મનોરંજન / 72માં નેશનલ ફિલ્મ એવોર્ડને LIVE જોવા અહીં ક્લિક કરો, સંપૂર્ણ આયોજન ગુજરાતમાં

ગુજરાતના કેવડિયામાં આજે 72મા નેશનલ ફિલ્મ એવોર્ડ સમારોહનું ભવ્ય આયોજન કરવામાં આવ્યું છે. સ્ટેચ્યૂ ઓફ યુનિટી નજીક યોજાનારા આ કાર્યક્રમમાં રાષ્ટ્રપતિ દ્રૌપદી મુર્મુના હસ્તે દિગ્ગજ કલાકારોનું સન્માન થશે.દિલ્હીની બહાર પહેલીવાર યોજાઈ રહેલા આ ઐતિહાસિક સમારોહને તમે ઘરે બેઠા પણ LIVE જોઈ શકશો. જાણો ક્યારે, ક્યાં અને કેવી રીતે આ કાર્યક્રમનું લાઈવ પ્રસારણ નિહાળી શકાશે તેમજ કયા કલાકારોને મળશે દેશનો પ્રતિષ્ઠિત ફિલ્મ એવોર્ડ.

ગુજરાતમાં પ્રથમવાર યોજાશે નેશનલ ફિલ્મ એવોર્ડ સમારોહ

નેશનલ ફિલ્મ એવોર્ડની શરૂઆત વર્ષ 1954માં થઈ હતી. ત્યારથી અત્યાર સુધી આ સમારોહનું આયોજન દિલ્હીના વિજ્ઞાન ભવનમાં થતું આવ્યું છે. પરંતુ 72 વર્ષના ઇતિહાસમાં પહેલીવાર આ કાર્યક્રમ દિલ્હી બહાર યોજાઈ રહ્યો છે. આ વખતે ગુજરાતના કેવડિયા એટલે કે એકતા નગરમાં સ્ટેચ્યૂ ઓફ યુનિટી નજીક સમારોહનું આયોજન કરવામાં આવ્યું છે.

ક્યારે અને ક્યાં જોઈ શકશો LIVE?

72મા નેશનલ ફિલ્મ એવોર્ડ સમારોહનું આયોજન 22 સપ્ટેમ્બર 2026ના રોજ કરવામાં આવશે. બપોરે 3 વાગ્યાથી કાર્યક્રમની શરૂઆત થશે. આ સમારોહનું લાઈવ પ્રસારણ દૂરદર્શનના DD National ચેનલ પર નિહાળી શકાશે. રાષ્ટ્રપતિ દ્રૌપદી મુર્મુ વિજેતા કલાકારો અને ફિલ્મ જગત સાથે જોડાયેલી હસ્તીઓને સન્માનિત કરશે.

આ દિગ્ગજ કલાકારોને મળશે નેશનલ ફિલ્મ એવોર્ડ

આ વર્ષના નેશનલ ફિલ્મ એવોર્ડમાં અનેક દિગ્ગજ કલાકારોને સન્માનિત કરવામાં આવશે. ભારતીય સિનેમામાં દાયકાઓના યોગદાન બદલ અભિનેતા અનંત નાગને દાદાસાહેબ ફાળકે એવોર્ડથી નવાજવામાં આવશે. જ્યારે 'આર્ટિકલ 370' ફિલ્મમાં અભિનય બદલ યામી ગૌતમને શ્રેષ્ઠ અભિનેત્રી તરીકે પસંદ કરવામાં આવી છે.

અભિનેતા કાર્તિક આર્યનને 'ચંદુ ચેમ્પિયન' માટે શ્રેષ્ઠ અભિનેતાનો એવોર્ડ આપવામાં આવશે. દક્ષિણ ભારતીય સિનેમાના દિગ્ગજ અભિનેતા મમૂટીનું નામ પણ શ્રેષ્ઠ અભિનેતાના સન્માન માટે પસંદ કરવામાં આવ્યું છે. આ ઉપરાંત TV9ના વરિષ્ઠ પત્રકાર સંજીવ શ્રીવાસ્તવને શ્રેષ્ઠ ફિલ્મ ક્રિટિકનો નેશનલ એવોર્ડ આપવામાં આવશે. માહિતી અને પ્રસારણ મંત્રાલયે 18 જુલાઈ 2026ના રોજ નવી દિલ્હીમાં એવોર્ડ વિજેતાઓની જાહેરાત કરી હતી.

આ પણ વાંચોઃ 45 વર્ષની એક્ટ્રેસ મન્નતો બાદ બની જોડિયા બાળકોની માતા, પૌત્ર-પૌત્રી માટે 10 વર્ષથી રાહ જોઈ રહેલા દાદા-દાદીની ઈચ્છા પૂરી

1954માં થઈ હતી નેશનલ ફિલ્મ એવોર્ડની શરૂઆત

નેશનલ ફિલ્મ એવોર્ડની શરૂઆત 1954માં થઈ હતી. તે સમયે આ પુરસ્કારને 'સ્ટેટ એવોર્ડ્સ ફોર ફિલ્મ્સ' નામથી ઓળખવામાં આવતો હતો. આ એવોર્ડમાં ફીચર ફિલ્મો, નોન-ફીચર ફિલ્મો અને સિનેમા પરના લેખનનો સમાવેશ થાય છે. વિજેતાઓને મેડલ, પ્રમાણપત્ર અને રોકડ પુરસ્કાર આપીને સન્માનિત કરવામાં આવે છે.

ફીચર ફિલ્મ કેટેગરીમાં સ્વર્ણ કમલ અને રજત કમલ મેળવનારને એવોર્ડની કેટેગરી પ્રમાણે 2થી 3 લાખ રૂપિયા સુધીની રકમ મળે છે. નોન-ફીચર ફિલ્મોમાં પણ સ્વર્ણ કમલ અથવા રજત કમલ સાથે રોકડ પુરસ્કાર આપવામાં આવે છે. સિનેમા પરના શ્રેષ્ઠ લેખન માટે સ્વર્ણ કમલ અને 1 લાખ રૂપિયાનું ઇનામ આપવામાં આવે છે.

દાદાસાહેબ ફાળકે એવોર્ડ ભારતીય સિનેમામાં આજીવન યોગદાન માટે આપવામાં આવે છે. આ સન્માન મેળવનારને સ્વર્ણ કમલ, શાલ અને 10 લાખ રૂપિયાની રોકડ રકમ આપવામાં આવે છે. આ વખતે ગુજરાતમાં યોજાનારા સમારોહમાં ભારતીય સિનેમાની અનેક જાણીતી હસ્તીઓ એક જ મંચ પર જોવા મળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ