અમદાવાદ / ગરબાની ઘેલછામાં ઘરેથી નીકળી ગઈ 15 વર્ષની કિશોરી, રસ્તો ભૂલતાં મધરાતે રઝળી

આનંદનગર વિસ્તારમાં રહેતી ૧૫ વર્ષની કિશોરીને માતા-પિતાએ એકલી ગરબા રમવા જવાની ના પાડતાં તે ચૂપચાપ ઘરેથી નીકળી ગઈ હતી. તેની સાથે કોઈ મિત્ર કે અન્ય કોઈ વ્યક્તિ પણ નહોતી. જોકે, ગરબાના તાલે ઝૂમવાની તેની ઘેલછા એટલી પ્રબળ હતી કે તે માતા-પિતાની ના છતાં ઘરેથી નીકળી પડી. પરંતુ તેનો આ ઉત્સાહ મધરાતે ભયાનક અનુભવમાં ફેરવાઈ ગયો, જ્યારે તે રસ્તો ભૂલી ગઈ.

એસજી હાઈવે પર વાયએમસીએ ક્લબ નજીક અટવાઈ પડેલી આ કિશોરી રડતી હતી અને ઘરે પાછા જવા માટે તલપાપડ બની હતી. મોડી રાતે આશરે ૧.૪૫ વાગ્યે આ વિસ્તારમાં પેટ્રોલિંગ કરી રહેલી શી ટીમની નજર તેના પર પડી હતી.

શી ટીમના એક સભ્યએ જણાવ્યું કે અમને કિશોરી રસ્તાની બાજુમાં બેઠેલી અને રડતી મળી હતી. તેની પાસે મોબાઈલ ફોન નહોતો. તેણે અમને જણાવ્યું કે તે ઘરે પાછા જવા માગે છે, પરંતુ રસ્તો ભૂલી ગઈ છે. અમે તેનાં માતા-પિતાનો સંપર્ક કર્યો અને તેને તેમની સાથે પુનઃમિલન કરાવ્યું.

નાયબ પોલીસ અધિક્ષક હિમાલા જોશીએ જણાવ્યું છે કે કિશોરીને રાત્રિના સમયે માતા-પિતાને જાણ કર્યા વિના એકલી બહાર ન નીકળવા અંગે સમજાવવામાં આવી હતી.

રસ્તો ભૂલાયેલી યુવતીને પણ મદદ મળી

ગરબા રમ્યા બાદ ઘરે પરત ફરતી એક યુવતી પણ રસ્તો ભૂલી જતાં મુશ્કેલીમાં મુકાઈ હતી. પોલીસે તેને સુરક્ષિત રીતે ઘરે પહોંચાડી હતી. શહેર આખી રાત ગરબાના રંગે રંગાતું હોય ત્યારે શી ટીમ પડદા પાછળ રહીને મહિલાઓ, કિશોરીઓ અને બાળકો સુરક્ષિત રીતે ઘરે પરત ફરે તે સુનિશ્ચિત કરવા સતત કામગીરી કરી રહી છે.

છ બાળકોને પણ પરિવાર સાથે મેળવ્યાં

વિવિધ ગરબા સ્થળોએ માતા-પિતાથી વિખૂટાં પડી ગયેલાં છ બાળકોને શોધવામાં પણ શી ટીમે મદદ કરી હતી. પોલીસે આ બાળકોને શોધી કાઢીને તેમનાં પરિવારજનો સાથે પુનઃમિલન કરાવ્યું હતું.

નાયબ પોલીસ અધિક્ષક હિમાલા જોશીએ વાલીઓને સંદેશ આપતાં જણાવ્યું છે કે, બાળકોએ માતા-પિતાના મોબાઈલ નંબર યાદ રાખવા જોઈએ અથવા સંપર્ક નંબર લખેલી નાની ચિઠ્ઠી પોતાનાં ખિસ્સાંમાં રાખવી જોઈએ. બાળક ગુમ થઈ જાય ત્યારે તેના પરિવાર સુધી ઝડપથી પહોંચવામાં આ માહિતી મદદરૂપ થઈ શકે છે.

છેલ્લાં પાંચ દિવસમાં બોડી-વોર્ન કેમેરાથી સજ્જ ૪૯ શી ટીમોએ ગરબાનાં ૮૬ મોટાં સ્થળો તથા ૩૫૭ નાનાં ગરબા અને શેરી ગરબામાં તપાસ હાથ ધરી હતી.

મહિલા પોલીસકર્મીઓ સાદાં કપડાંમાં રહીને મહિલાઓની છેડતી કરતા શખ્સો, શંકાસ્પદ મુલાકાતીઓ તથા ગરબા રમતી મહિલાઓ અને યુવતીઓના ગુપ્ત રીતે વીડિયો ઉતારતા લોકો પર નજર રાખી રહી હતી.

પોલીસ સૂત્રોના જણાવ્યા અનુસાર, દરેક મોટા ગરબા સ્થળે દરરોજ રાતે સરેરાશ પાંચ શંકાસ્પદ વ્યક્તિઓની શી ટીમ દ્વારા તપાસ કરવામાં આવતી હતી. તેમના મોબાઈલ ફોન પણ તપાસવામાં આવતા હતા. શંકાસ્પદ વર્તન કરતા જણાયેલા લોકોને ગરબા સ્થળેથી દૂર કરવામાં આવતા હતા.

વધુ વાંચો : ગરબાની રમઝટ વચ્ચે હવનાષ્ટમીની ભક્તિનો રંગ ચઢશે, આઠમના નૈવેદ્યમાં પ્રસાદ નહીં, પેઢીઓની શ્રદ્ધા

સાબરમતી રેલવે સ્ટેશન પરથી બે સગીરાને બચાવાઈ

બીજી એક ઘટનામાં, ૧૫ અને ૧૨ વર્ષની બે સગીરા ઘરેથી શાળાએ જવાનું કહીને નીકળી હતી, પરંતુ બાદમાં તેઓ સાબરમતી રેલવે સ્ટેશન પરથી મળી આવી હતી. પશ્ચિમ રેલવેની અમદાવાદ લોકલ ક્રાઈમ બ્રાંચે સાબરમતી રેલવે પોલીસની મદદથી બંને સગીરાને શોધી કાઢી હતી. પોલીસ ઈન્સ્પેક્ટર જે. આર. દેસાઈનાં માર્ગદર્શન હેઠળ લોકલ ક્રાઈમ બ્રાંચે બાતમીદારો પાસેથી મળેલી માહિતી અને ટેક્નિકલ સાધનોની મદદથી તેમની ભાળ મેળવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ