ગુડ ન્યૂઝ / આ સરકારી કર્મચારીઓની તો દિવાળી સુધરી ગઈ! મોદી કેબિનેટે આપી 60 દિવસના બોનસને મંજૂરી

રેલવે કર્મચારીઓ માટે તાજેતરમાં જ 78 દિવસના બોનસની જાહેરાત કરવામાં આવ્યા બાદ હવે કેન્દ્ર સરકારે ટપાલ વિભાગના કર્મચારીઓ માટે પણ મોટી ખુશખબર આપી છે. સરકારે તાજેતરમાં નાણાકીય વર્ષ 2025-26 માટે ટપાલ કર્મચારીઓ માટે પ્રોડક્ટિવિટી લિંક્ડ બોનસ (પીએલબી) એટલે કે વાર્ષિક બોનસ જાહેર કર્યું છે. આ બોનસ કર્મચારીઓના 60 દિવસના વેતન બરાબર રહેશે અને તેની ગણતરી 7000 રૂપિયાની મહત્તમ બોનસ વેતન મર્યાદાના આધારે કરવામાં આવશે.

સંચાર મંત્રાલયના ટપાલ વિભાગ દ્વારા 16 ઓક્ટોબર, 2026 ના રોજ જારી કરવામાં આવેલા એક આદેશમાં જણાવવામાં આવ્યું છે કે પીએલબી મેળવવા માટે મલ્ટી ટાસ્કિંગ સ્ટોફ, ગ્રુપ 'સી' અને બિન-રાજપત્રિત (નોન-ગેઝેટેડ) ગ્રુપ 'બી' ના ટપાલ કર્મચારીઓ પાત્ર રહેશે. જોકે વિભાગ દ્વારા આ કર્મચારીઓને મળવાપાત્ર ચોક્કસ પીએલબી રકમનો ખુલાસો કરવામાં આવ્યો નથી, પરંતુ મહત્તમ બોનસની ગણતરી કરવાનું સૂત્ર રજૂ કરવામાં આવ્યું છે.

નિયમિત કર્મચારીઓ માટે પીએલબી રકમની ગણતરીનું સૂત્ર આ મુજબ રહેશે:

નિયમિત કર્મચારીઓ માટે પીએલબી = સરેરાશ વેતન × બોનસના દિવસોની સંખ્યા / 30.4 (જ્યાં 30.4 એ એક મહિનામાં દિવસોની સરેરાશ સંખ્યા દર્શાવે છે).

કર્મચારીઓને કેટલું ભથ્થું મળશે?

નિયમિત વિભાગીય કર્મચારીઓના વેતનમાં મૂળ વેતન, મોંઘવારી ભથ્થું (ડીએ), એસબી ભથ્થું, ડ્યુટી ભથ્થું અને તાલીમ સંસ્થાઓના સભ્યો માટે તાલીમ ભથ્થાનો સમાવેશ થાય છે. વર્ષ 2025-26 દરમિયાન જો કોઈ પણ મહિનામાં કર્મચારીનું વેતન 7,000 રૂપિયાથી વધી જાય, તો પણ બોનસની ગણતરી માટે વેતન માત્ર 7,000 રૂપિયા પ્રતિ માસ સુધી જ મર્યાદિત ગણવામાં આવશે. આ મુજબ નિયમિત ટપાલ કર્મચારીઓ માટે અંદાજિત મહત્તમ પીએલબી રકમ 7,000 રૂપિયા x 60 / 30.4 = 13,816 રૂપિયા થશે.

નિવૃત્ત કર્મચારીઓને પણ મળશે બોનસનો લાભ

1 એપ્રિલ, 2025 થી 31 માર્ચ, 2026 ની સમયગાળા દરમિયાન રાજીનામું આપનાર, નિવૃત્ત થનાર, સેવા છોડનાર અથવા ટપાલ વિભાગની અંદર કે વિભાગ બહાર ડેપ્યુટેશન (પ્રતિનિયુક્તિ) પર ગયેલા કર્મચારીઓ પણ આ બોનસ મેળવવા માટે સંપૂર્ણપણે પાત્ર રહેશે.

ગ્રામીણ ડાક સેવકો માટે બોનસની જોગવાઈ

ટપાલ વિભાગના જણાવ્યા મુજબ, વર્ષ 2025-26 દરમિયાન આખું વર્ષ ફરજ પર રહેલા ગ્રામીણ ડાક સેવકો (જીડીએસ) માટે સરેરાશ માસિક સમય સંબંધિત નિરંતરતા ભથ્થું (ટીઆરસીએ) ની ગણતરી કરવામાં આવશે. આ માટે 1 એપ્રિલ, 2025 થી 31 માર્ચ, 2026 સુધી તેમણે મેળવેલ ટીઆરસીએ અને સંબંધિત મોંઘવારી ભથ્થા (ડીએ) નો સરવાળો કરીને તેને 12 વડે ભાગવામાં આવશે.

જોકે, આ સમયગાળા દરમિયાન કોઈ પણ મહિનામાં ટીઆરસીએ અને મોંઘવારી ભથ્થું 7,000 રૂપિયાથી વધુ થઈ જશે, તો પણ ભથ્થું દર મહિને 7,000 રૂપિયા સુધી જ સીમિત રહેશે. આ રીતે મહત્તમ ટીઆરસીએ ધ્યાનમાં લેતાં, ગ્રામીણ ડાક સેવકો માટે પણ મહત્તમ પીએલબી અંદાજે 13,816 રૂપિયા રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ