નેશનલ / આકાશમાં એર ઈન્ડિયાના વિમાનના એન્જિનમાં આગની આશંકા, 171 મુસાફરોનો આબાદ બચાવ

ગુરુવારે સાંજે આકાશમાં એર ઈન્ડિયાના એક વિમાનમાં ટેકનિકલ ખામી સર્જાતા મુસાફરોના જીવ અધ્ધર થઈ ગયા હતા. બેંગલુરુથી દિલ્હી આવી રહેલી એર ઈન્ડિયાની એક ફ્લાઈટના એન્જિનમાં અચાનક આગ લાગી હોવાની આશંકાને પગલે દિલ્હી એરપોર્ટ પર યુદ્ધના ધોરણે આપાતકાલીન સ્થિતિ (Emergency Landing) જાહેર કરવામાં આવી હતી. જોકે, પાયલટની સમયસૂચકતા અને એર ટ્રાફિક કંટ્રોલ (ATC) ના તાત્કાલિક સંકલનને કારણે વિમાનને સુરક્ષિત રીતે રનવે પર ઉતારી લેવામાં આવ્યું હતું અને એક બહુ મોટી વિમાની દુર્ઘટના ટળી ગઈ હતી.

અહેવાલો અનુસાર, એર ઈન્ડિયાની ફ્લાઈટ નંબર AI-2802 બેંગલુરુથી ઉડાન ભરીને દિલ્હી તરફ આવી રહી હતી ત્યારે હવામાં જ તેના એક એન્જિનમાં આગ લાગવાની સંભાવના દેખાઈ હતી. પાયલટે આ જોખમની જાણ તાત્કાલિક દિલ્હી એર ટ્રાફિક કંટ્રોલને કરી હતી. પરિસ્થિતિની ગંભીરતાને જોતા ઈન્દિરા ગાંધી આંતરરાષ્ટ્રીય હવાઈ મથક પર તાત્કાલિક ધોરણે 'ફુલ ઇમરજન્સી' (Full Emergency) લાગુ કરી દેવામાં આવી હતી, જેથી રનવે પર ફાયર ફાઈટર્સ અને એમ્બ્યુલન્સ તહેનાત કરી શકાય. વિમાન ગુરુવારે રાત્રે આશરે 9:30 વાગ્યે એરપોર્ટના રનવે નંબર 29R પર સુરક્ષિત રીતે લેન્ડ કરવામાં સફળ રહ્યું હતું. લેન્ડિંગ બાદ વિમાનને સુરક્ષિત જગ્યાએ ટો (Tow) કરીને લઈ જવામાં આવ્યું હતું.

તમામ મુસાફરો સુરક્ષિત

આ ભયાનક ક્ષણો દરમિયાન વિમાનની અંદર સવાર મુસાફરોમાં ભારે ગભરાટનો માહોલ જોવા મળ્યો હતો. આ ફ્લાઈટમાં કુલ 171 મુસાફરો સવાર હતા. વિમાનના સફળ લેન્ડિંગ બાદ તમામ પ્રવાસીઓ અને ક્રૂ મેમ્બર્સને કોઈ પણ જાતની ઈજા વગર સુરક્ષિત રીતે બહાર કાઢી લેવામાં આવ્યા હતા, જેનાથી એરપોર્ટ પ્રશાસન અને એરલાઈન્સે રાહતનો શ્વાસ લીધો હતો. આ ઘટનાને કારણે રનવે પર થોડા સમય માટે ફ્લાઈટ્સની અવરજવર રોકી દેવામાં આવી હતી, જે બાદ પરિસ્થિતિ સામાન્ય થતાં રાત્રે 10:18 વાગ્યે રનવે પર ફ્લાઈટ ઓપરેશન ફરીથી શરૂ કરી દેવાયું હતું.

એર ઈન્ડિયાનું સત્તાવાર નિવેદન અને તપાસના આદેશ

આ ગંભીર ઘટના અંગે એર ઈન્ડિયાના પ્રવક્તાએ સત્તાવાર નિવેદન જાહેર કરતા જણાવ્યું છે કે, "21 May 2026 ના રોજ બેંગલુરુ-દિલ્હી ફ્લાઈટ AI-2802 સાથે બનેલી આ ઘટનાની અમને સંપૂર્ણ જાણકારી છે. વિમાન ખૂબ જ સુરક્ષિત રીતે રનવે પર ઉતરી ગયું છે અને તમામ પ્રવાસીઓ સહિત ક્રૂ સભ્યો એકદમ સહીસલામત છે. અમે આ ખામી પાછળના ચોક્કસ કારણો જાણવા માટે વધારાની માહિતી એકત્રિત કરી રહ્યા છીએ અને સંબંધિત તપાસ એજન્સીઓ સાથે મળીને કામ કરી રહ્યા છીએ. આ અંગે વિગતવાર માહિતી મળતા જ નવું અપડેટ શેર કરવામાં આવશે."

આ પણ વાંચોઃ નેશનલ / ફરી એક્સ પર પાછી ફરી 'કોકરોચ જનતા પાર્ટી', હવે શું રાખ્યું નામ?, આ અંદાજમાં કરાયો કટાક્ષ

એક જ દિવસમાં એર ઈન્ડિયા સાથે બીજી મોટી ઘટના

એવિએશન સેક્ટરમાંથી મળતી માહિતી મુજબ, એર ઈન્ડિયા માટે ગુરુવારનો દિવસ મુશ્કેલીભર્યો રહ્યો હતો કારણ કે આ એક જ દિવસમાં બનેલી બીજી મોટી ઘટના છે. આ એન્જિન ફાયરના વિવાદ પહેલા ગુરુવારે જ બેંગલુરુ એરપોર્ટ પર લેન્ડિંગ દરમિયાન એર ઈન્ડિયાના અન્ય એક વિમાનનો પાછળનો ભાગ (Tail) રનવે સાથે જોરદાર રીતે અથડાયો હતો (Tail Strike). સદનસીબે આ બંને મોટી ઘટનાઓમાં કોઈ પણ પ્રકારની જાનહાનિ થઈ નથી કે કોઈ મુસાફરને ઈજા પહોંચી નથી. હાલમાં નાગરિક ઉડ્ડયન મહાનિર્દેશાલય (DGCA) દ્વારા આ બંને મામલાઓને ખૂબ જ ગંભીરતાથી લઈને ઉચ્ચ સ્તરીય તપાસ શરૂ કરી દેવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ