નવસારી / નવરાત્રી પહેલાં બોગસ ગરબા પાસ વેચતી ગેંગ સક્રિય, સાયબર ક્રાઇમ સેલનું પેટ્રોલિંગ તેજ

નવરાત્રી નજીક આવતાં જ ખેલૈયાઓ મનપસંદ ગરબા ગ્રાઉન્ડના પાસ મેળવવા પડાપડી કરી રહ્યા છે. મોટાભાગના મોટા આયોજનો માટે ઓનલાઇન ટિકિટિંગ અને પાસ બુકિંગ શરૂ કરી દેવાયું છે. પરંતુ આ જ તકનો લાભ ઉઠાવી સાયબર ગઠિયાઓ સસ્તા કે ડિસ્કાઉન્ટ પાસની લાલચ આપી નકલી લિંક્સ દ્વારા ખેલૈયાઓના બેંક ખાતા ખાલી ન કરી દે, તે માટે જિલ્લા સાયબર ક્રાઇમ સેલે સોશિયલ મીડિયા મોનિટરિંગ અને સાયબર પેટ્રોલિંગ તેજ કર્યું છે.

સાયબર છેતરપિંડી અને નકલી પાસના કૌભાંડોથી બચવા માટે ગરબા આયોજકોએ પણ કમર કસી છે. ઘણા આયોજકો ઓનલાઇન બુકિંગ માત્ર વેરિફાઇડ પ્લેટફોર્મ પર જ સીમિત રાખી રહ્યા છે. સાથે જ અનેક મોટા આયોજકોએ સાયબર ફ્રોડ અને ડુપ્લિકેટ પાસના જોખમથી બચવા આજે પણ ફિઝિકલ પાસને જ પ્રાથમિકતા આપી છે. આ પાસમાં ખાસ હોલોગ્રામ, બારકોડ અને યુનિક કલર કોડિંગ જેવા સુરક્ષાત્મક ફિચર્સ ઉમેરવામાં આવ્યા છે, જેથી કોઈ ડુપ્લિકેટ પાસ બનાવી ગેટ પરથી પ્રવેશી ન શકે.

આ પણ વાંચોઃ અમદાવાદીઓ ગરમી સહન કરવા તૈયાર રહેજો, ચોમાસાની વિદાય બાદ પણ ગરમીનો પ્રકોપ યથાવત

નવરાત્રી એ આસ્થા અને ઉમંગનો તહેવાર છે, પરંતુ નાનકડી બેદરકારી ખેલૈયાઓનો આ તહેવાર બગાડી શકે છે. તંત્ર અને આયોજકો પોતાની રીતે સુરક્ષાના તમામ પગલાં લઈ રહ્યા છે, પરંતુ સૌથી મહત્વની છે ખેલૈયાઓની પોતાની સતર્કતા. અજાણ્યા વ્યક્તિ કે અનઅધિકૃત લિંક પરથી પાસ ખરીદવાનું ટાળો અને કોઈપણ શંકાસ્પદ ગતિવિધિ જણાય તો તુરંત સાયબર હેલ્પલાઇન 1930 પર સંપર્ક કરો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ