નેશનલ / દિલ્હીમાં ચુસ્ત નાકાબંધી: CEC ના રાજીનામાંની માંગ સાથે વિરોધ પ્રદર્શનની ચેતવણી, 20 સ્થળોએ અભેદ્ય કિલ્લેબંધી

મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગને લઈને સીજેપી (CJP) નામના સંગઠન દ્વારા શનિવારે વિરોધ પ્રદર્શન કરવાની કડક ચેતવણી આપવામાં આવી છે. મંજૂરી ન મળી હોવા છતાં પ્રદર્શનકારીઓ દિલ્હી તરફ કૂચ કરવા પર અડગ રહેતા દિલ્હી પોલીસ દ્વારા અભૂતપૂર્વ સુરક્ષા બંદોબસ્ત કરવામાં આવ્યો છે. આખી નવી દિલ્હીને સીલ કરીને કિલ્લેબંધી કરી દેવામાં આવી છે. સમગ્ર વિસ્તારમાં 20 મુખ્ય પોઈન્ટ પર કડક નાકાબંધી કરવામાં આવી છે જેથી બહારથી આવતા પ્રદર્શનકારીઓ નવી દિલ્હીમાં પ્રવેશ ન કરી શકે.

નવી દિલ્હીના જોઈન્ટ કમિશનર નૂપુર પ્રસાદે સ્પષ્ટ કર્યું છે કે જંતર-મંતર પર વિરોધ પ્રદર્શન માટે કોઈ પરવાનગી આપવામાં આવી નથી. સમગ્ર વિસ્તારમાં BNSS ની કલમ 163 (અગાઉની CrPC કલમ 144) લાગુ કરવામાં આવી છે, જે હેઠળ 5 કે તેથી વધુ લોકોના એકઠા થવા પર સંપૂર્ણ પ્રતિબંધ છે. જો કોઈ આ નિયમનો ભંગ કરશે તો તેમની સામે સખત કાનૂની કાર્યવાહી કરવામાં આવશે.

પ્રદર્શનકારીઓને કસ્ટડીમાં લેવા માટે 15 જિલ્લાઓમાં અસ્થાયી જેલો બનાવાઈ

દિલ્હી પોલીસ કમિશનર અનુરાગ કુમારે તમામ વરિષ્ઠ અધિકારીઓ સાથે બેઠક કરીને નિર્દેશ આપ્યા છે કે પ્રદર્શન માટે આવતા લોકોને તાત્કાલિક કસ્ટડીમાં લેવામાં આવે. આ માટે દિલ્હીના તમામ 15 જિલ્લાઓમાં એક-એક અસ્થાયી કસ્ટડી સેન્ટર (કાચો જેલ) બનાવવામાં આવ્યા છે. સ્થાનિક પોલીસને પોતપોતાના ક્ષેત્રમાં જ પ્રદર્શનકારીઓની અટકાયત કરવાનો આદેશ અપાયો છે.

પોલીસે સ્પષ્ટતા કરી છે કે સંગઠનના સહ-સંયોજક સૌરવ દાસે 7 ઓક્ટોબરના રોજ પ્રદર્શન માટે પત્ર આપ્યો હતો, પરંતુ નિયમ મુજબ કોઈપણ પ્રદર્શન માટે 10 દિવસ પહેલાં લેખિત જાણ કરવી અનિવાર્ય હોય છે. અગાઉના પ્રદર્શનો દરમિયાન લેખિત બાંહેધરીનો ભંગ થયો હોવાથી અને જાહેર સુરક્ષા તથા વાહનવ્યવહારની વ્યવસ્થા જાળવવા માટે આ મંજૂરી નકારવામાં આવી છે.

300 કંપનીઓ અને 15,000 અર્ધસૈનિક દળોના જવાનોનો મોરચો

ગુપ્તચર એજન્સીઓના ઇનપુટ્સના આધારે દિલ્હી પોલીસની મદદ માટે કેન્દ્રીય અર્ધસૈનિક દળો (CAPF) ની આશરે 300 કંપનીઓ (આશરે 21,000 જવાનો) ફાળવવામાં આવી છે. તેમાંથી 200 કંપનીઓ નવી દિલ્હીમાં અને 100 કંપનીઓ દિલ્હીના અન્ય વિસ્તારોમાં તૈનાત રહેશે. આ ઉપરાંત દિલ્હી પોલીસના 15,000 જવાનો પણ સુરક્ષામાં તૈનાત રહેશે. ગાઝીપુર, સિંઘુ, ટિકરી, ચિલ્લા અને બદરપુર સહિત દિલ્હીની તમામ સરહદો પર કોંક્રીટના બેરિકેડ્સ મૂકીને દરેક વાહનની સઘન તપાસ શરૂ કરી દેવામાં આવી છે. દિલ્હીના 20 નાકાબંધી પોઈન્ટ પર કુલ 37 વિવિધ પોલીસ યુનિટો તૈનાત કરવામાં આવી છે જેથી ટીમો વચ્ચે સારું તાલમેલ જળવાઈ રહે.

મુખ્ય નાકાબંધીના સ્થળો

રણજીત સિંહ ફ્લાયઓવર, ચૂંટણી પંચ ઓફિસ, જિમખાના પોસ્ટ ઓફિસ સફદરજંગ રોડ, સુનહરી મસ્જિદ ગોળ ચક્કર, સંસદ માર્ગ પોલીસ સ્ટેશન, બૂટા સિંહ ગોળ ચક્કર, કર્તવ્ય પથ-માનસિંહ રોડ ક્રોસિંગ, જનપથ-ટોલ્સટોય ક્રોસિંગ, જય સિંહ રોડ, ગોલ ડાકખાના ગોળ ચક્કર, કેજી માર્ગ-ફિરોઝશાહ ક્રોસિંગ, મેજર ધ્યાનચંદ સ્ટેડિયમ, ટ્રાન્સપોર્ટ ભવન, 11 મુર્તિ, વિજય ચોક, હોટેલ ક્લેરિજ ગોળ ચક્કર, સેન્ટ્રલ પાર્ક અને સી-હેક્ઝાગોન પિંક બૂથ.

વધુ વાંચો : રાહુલ ગાંધીના વિરોધ વચ્ચે કનોટ પ્લેસમાં કિલ્લેબંધી, અર્ધલશ્કરી દળોની 300 કંપની તૈનાત; રસ્તાઓ બંધ

સુરક્ષા વ્યવસ્થાનો મોટો તફાવત

ગત 20 July ના પ્રદર્શનમાં 7,000 જવાનો તૈનાત હતા અને સુરક્ષા માત્ર જંતર-મંતર આસપાસ સીમિત હતી. જ્યારે આ વખતે 10 October ના પ્રદર્શનને ધ્યાનમાં રાખીને સમગ્ર દિલ્હીમાં કલમ 163 લાગુ કરાઈ છે, સીસીટીવી (CCTV), ડ્રોન કેમેરા અને બોડી બોર્ન કેમેરાથી મોનિટરિંગ કરાઈ રહ્યું છે અને નવી દિલ્હીમાં સુરક્ષાકર્મીઓને લાઠી કે હથિયાર વગર શાંતિપૂર્ણ પરંતુ કડક રીતે બંદોબસ્ત જાળવવાના આદેશ અપાયા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ