ગુજરાત / હર્ષ સંઘવીનો આડકતરો ઈશારો, 2030 સુધી ભૂપેન્દ્ર પટેલ મુખ્યમંત્રી રહેશે, કહ્યું 2030માં...

વડોદરા: ગુજરાતમાં રમતગમતને પ્રોત્સાહન આપવા અને રાજ્યના યુવા ખેલાડીઓને પોતાની પ્રતિભા દર્શાવવા માટેના વિશાળ મંચ સમાન ખેલ મહાકુંભ-2026નો વડોદરામાં ભવ્ય પ્રારંભ થયો છે. શહેરના સમા સ્પોર્ટ્સ કોમ્પ્લેક્સ ખાતે આયોજિત ઉદ્ઘાટન સમારોહમાં મુખ્યમંત્રી ભૂપેન્દ્ર પટેલની ઉપસ્થિતિમાં આ રમતોત્સવની શરૂઆત કરવામાં આવી હતી.

આ વર્ષે ખેલ મહાકુંભમાં આશરે 39 વિવિધ રમતોનો સમાવેશ કરવામાં આવ્યો છે. ખેલાડીઓને તેમની રમતગમતની પ્રતિભા દર્શાવવા અને રાજ્ય તથા રાષ્ટ્રીય સ્તરે આગળ વધવાની તક મળે તે હેતુથી વિવિધ સ્પર્ધાઓનું આયોજન કરવામાં આવ્યું છે. આ ઉપરાંત, દિવ્યાંગ ખેલાડીઓ માટે પણ અલગથી ખેલ મહાકુંભનું આયોજન કરવામાં આવ્યું છે, જે રમતગમત ક્ષેત્રે સર્વસમાવેશક અભિગમને પ્રોત્સાહન આપશે.

76 લાખથી વધુ ખેલાડીઓનું રજિસ્ટ્રેશન

ખેલ મહાકુંભને લઈને રાજ્યભરમાં ખેલાડીઓમાં ભારે ઉત્સાહ જોવા મળી રહ્યો છે. પ્રાપ્ત માહિતી અનુસાર, અત્યાર સુધીમાં 76 લાખ 2 હજારથી વધુ ખેલાડીઓએ રજિસ્ટ્રેશન કરાવ્યું છે. આ વિશાળ ભાગીદારી રાજ્યમાં રમતગમત પ્રત્યે વધતા રસ અને ખેલાડીઓને મળતા પ્રોત્સાહનને દર્શાવે છે.

ગુજરાતમાં કોમનવેલ્થ ગેમ્સ યોજવાનો લક્ષ્યાંક: હર્ષ સંઘવી

ખેલ મહાકુંભના ઉદ્ઘાટન પ્રસંગે નાયબ મુખ્યમંત્રી હર્ષ સંઘવીએ ખેલાડીઓને પ્રોત્સાહિત કરતાં જણાવ્યું હતું કે, મુખ્યમંત્રી ભૂપેન્દ્ર પટેલના નેતૃત્વમાં ગુજરાતમાં કોમનવેલ્થ ગેમ્સનું આયોજન કરવામાં આવશે. તેમણે વિશ્વાસ વ્યક્ત કર્યો હતો કે ભવિષ્યમાં યોજાનારી કોમનવેલ્થ ગેમ્સમાં ગુજરાતના ખેલાડીઓ શ્રેષ્ઠ પ્રદર્શન કરીને મેડલ જીતશે.

હર્ષ સંઘવીએ વધુમાં જણાવ્યું હતું કે, ગુજરાતના બે ખેલાડીઓએ ભારતને મેડલ અપાવીને રાજ્યનું ગૌરવ વધાર્યું છે. ખેલાડીઓની ક્ષમતા અને શક્તિ વધુ ખીલે તથા તેમને આગળ વધવાની પૂરતી તક મળે તે માટે રાજ્ય સરકાર સતત પ્રયાસો કરી રહી છે.

રમતગમત ક્ષેત્રે નવી તકોનું સર્જન

ખેલ મહાકુંભ માત્ર રમતગમતની સ્પર્ધા પૂરતો મર્યાદિત ન રહેતાં યુવા પ્રતિભાઓને ઓળખવા, તેમની ક્ષમતાને વિકસાવવા અને ભવિષ્યના પ્રતિભાશાળી ખેલાડીઓ તૈયાર કરવા માટેનું મહત્વપૂર્ણ માધ્યમ બની રહ્યો છે. 39 જેટલી રમતો અને દિવ્યાંગ ખેલાડીઓ માટેની અલગ વ્યવસ્થાના માધ્યમથી વધુમાં વધુ ખેલાડીઓને રમતગમત સાથે જોડવાનો પ્રયાસ કરવામાં આવ્યો છે.

આ પણ વાંચોઃ કિર્તીદાન ગઢવીના 'પરંપરા' નવરાત્રીના ડોમનો ભાગ ધરાશાયી, 2 શ્રમિકો ઘાયલ

ગુજરાતમાં કોમનવેલ્થ ગેમ્સ યોજવાના લક્ષ્યાંક અને ખેલાડીઓને આંતરરાષ્ટ્રીય સ્તરે મેડલ જીતવા માટે તૈયાર કરવાના સરકારના અભિગમ વચ્ચે ખેલ મહાકુંભ-2026 રાજ્યના રમતગમત ક્ષેત્ર માટે મહત્વપૂર્ણ પહેલ બની રહેશે તેવી આશા વ્યક્ત કરવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ