લાલઆંખ / રાજકોટ રેન્જ હેઠળ આવતા પોલીસ મથકના ડી સ્ટાફમાં ફફડાટ, IG નિર્લિપ્ત રાય એક્શનમાં

રાજકોટ રેન્જ હેઠળના ગ્રામ્ય, દેવભૂમિ દ્વારકા, જામનગર અને સુરેન્દ્રનગર જિલ્લાના પોલીસ સ્ટેશનોમાં ફરજ બજાવતા D-સ્ટાફના કર્મચારીઓ અંગે રેન્જ IG નિર્લિપ્ત રાયે વિગતવાર માહિતી મંગાવી છે. આ રિપોર્ટમાં પોલીસ કર્મચારીની વ્યક્તિગત વિગતો સાથે તેમના સગા-સંબંધીઓ અંગેની માહિતી પણ સામેલ કરવાની સૂચના આપવામાં આવી હોવાનું સામે આવ્યું છે.

મળતી માહિતી મુજબ, D-સ્ટાફમાં ફરજ બજાવતા પોલીસ અધિકારી-કર્મચારીનું નામ, મૂળ વતન, હાલનું સરનામું, કેટલા સમયથી D-સ્ટાફમાં ફરજ બજાવે છે સહિતના મુદ્દાઓ અંગે વિગતો તૈયાર કરવામાં આવી રહી છે.

સગા-સંબંધીઓમાં ગુનાહિત રેકોર્ડ ધરાવનાર છે કે નહીં તેની પણ માહિતી

રિપોર્ટમાં પોલીસ કર્મચારીના કોઈ સગા-સંબંધીઓ ગુનેગાર, હિસ્ટ્રીશીટર કે બુટલેગર છે કે નહીં તે અંગે પણ સ્પષ્ટ માહિતી માગવામાં આવી છે. જો કોઈ વ્યક્તિ સામે આવો ગુનાહિત રેકોર્ડ હોય તો તેનું નામ અને પોલીસ કર્મચારી સાથેનો સંબંધ પણ દર્શાવવાનો રહેશે. આ માહિતીના આધારે D-સ્ટાફમાં ફરજ બજાવતા કર્મચારીઓની કામગીરી અને તેમની ભૂમિકા અંગે રેન્જ સ્તરે સમીક્ષા કરવામાં આવી શકે છે.

D-સ્ટાફ માટે 7 મુદ્દાની માહિતી તૈયાર કરાશે

પોલીસ વિભાગ પાસેથી માગવામાં આવેલી વિગતોમાં મુખ્યત્વે આ પ્રકારના મુદ્દાઓનો સમાવેશ થાય છે:

• પોલીસ કર્મચારીનું નામ અને હોદ્દો
• મૂળ વતન અને હાલનું સરનામું
• હાલ કયા પોલીસ સ્ટેશનના D-સ્ટાફમાં ફરજ બજાવે છે
• કેટલા સમયથી D-સ્ટાફમાં ફરજ બજાવે છે
• સગા-સંબંધીઓમાં કોઈ ગુનેગાર છે કે નહીં
• કોઈ સગા હિસ્ટ્રીશીટર અથવા બુટલેગર છે કે નહીં
• આવા વ્યક્તિનું નામ અને પોલીસ કર્મચારી સાથેનો સંબંધ

કામગીરીમાં ફેરફારની શક્યતા

ચારેય જિલ્લાના પોલીસ સ્ટેશનોમાંથી માહિતી એકત્ર થયા બાદ રેન્જ IG કક્ષાએ તેની સમીક્ષા કરવામાં આવશે. ત્યારબાદ D-સ્ટાફમાં ફરજ બજાવતા કર્મચારીઓની જવાબદારી, કામગીરી અને તૈનાતીમાં ફેરફાર અંગે નિર્ણય લેવાઈ શકે છે.

સૂત્રોના જણાવ્યા મુજબ, D-સ્ટાફની કામગીરીને વધુ જવાબદારીપૂર્વક અને પારદર્શક બનાવવા માટે આગામી દિવસોમાં નવી સૂચનાઓ આપવામાં આવે તેવી શક્યતા છે. ખાસ કરીને ગુનાહિત પ્રવૃત્તિઓ સામે કાર્યવાહી કરતી ટીમમાં પોલીસ કર્મચારીઓની ભૂમિકા અને તેમની કામગીરી પર વધુ ધ્યાન કેન્દ્રિત કરવામાં આવી શકે છે.

કાયદા વિરુદ્ધ કામગીરી સામે કડક વલણ

રાજકોટ રેન્જના IG નિર્લિપ્ત રાય દ્વારા પોલીસ કર્મચારીઓની કામગીરીમાં કાયદાકીય બાંધછોડ ન થાય તે અંગે કડક વલણ અપનાવવામાં આવ્યું છે. પોલીસ કર્મચારીની કામગીરી સામે ગંભીર બાબત સામે આવે ત્યારે વિભાગીય કાર્યવાહી સહિતના પગલાં લેવામાં આવ્યા હોવાના બનાવો પણ અગાઉ સામે આવ્યા છે.

આ પણ વાંચોઃ ક્યારેક કેમ્પસમાં ગાંજાના છોડ મળ્યા તો ક્યારેક વિદેશી વિદ્યાર્થિનીઓ સામે દેહ વેપારનો આરોપ લાગ્યો, 2019થી મારવાડી યુનિવર્સિટી સતત વિવાદમાં

હવે D-સ્ટાફના કર્મચારીઓ અને તેમના સંબંધિત લોકો અંગેનો આ વિગતવાર રિપોર્ટ તૈયાર કરાવવાના નિર્ણયને કારણે પોલીસ વિભાગમાં પણ ચર્ચા શરૂ થઈ છે. આ રિપોર્ટના આધારે D-સ્ટાફની કામગીરી અને જવાબદારીમાં આગામી દિવસોમાં મહત્વના ફેરફાર થાય છે કે નહીં તેના પર સૌની નજર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ