ટેક્નોલોજી / સાવધાન! જો-જો ક્યાંક તમારા ફોનમાં તો નથી ને નકલી WhatsApp? આ રીતે રહો સેફ

WhatsApp આજના સમયમાં મેસેજ મોકલવા, વીડિયો અને વૉઇસ કૉલ કરવા તેમજ ઓફિસનાં કામ માટે સૌથી વધુ ઉપયોગમાં લેવાતી એપમાંની એક છે. જોકે હવે આ લોકપ્રિય એપના નામે છેતરપિંડીનો પ્રયાસ થઈ રહ્યો છે. અહેવાલ મુજબ Google Play Store પર અસલી WhatsApp જેવી જ દેખાતી નકલી એપને 5 લાખથી વધુ વખત ડાઉનલોડ કરવામાં આવી હતી. જો તમે પણ તાજેતરમાં ફોનમાં WhatsApp ડાઉનલોડ કર્યુ હોય તો એપ અસલી છે કે નહીં તે તપાસી લેવું જરૂરી છે.

Google Play Store પર સામે આવી નકલી WhatsApp એપ

Google Play Store પર અસલી WhatsApp જેવી જ દેખાતી એક નકલી એપ સામે આવતાં યુઝર્સની સુરક્ષા અંગે સવાલો ઊભા થયા હતા. આ એપનો ખુલાસો Reddit પર 2ne1cheese નામના યુઝરે કર્યો હતો. તેણે Play Store પર આ એપ જોઈને તેનો સ્ક્રીનશૉટ શેર કર્યો હતો. અહેવાલ મુજબ આ નકલી એપ સપ્ટેમ્બર મહિનાથી Play Store પર ઉપલબ્ધ હતી. તેને 5 લાખથી વધુ લોકોએ ડાઉનલોડ કરી હતી. જોકે આ આંકડો એપના ડાઉનલોડનો છે, તેના કારણે કેટલા લોકો સાથે છેતરપિંડી થઈ હતી તેની પુષ્ટિ થતી નથી.

અસલી WhatsApp જેવી જ દેખાતી હતી એપ

નકલી એપ બનાવનારાઓએ તેને અસલી WhatsApp જેવી દેખાડવાનો પ્રયાસ કર્યો હતો. એપનું નામ, લોગો અને ગ્રાફિક્સ લગભગ અસલી WhatsApp જેવા જ રાખવામાં આવ્યા હતા. આ કારણે પહેલી નજરે સામાન્ય યુઝર માટે અસલી અને નકલી એપ વચ્ચેનો તફાવત ઓળખવો મુશ્કેલ બની શકે છે. અહેવાલમાં જણાવ્યા મુજબ આ એપનું કદ લગભગ 42 MB હતું. એપનું દેખાવ અસલી જેવું હોવાથી અનેક લોકો તેને સત્તાવાર WhatsApp માનીને ડાઉનલોડ કરી બેઠા હોવાની શક્યતા છે.

Sponsored એપ તરીકે સૌથી ઉપર દેખાતી હતી

આ નકલી એપને વધુ લોકો સુધી પહોંચાડવા માટે પેઇડ પ્રમોશનનો ઉપયોગ કરવામાં આવ્યો હોવાનો અહેવાલ છે. તેના કારણે યુઝર Google Play Store પર એપ શોધે ત્યારે તે Sponsored એટલે કે પ્રમોટેડ સૂચન તરીકે સૌથી ઉપર દેખાઈ શકતી હતી. સામાન્ય રીતે લોકો Play Store પર સૌથી ઉપર દેખાતી એપને વિશ્વસનીય માની લે છે. પરંતુ માત્ર એપ સૌથી ઉપર દેખાય છે અથવા તેના પર Sponsored લખેલું છે એટલા માટે તે અસલી છે એવું માની લેવું યોગ્ય નથી. એપ ડાઉનલોડ કરતાં પહેલાં તેના ડેવલપરનું નામ અને અન્ય વિગતો તપાસવી જરૂરી છે.

આ પણ વાંચોઃ પ્રી-બુકિંગ શરૂ થતા જ Appleના ફર્સ્ટ ફોલ્ડેબલ iPhoneનો સ્ટૉક ખતમ, જાણો સ્ટાર્ટિંગ પ્રાઈઝ

ડેવલપરના નામ સહિત અનેક ભૂલોથી ખુલાસો થયો

આ નકલી એપમાં કેટલીક એવી ભૂલો હતી જે ધ્યાનથી તપાસતાં ઓળખી શકાય છે. સત્તાવાર WhatsAppના ડેવલપરનું નામ WhatsApp LLC છે. આ નકલી એપ Agment Assets sallu નામના અજાણ્યા વ્યક્તિએ બનાવીને Play Store પર મૂકી હતી.આ ઉપરાંત એપના ડિસ્ક્રિપ્શનમાં અસલી WhatsAppની માહિતીની નકલ કરવામાં આવી હતી. જોકે તેમાં સ્પેસિંગની ભૂલો હતી અને કેટલીક જરૂરી વિગતો ગાયબ હતી. એપના ડિસ્ક્રિપ્શનમાં આપેલી Terms of Service અને Learn More લિંક્સ પણ કામ કરતી ન હોવાનું જણાવાયું હતું. એપના સ્ક્રીનશૉટ્સમાં એક જ ફોટો બે વખત દર્શાવવામાં આવ્યો હતો.

Early Accessના નામે યુઝર્સને ગેરમાર્ગે દોરવાનો પ્રયાસ

અહેવાલ મુજબ નકલી એપને Google Play Storeના Early Access એટલે કે ટેસ્ટિંગ ફીચર હેઠળ રાખવામાં આવી હતી. આ પ્રકારના ફીચરનો ઉપયોગ વિકાસ હેઠળની એપને મર્યાદિત યુઝર્સ સુધી પહોંચાડવા માટે થાય છે. અહેવાલમાં દાવો કરવામાં આવ્યો હતો કે આ સ્થિતિને કારણે યુઝર્સ માટે એપના જાહેર રિવ્યૂ અને રેટિંગ તપાસવા શક્ય નહોતું. પરિણામે એપની ખામીઓ વિશે જાણવાની તક મર્યાદિત થઈ શકે છે. જોકે Early Accessમાં રહેલી દરેક એપ નકલી કે જોખમી હોય એવું નથી. તેથી એપના ડેવલપર અને સત્તાવાર ઓળખની ચકાસણી કરવી વધુ જરૂરી છે.

તમારા ફોનમાં નકલી WhatsApp છે કે નહીં, આ રીતે તપાસો

જો તમે તાજેતરમાં નવો ફોન લીધો હોય અથવા જૂના ફોનને રીસેટ કર્યા પછી WhatsApp ફરીથી ઇન્સ્ટોલ કર્યુ હોય તો સૌથી પહેલાં ફોનની Settingsમાં જઈને Appsની યાદી તપાસો. WhatsAppની App Info ખોલીને તેના ડેવલપરનું નામ ચકાસો. સત્તાવાર એપ માટે Google Play Store પર WhatsApp LLC નામ અને WhatsAppની સત્તાવાર લિસ્ટિંગ તપાસવી જોઈએ. શક્ય હોય તો WhatsAppની સત્તાવાર વેબસાઇટ પરથી પણ એપની લિંક મેળવો.

જો તમને શંકાસ્પદ એપ મળી આવે તો તેમાં મેસેજ મોકલવા, પાસવર્ડ નાખવા કે અન્ય અંગત માહિતી આપવાનું ટાળો. એપ અનઇન્સ્ટોલ કરો અને Play Protectથી ફોન સ્કેન કરો. જો તમે તેમાં કોઈ શંકાસ્પદ પરવાનગી આપી હોય તો તેને બંધ કરો. બેંકિંગ કે અન્ય સંવેદનશીલ માહિતી દાખલ કરી હોય તો સંબંધિત એકાઉન્ટની સુરક્ષા પણ તપાસો. અજાણી વેબસાઇટ કે મેસેજમાં આવેલી લિંક પરથી WhatsApp ડાઉનલોડ કરવાને બદલે હંમેશાં સત્તાવાર સ્રોતનો ઉપયોગ કરો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ