આપ્યો મજબૂત ટેકો

કાચા તેલની ઊંચી કિંમતો અને વૈશ્વિક તણાવ છતાં ભારતની આંતરિક માંગ એટલી સશક્ત છે કે તે બાહ્ય જોખમો સામે ઢાલ બનીને ઊભી છે. નાણાકીય વર્ષની April-June ક્વાર્ટરમાં ભારતનો GDP ગ્રોથ રેટ 7.8% નોંધાયો હતો, જે અપેક્ષા કરતાં ઘણો વધુ હતો. આ શાનદાર પ્રદર્શનને કારણે જ તમામ આંતરરાષ્ટ્રીય રેટિંગ એજન્સીઓએ ભારત માટે પોતાના વિકાસ દરના અનુમાનો વધારી દીધા છે.

વધુ વાંચો : બૂમાબૂમ કરતાં ગળું દબાવી હત્યા કરી, દુષ્કર્મ આચરી લાશ ઝાડીમાં ફેંકી, ગાંધીધામમાં મહિલાની લાશનો ભેદ ઉકેલાયો

મલ્ટીનેશનલ કંપનીઓ માટે આકર્ષણ અને પડકારો

જ્યાં એક તરફ ભારતીય ગ્રોથ આઉટલુક વિશ્વમાં નંબર 1 છે, ત્યાં બીજી તરફ અનુકૂળ કારોબારી વાતાવરણ (Business Environment) ના મામલે ભારતની રેન્કિંગમાં થોડો ફેરફાર જોવા મળ્યો છે. મલ્ટીનેશનલ કંપનીઓ માટે શ્રેષ્ઠ ડેસ્ટિનેશનની યાદીમાં ભારત બીજા ક્રમેથી ઘટીને ચોથા ક્રમે આવ્યું છે. છતાં પણ, 40% અર્થશાસ્ત્રીઓ હજુ પણ ભારતને રોકાણ માટે વિશ્વના ટોચના 3 દેશોમાં ગણે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ