નિર્ણય / ખાંડયુકત પીણાની જાહેરખબર પર સિંગાપોરમાં પ્રતિબંધ મુકાયો

• વધુ ખાંડ ધરાવતા કોલ્ડ ડ્રીંક્સ અને જ્યૂસની જાહેરાત પર સિંગાપોરનો સંપુર્ણ પ્રતિબંધ
• મેક્સિકો અને બ્રિટનમાં વધુ ખાંડયુક્ત કે કેલરી ધરાવતી ચીજોની જાહેરાત પર છે પ્રતિબંધ
• લોકોના આરોગ્યને ધ્યાનમાં રાખીને સિંગાપોર સરકારે આ નિર્ણય લીધો

સિંગાપોરની સરકારે લોકો ખાણી પીણીમાં ખાંડનું પ્રમાણ ઓછું કરે તેવા આશયથી આ નિર્ણય લીધો છે. સિંગાપોરની સરકાર હવે વધુ પડતી ખાંડ ધરાવતા પીણાને કોઇપણ રીતે પ્રોત્સાહન આપવા માગતી નથી. દુનિયાભરમાં સૌથી વધુ ડાયાબિટિશના દર્દીઓ ધરાવતા દેશોમાં સિંગાપોરનો પણ સમાવેશ થાય છે.

લોકોના આરોગ્યને ધ્યાનમાં રાખીને સરકારે આ નિર્ણય કરવાની ફરજ પડી છે. જેના પગલે હવે ટીવી, અખબાર સહિત કોઇપણ માધ્યમમાં ખાંડયુકત પીણાની જાહેરખબર પ્રસારિત નહીં કરી શકાય. શહેરમાં બિલબોર્ડ કે અન્ય કોઇ રીતે પણ હવે જાહેરખબર મુકી નહીં શકાય. મેક્સિકો અને બ્રિટનમાં ખાસ કરીને બાળકોને દુર રાખવા વધુ ખાંડયુકત કે કેલેરી ધરાવતી ચીજોની જાહેરખબર પર પ્રતિબંધ છે. જોકે સિંગાપોર તેનાથી એક ડગલું આગળ વધ્યો છે. 

આવા પીણાની જાહેરખબર કોઇ ઓનલાઇન ચેનલ કે વેબસાઇટસમાં પણ નહીં કરી શકાય. સિંગાપોરની સરકાર હવે ખાંડયુકત પીણા બનાવતી કંપનીઓ અને તેની પ્રોડકટસ પર વધુ ટેકસ નાખવા પણ વિચારણા કરી રહી છે. 

આ ઉપરાંત ખાંડવાળા પીણાની બોટલ કે પેકમાં સ્પષ્ટ દેખાય તે રીતે ખાસ કલરમાં કેલેરી, ખાંડનું પ્રમાણ તેમજ ન્યુટ્રિશનની વિગતો દર્શાવવી પડશે. સિંગાપોરમાં બહાર ખાનારો એક મોટો વર્ગ છે. છેલ્લા કેટલાક વર્ષોમાં ખાનપાનની આદતોમાં આવેલા બદલાવના કારણે ડાયાબિટિશના દર્દીઓ પણ ઝડપથી વધી રહ્યા છે.