મનોરંજન / 50 ભાષા, 120 દેશ! રાજામૌલીની ‘વારાણસી’ મચાવશે વૈશ્વિક ધમાલ, AIને કહ્યું NO

ભારતીય સિનેમાના દિગ્ગજ અને વિશ્વપ્રસિદ્ધ નર્દેશક એસ.એસ. રાજામૌલી પોતાની આગામી મલ્ટીસ્ટેરર ફિલ્મ 'વારાણસી'ને લઈને ખૂબ જ ચર્ચામાં છે. મહેશ બાબુ, પ્રિયંકા ચોપરા જોનાસ અને પૃથ્વીરાજ સુકુમારન જેવા દિગ્ગજ કલાકારોથી સજ્જ આ ફિલ્મને રાજામૌલી એક કે બે નહીં, પરંતુ લગભગ 50 ભાષાઓમાં અને વિશ્વના 120થી વધુ દેશોમાં રિલીઝ કરવાની ભવ્ય તૈયારી કરી રહ્યા છે.

AI ટેકનોલોજીથી બનાવી દૂરી

આજના યુગમાં જ્યાં ઘણા ફિલ્મમેકર્સ ડબિંગ માટે AI (આર્ટિફિશિયલ ઈન્ટેલિજન્સ) ટેકનોલોજી તરફ વળી રહ્યા છે, ત્યાં રાજામૌલીએ સ્પષ્ટ કર્યું છે કે તેમની ફિલ્મમાં AI-જનરેટેડ કે નકલી અવાજોને સ્થાન મળશે નહીં. મિડ-ડેના રિપોર્ટ મુજબ, રાજામૌલીનું માનવું છે કે અવાજની પાછળ રહેલી વાસ્તવિક ભાવના, પાત્રનું વ્યક્તિત્વ અને કલાકારની અસલી એક્ટિંગ મશીન દ્વારા લાવી શકાતી નથી. અગાઉ ફિલ્મની ઝલકમાં AIના ઉપયોગની અફવાઓ ઉડી હતી, જેને તેમણે પોતાની કલાત્મક પ્રતિભાનું અપમાન ગણાવીને સંપૂર્ણપણે ફગાવી દીધી હતી.

1,500થી વધુ વોઈસ આર્ટિસ્ટ્સના સેમ્પલ

દરેક ભાષામાં પાત્રની ખરી ભાવનાઓ જળવાઈ રહે તે માટે રાજામૌલી અને તેમની ટીમ ખૂબ જ ઝીણવટભરી અને મુશ્કેલ પ્રક્રિયામાંથી પસાર થઈ રહી છે. 'વારાણસી'ના અલગ-અલગ ભાષાઓના ડબિંગ વર્ઝન માટે યોગ્ય અવાજો પસંદ કરતા પહેલાં 1,500થી વધુ રિયલ વોઈસ આર્ટિસ્ટ્સના વર્ક સેમ્પલ લેવામાં આવી રહ્યા છે. આટલા બધા સેમ્પલની ચકાસણી કર્યા બાદ જ નક્કી કરવામાં આવશે કે કઈ ભાષામાં કયો અવાજ પાત્ર સાથે યોગ્ય ન્યાય કરી શકશે.

વધુ વાંચો : રાજકોટના મેટોડા GIDCમાં 6 વર્ષની બાળકી સાથે દુષ્કર્મ, શખ્સે ઝાડી ઝાંખરામાં લઈ જઈને કર્યું કુકર્મ

'વારાણસી'ની ભવ્ય ગ્લોબલ રિલીઝ

આંતરરાષ્ટ્રીય સ્તરે રિલીઝના મામલે 'વારાણસી' ભારતીય સિનેમાના ઇતિહાસની સૌથી મોટી ફિલ્મોમાં સામેલ થવા જઈ રહી છે. શાહરુખ ખાનની 'પઠાણ' (2023) અને 'રામાયણ' (2026) પછી 'વારાણસી' એવી ભારતીય ફિલ્મ બનશે જે 120થી વધુ દેશોના થિયેટરોમાં દસ્તક દેશે. આ ફિલ્મ તેલુગુ, હિન્દી, તમિલ, મલયાલમ અને બંગાળી ઉપરાંત ફ્રેન્ચ, સ્પેનિશ, જર્મન, અરબી, જાપાનીઝ અને કોરિયન જેવી પ્રમુખ વિદેશી ભાષાઓમાં ડબ કરવામાં આવશે. આ બહુપ્રતિક્ષિત ફિલ્મ 7 એપ્રિલ 2027ના રોજ વિશ્વભરના સિનેમાઘરોમાં રિલીઝ થવા માટે તૈયાર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ