ગાંધીનગર / ગુજરાતમાં પોલીસ વાહનો સામે સ્પેશિયલ ડ્રાઈવ, બ્લેક ફિલ્મ અને નંબર પ્લેટની તપાસ

પોલીસની કાર હવે પોલીસથી જ નહીં બચી શકે. આજથી રાજ્યમાં પોલીસકર્મીનાં વાહનની જ ખાસ ચકાસણી શરૂ થઇ ગઈ છે. કાર પર પોલીસ લખેલું હોય, કાચ પર બ્લેક ફિલ્મ હોય કે નંબર પ્લેટ જ ગાયબ હોય તો સીધી કાર્યવાહી હાથ ધરવામાં આવી રહી છે. જે પોલીસ વિભાગ સામાન્ય નાગરિકોને ટ્રાફિકના નિયમોના ભંગ બદલ મેમો આપી રહ્યો હતો એ જ વિભાગ હવે ટ્રાફિકના નિયમોના પાલનના દાયરામાં આવી ગયો છે.

પોલીસકર્મી અને અધિકારીનાં વાહન સામે સ્પેશિયલ ડ્રાઈવ શરૂ

આજથી રાજ્યમાં પોલીસકર્મી અને અધિકારીનાં વાહન સામે સ્પેશિયલ ડ્રાઈવ શરૂ થઈ છે. પાંચમી ઓક્ટોબર સુધી ચાલનારી આ કાર્યવાહી દરમિયાન 'પોલીસ'ના લોગો કે લખાણવાળી કાર,કાળા કાચ/બ્લેક ફિલ્મ અને નંબર પ્લેટ વગરનાં વાહનો સામે ખાસ તપાસ કરવામાં આવી રહી છે. પોલીસ વિભાગ સાથે સંકળાયેલું વાહન હોવાના કારણે ટ્રાફિકના નિયમોમાં કોઈ છૂટ નહીં મળે.

પીઆઈને જ કાળા કાચ અને નંબર પ્લેટ વગરની કાર સાથે ઝડપાયા

ગાંધીનગરમાં તાજેતરમાં લો એન્ડ ઓર્ડર આઇજીપીએ પાટનગરમાં ફરજ બજાવતા એક પીઆઈને જ કાળા કાચ અને નંબર પ્લેટ વગરની કાર સાથે ઝડપી પાડ્યા હતા. પોલીસ અધિકારીના વાહનમાં જ નિયમભંગ સામે આવતાં આ ઘટનાના પગલે હવે રાજ્યભરમાં પોલીસના વાહનોની નિયમિત ચકાસણીને લઈને સ્પેશિયલ ડ્રાઈવ હાથ ધરાઈ છે.

નંબર પ્લેટ વગરની કાર પણ સીધી રડાર પર

નંબર પ્લેટ ન હોય અથવા નિયમ મુજબની નંબર પ્લેટ ન લગાવેલી હોય તો આવાં વાહનો સામે કાર્યવાહી કરવામાં આવશે. તપાસ દરમિયાન પોલીસ વિભાગના કર્મચારીઓનાં વાહનો પણ સામાન્ય વાહનની જેમ જ નિયમોના દાયરામાં રહેશે.

આ પણ વાંચોઃ મણિનગરમાં નકલી PSI બની હોટલમાં રહેતો કિરીટ ઝડપાયો, બે બનાવટી પોલીસ આઈકાર્ડ અને ડેપ્યુટી મામલતદારનું કાર્ડ મળ્યું

પોલીસ લખવાથી કાયદો બદલાશે નહીં

ડ્રાઈવ દરમિયાન પોલીસકર્મીઓના ખાનગી વાહનોમાં પણ નિયમભંગ શોધવામાં આવશે. કાર પર પોલીસનું નામ, લોગો કે અન્ય ઓળખ દર્શાવતી નિશાની લગાવીને ટ્રાફિકના નિયમોમાંથી છૂટ મેળવી શકાશે નહીં. કાચ પર નિયમ વિરુદ્ધ ફિલ્મ હોય તો પણ કાર્યવાહી થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ