દુઃખદ / આણંદના આંકલાવમાં ચીકુ તોડવા જતાં ઝટકા મશીનના તારના સંપર્કમાં કરન્ટ લાગ્યો, 11 વર્ષની બાળકીનું મોત

આણંદ જિલ્લાના આંકલાવ તાલુકામાં એક ચોંકાવનારી અને દુઃખદ ઘટના સામે આવી છે, જેમાં ફાર્મમાં લાગેલા વીજ કરંટના ઝટકાથી 11 વર્ષની બાળકીનું મોત થયું છે. આ બનાવે સમગ્ર વિસ્તારમાં શોકની લાગણી ફેલાવી દીધી છે.

માહિતી મુજબ બાળકી ચીકુ તોડવા માટે નજીકના એક ફાર્મમાં ગઈ હતી. તે દરમિયાન ફાર્મમાં પ્રાણીઓથી પાકનું રક્ષણ કરવા માટે લગાવવામાં આવેલા “ઝટકા મશીન”ના તારના સંપર્કમાં આવી જતાં તેને ભારે વીજ કરંટ લાગ્યો હતો. ઘટનાના પગલે બાળકી બેભાન થઈ ગઈ હતી અને તેને તાત્કાલિક સારવાર માટે હોસ્પિટલ ખસેડવામાં આવી હતી, પરંતુ તબીબોએ તેને મૃત જાહેર કરી હતી.

બાળકીના પરિવારજનોએ આ બનાવને લઈને ગંભીર આક્ષેપો કર્યા છે. તેમનો દાવો છે કે ફાર્મમાં ગેરકાયદેસર રીતે ડાયરેક્ટ વીજ કરંટ આપવામાં આવ્યો હતો, જે અત્યંત જોખમી છે અને માનવજીવન માટે ખતરનાક સાબિત થઈ શકે છે.

ઘટનાની જાણ થતાં જ સ્થાનિક પોલીસ તાત્કાલિક ઘટનાસ્થળે પહોંચી હતી અને સમગ્ર મામલે તપાસ હાથ ધરી છે. પોલીસએ પરિવારની ફરિયાદના આધારે ગુનો નોંધ્યો છે અને ઝટકા મશીન તથા વીજ જોડાણ અંગે તપાસ શરૂ કરી છે.

આ પણ વાંચોઃ જૂનાગઢમાં સ્થાનિક સ્વરાજ્ય ચૂંટણી પહેલાં AAPના નેતાનું રાજીનામું, કોંગ્રેસમાં જોડાયા

આ બનાવે ખેતીમાં ઉપયોગમાં લેવાતા વીજ ઉપકરણોની સલામતી અંગે ગંભીર પ્રશ્નો ઉભા કર્યા છે. સ્થાનિક લોકોમાં પણ આ ઘટનાને લઈને રોષ જોવા મળી રહ્યો છે અને જવાબદારો સામે કડક કાર્યવાહી કરવાની માંગ ઉઠી રહી છે. પોલીસે જણાવ્યું છે કે તપાસ પૂર્ણ થયા બાદ જવાબદાર વ્યક્તિઓ સામે કાયદેસરની કાર્યવાહી કરવામાં આવશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ