ગુજરાત / અમદાવાદ RTOમાં ટેકનિકલ ખામીથી ડ્રાઈવિંગ ટેસ્ટ અટવાયા, અરજદારોને ધક્કા

ડ્રાઇવિંગ લાઇસન્સ મેળવવા માટે અગાઉથી ઓનલાઇન એપોઇન્ટમેન્ટ લઈને ટેસ્ટ ટ્રેક પર પહોંચતા અરજદારોને છેલ્લી ઘડીએ ટેસ્ટ આપ્યા વિના પાછા ફરવું પડે તો તેમની મુશ્કેલી વધી જાય છે. અમદાવાદમાં પણ આવું જ બની રહ્યું છે. છેલ્લા એક વર્ષથી આરટીઓમાં સોફ્ટવેરની ખામીથી લોકો હેરાન-પરેશાન છે. અમદાવાદ સહિત રાજ્યભરની આરટીઓમાં ઉપયોગમાં લેવાતા સેન્ટ્રલાઇઝ્ડ ડ્રાઇવિંગ ટેસ્ટ સોફ્ટવેરમાં ટેકનિકલ ખામી સર્જાતાં ગુરુવાર બપોરથી શુક્રવાર સુધી ટેસ્ટની પ્રક્રિયા ખોરવાઈ હતી. તેની અસર અમદાવાદ સહિત રાજ્યની આરટીઓ પર પડવા વચ્ચે અરજદારોને ફરી ટેસ્ટ માટે તારીખ મેળવવાની નોબત આવી હતી.

ગુરુવારે બપોર બાદ સોફ્ટવેર અચાનક બંધ થઈ જતાં ડ્રાઇવિંગ ટેસ્ટની કામગીરી પ્રભાવિત થઈ હતી. શુક્રવારે પણ સમસ્યા યથાવત્ રહેતાં નિર્ધારિત ટેસ્ટ લઈ શકાયા નહોતા. ઓનલાઇન એપોઇન્ટમેન્ટના આધારે ટેસ્ટ આપવા પહોંચેલા અરજદારોને નવી તારીખ માટે રાહ જોવી પડી હતી. સોફ્ટવેરની ખામીના કારણે એક જ રાજ્યસ્તરીય સિસ્ટમ પર નિર્ભર ટેસ્ટ વ્યવસ્થાની મર્યાદા પણ સામે આવી હતી.

રજા લઈને આવેલા અરજદારોને ફરી સમય કાઢવાની મુશ્કેલી

ડ્રાઇવિંગ ટેસ્ટ માટે નોકરી કે વ્યવસાયમાંથી રજા રાખીને આવતા અરજદારો માટે આ સ્થિતિ વધુ મુશ્કેલ બની હતી. ખાસ કરીને નોકરી કરતા લોકો માટે ફરીથી રજા મેળવવી અને નિર્ધારિત સમયે આરટીઓ પહોંચવું વધારાનો પડકાર બની શકે છે. દૂરના વિસ્તારોમાંથી આવતા અરજદારોને પણ કામ થયા વિના પરત ફરવું પડે તો સમય અને મુસાફરીનો ખર્ચ બંને વધે છે.

આ પણ વાંચો : દક્ષિણ ગુજરાતમાં 15 વર્ષ પછી સર્જાયું ગંભીર વીજ સંકટ, ઉદ્યોગો પર મોટી અસર થવાની ભીતિ

એક જ સોફ્ટવેર પર નિર્ભરતા સામે પ્રશ્ન

આરટીઓમાં ડ્રાઇવિંગ ટેસ્ટની કામગીરી સેન્ટ્રલાઇઝ્ડ સોફ્ટવેરથી ચાલતી હોવાથી એક ટેકનિકલ ખામીની અસર અનેક સ્થળે એકસાથે પડે છે. આવી સ્થિતિમાં અરજદારોને સમયસર જાણ કરવા, નવી તારીખની સ્પષ્ટતા અને બાકી રહેલા ટેસ્ટ ઝડપથી પૂર્ણ કરવા લોકો રજૂઆત કરી રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ