આજે દેશ વિદેશમાં ગુજરાત જાણીતું છે. એવો કોઇ દેશ નહી હોય જયાં ગુજરાતી જોવા ના મળે. તો વળી ગુજરાતની વાનગીઓનો સ્વાદ પણ છેક કાશીથી લઇ કન્યાકુમારી અને સાત સમુંદર પાર માણી શકાય છે. ગુજરાતીઓ ફરવાના અને ખાવાના શોખીન હોય છે. માટે જ જયાં ગુજરાતી પહોંચે તે પહેલા ગુજરાતમાં વખણાતી ખાણીપીણી પહોંચી જાય છે.
ગુજરાતીઓથી પહેલાં પહોંચે છે ગુજરાતી વાનગીઓ
માઉન્ટ આબુમાં મળે છે ખીચુ અને ભૂંગળા-બટાકા
રાજસ્થાનીએ શરૂ કર્યો ગુજરાતી બિઝનેસ
ગુજરાતના લોકો માટે નજીક અને ફરવા માટે ફેવરિટ હોય તેવું સ્થળ માઉન્ટ આબુ છે. આબુની વાત કરીએ તો ત્યાં દેશ વિદેશમાંથી સહેલાણીઓ ફરવા માટે આવતા હોય છે. ત્યાંની રાજસ્થાની થાળી અને રબડી લોકોમાં ફેવરિટ છે. પરંતુ હવે ગુજરાતના ભૂંગળા બટાકાએ પણ ત્યાં પોતાનું વર્ચસ્વ જમાવ્યું છે. વાત સાંભળવામાં નવાઇ ભરેલી લાગે પરંતુ આ વાત બિલકુલ સાચી છે.
રાજસ્થાનીએ શરૂ કર્યો ગુજરાતી ધંધો
ગુજરાતીઓ તો પોતાના મન ગમતા ભૂંગળા બટાકાની મજા ઉઠાવે જ છે. સાથે અન્ય રાજય કે વિદેશમાંથી આવતા લોકો પણ કુતુહલતા પુર્વક આ ખાણીની મજા લે છે. આબુના જાણીતા સ્થળ નક્કી લેક પાસે ભૂંગળા બટાકા અને વસ્ત્રાપુર વાળા સાસુજીના ખીચુની લિજ્જત લોકો માણે છે. ત્યાં નોકરી કરતા દેવજીભાઇ કહે છે કે અમે રાજસ્થાની છુટક કામ ધંધાની શોધમાં ગુજરાત આવતા જતા રહીએ છીએ. ત્યારે એક વાર મારા દિકરાએ ભૂંગળા બટાકાનો સ્વાદ માણ્યો. તેણે મને આવીને જણાવ્યુ તો પહેલા મને લાગ્યું કે આવું તે વળી કોઇ ખાતુ હશે? પરંતુ જ્યારે મે ધંધો શરૂ કર્યો ત્યારે લોકો મજા લઇને ખાવા લાગ્યા. શરૂઆતમાં તો ગુજરાત જેવા બટાકા બનાવામાં તકલીફ પડતી. પરંતુ હવે ધીમે ધીમે હાથ બેસી ગયો છે. અને લોકો મોજથી ખાય છે. ગુજરાતના ગરબા હોય, ખાણીપીણી હોય કે પછી નેતા હોય તેમની નકલ તો લોકો કરે જ છે. માટે જ તો કહેવાય છે કે જ્યાં જ્યાં વસે ગુજરાતી ત્યાં સદાકાળ ગુજરાત.