સુરત / સાંસદ ગોવિંદ ધોળકિયાનો Deepfake વીડિયો બનાવી ઠગાઈનો પ્રયાસ! ‘Old Coin Company’ના નામે ફેક ID

સુરતના જાણીતા ઉદ્યોગપતિ અને રાજ્યસભાના સાંસદ ગોવિંદભાઈ ધોળકિયાની ઓળખનો દુરુપયોગ કરી સોશિયલ મીડિયા મારફતે છેતરપિંડી કરવાનો ગંભીર મામલો સામે આવ્યો છે. અજાણ્યા શખ્સોએ ગોવિંદભાઈ ધોળકિયાના જૂના ફોટોગ્રાફ્સ અને વીડિયોના આધારે કથિત ડીપફેક વીડિયો તૈયાર કરી લોકોને જૂના ચલણી સિક્કા મોંઘા ભાવે ખરીદવાની લાલચ આપવાનો પ્રયાસ કર્યો હોવાનું સામે આવ્યું છે.

સોશિયલ મીડિયા પર **'Old Coin Company'**ના નામે બનાવવામાં આવેલી વિવિધ ફેક પ્રોફાઇલ દ્વારા આ કથિત છેતરપિંડી ચલાવવામાં આવતી હતી. વીડિયોમાં ગોવિંદભાઈ ધોળકિયાનો ચહેરો અને અવાજ દર્શાવી "હું ગોવિંદભાઈ ધોળકિયા બોલું છું" એવો દાવો કરવામાં આવતો હતો. ત્યારબાદ રિઝર્વ બેંક ઓફ ઈન્ડિયા (RBI) વતી જૂના સિક્કાઓ ખરીદવાની ભ્રામક જાહેરાત કરી લોકોને સંપર્ક કરવા માટે પ્રેરિત કરવામાં આવતા હતા.

₹1,500 પ્રોસેસિંગ ચાર્જના નામે નાણાં પડાવવાનો પ્રયાસ

મળતી વિગતો પ્રમાણે, સિક્કા ખરીદવાની પ્રક્રિયા આગળ વધારવાના બહાને લોકોને ₹1,500 જેટલી પ્રોસેસિંગ ફી અથવા ચાર્જ ઓનલાઈન UPI મારફતે ચૂકવવા જણાવવામાં આવતું હતું. આ રીતે લોકો પાસેથી નાણાં મેળવી છેતરપિંડી કરવાનો પ્રયાસ કરવામાં આવતો હોવાનો આક્ષેપ છે.આ સમગ્ર મામલે કતારગામ સ્થિત SRK કંપનીના સંચાલક ગોવિંદભાઈ ધોળકિયાના પર્સનલ સેક્રેટરી ભાવેશ વાલજીભાઈ લાઠીયાએ સાયબર ક્રાઈમ પોલીસમાં ફરિયાદ નોંધાવી છે.

નિવૃત્ત DySPએ શંકાસ્પદ વીડિયોનું ક્રોસચેકિંગ કર્યું

આ મામલો SRK કંપનીના સિક્યુરિટી એન્ડ સર્વેલન્સ વિભાગના નિવૃત્ત DySP આર.જી. જાડેજાના ધ્યાને આવ્યો હતો. તેમણે સોશિયલ મીડિયા પર ફરતા વીડિયો અને તેમાં આપવામાં આવેલા સંપર્ક નંબરોની ચકાસણી કરવાનો નિર્ણય લીધો હતો.

તપાસ દરમિયાન વીડિયોમાં દર્શાવાયેલા નંબર પર સંપર્ક કરતાં સામેથી હિન્દીમાં વાત કરતી એક અજાણી વ્યક્તિએ પોતે ગોવિંદભાઈ ધોળકિયા હોવાનું જણાવ્યું હતું. તેણે રાજકોટથી ફોન કરતો હોવાનો દાવો કર્યો હતો અને પ્રક્રિયા માટે ચાર્જ ચૂકવવા જણાવ્યું હતું. જોકે, પેમેન્ટ અંગે વધુ વિગતો મેળવવાનો પ્રયાસ થતાં સામેવાળાએ અચાનક ફોન કાપી નાખ્યો હતો. આ ઘટનાથી સમગ્ર મામલો શંકાસ્પદ જણાતા કંપની તરફથી તપાસ કરવામાં આવી હતી અને અંતે પોલીસ ફરિયાદ નોંધાવવામાં આવી હતી.

ગોવિંદભાઈ ધોળકિયા કે SRK દ્વારા કોઈ સિક્કા ખરીદીની યોજના નથી

ફરિયાદમાં સ્પષ્ટ કરવામાં આવ્યું છે કે ગોવિંદભાઈ ધોળકિયા કે તેમની સંસ્થા SRK દ્વારા જૂના ચલણી સિક્કા ખરીદવા માટે આવી કોઈ યોજના કે પ્રવૃત્તિ હાથ ધરવામાં આવી નથી. તેમના નામ અને પ્રતિષ્ઠાનો ઉપયોગ કરી સોશિયલ મીડિયા પર ખોટી માહિતી ફેલાવી સામાન્ય લોકોને આર્થિક નુકસાન પહોંચાડવાનો પ્રયાસ થયો હોવાનું પોલીસ ફરિયાદમાં જણાવાયું છે.

સુરત સાયબર ક્રાઈમ પોલીસે સમગ્ર મામલે BNS તથા IT Actની વિવિધ કલમો હેઠળ ગુનો નોંધી તપાસ શરૂ કરી છે. ફેક સોશિયલ મીડિયા પ્રોફાઇલ, વીડિયો અને તેમાં ઉપયોગમાં લેવાયેલા મોબાઈલ નંબર તથા નાણાકીય વ્યવહારો અંગે તપાસ હાથ ધરવામાં આવી રહી છે.

View this post on Instagram

A post shared by Sambhaav Nascent LLP (@vtv_gujarati_news)

ડીપફેક શું છે?

ડીપફેક એવી ટેકનોલોજી છે જેમાં આર્ટિફિશિયલ ઈન્ટેલિજન્સ (AI) અને મશીન લર્નિંગનો ઉપયોગ કરીને કોઈ વ્યક્તિના ચહેરા, અવાજ અથવા બોલવાની રીતને કૃત્રિમ રીતે બદલીને નકલી વીડિયો કે ઓડિયો તૈયાર કરવામાં આવે છે. આધુનિક ટેકનોલોજીના કારણે આવા વીડિયો ઘણી વખત અસલી જેવા દેખાતા હોવાથી સામાન્ય વ્યક્તિ માટે તેની ઓળખ કરવી મુશ્કેલ બની શકે છે.

અજાણ્યા સોશિયલ મીડિયા સંદેશાઓથી સાવધાન રહેવા અપીલ

પોલીસે લોકોને ખાસ કરીને જાણીતી વ્યક્તિઓના નામ, ફોટો કે વીડિયોનો ઉપયોગ કરીને કરવામાં આવતી નાણાકીય ઓફરથી સાવચેત રહેવાની અપીલ કરી છે. સોશિયલ મીડિયા પર કોઈ વ્યક્તિ, કંપની કે સંસ્થાના નામે પ્રોસેસિંગ ફી, રજિસ્ટ્રેશન ચાર્જ અથવા અન્ય કોઈ રકમ UPI મારફતે માંગવામાં આવે તો તેની સત્તાવાર રીતે ચકાસણી કર્યા વિના પૈસા ટ્રાન્સફર ન કરવા સલાહ આપવામાં આવી છે.

આ પણ વાંચોઃ "મારા ભાઇ બહેનને ભણાવજો, એનું ભણવાનું ન બગાડતાં..." ખાનગી કોલેજની લેબ આસિસ્ટન્ટનો જીવન ટૂંકાવવાનો પ્રયાસ

આ ઉપરાંત શંકાસ્પદ વીડિયો, સોશિયલ મીડિયા પ્રોફાઇલ, મોબાઈલ નંબર અથવા નાણાકીય છેતરપિંડીની ઘટના સામે આવે તો તાત્કાલિક સાયબર ક્રાઈમ વિભાગને જાણ કરવા પોલીસ દ્વારા અપીલ કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ