અમદાવાદ / ચાંદખેડાની હોટલના રૂમમાં પ્રેમી પંખીડાએ પંખા સાથે દોરડું બાંધી ખાધો ગળેફાંસો, પ્રેમપ્રકરણમાં આત્મહત્યાની આશંકા

શહેરમાં ફરી એકવાર પ્રેમપ્રકરણનો કરુણ અને ગંભીર અંજામ સામે આવતા ચકચાર મચી ગઈ છે. અમદાવાદના ચાંદખેડા વિસ્તારમાં આવેલી હોટલ કુમકુમના એક રૂમમાંથી એક યુવક અને યુવતીની ગળેફાંસો ખાધેલી હાલતમાં લાશ મળી આવતા સમગ્ર પંથકમાં સનાટો વ્યાપી ગયો છે. હોટલના રૂમમાં પંખા સાથે દોરડું બાંધીને બંનેએ જિંદગી ટૂંકાવી લીધી હોવાની પ્રાથમિક વિગતો બહાર આવી છે. આ ચોંકાવનારી ઘટનાની જાણ થતાં જ ચાંદખેડા પોલીસનો કાફલો ઘટનાસ્થળે દોડી ગયો હતો અને કાયદેસરની તપાસ શરૂ કરી છે.

દરવાજો ન ખુલતા હોટલ સ્ટાફે મેનેજરને કરી જાણ

પોલીસ અને હોટલ સૂત્રો પાસેથી મળતી વિગતો અનુસાર, એક યુવક અને યુવતી ચાંદખેડા સ્થિત કુમકુમ હોટલમાં આવીને રોકાયા હતા. ત્યારબાદ લાંબા સમય સુધી રૂમનો દરવાજો અંદરથી બંધ રહ્યો હતો. હોટલના નિયમ મુજબ સ્ટાફે રૂમનો દરવાજો ખખડાવ્યો હતો, પરંતુ અંદરથી કોઈ પ્રત્યુત્તર ન મળતા અને લાંબા સમય સુધી હોબાળો કરવા છતાં દરવાજો ન ખુલતા સ્ટાફને કોઈ અનિચ્છનીય ઘટના ઘટી હોવાની શંકા ગઈ હતી. આ અંગે તાત્કાલિક હોટલના મેનેજરને માહિતગાર કરવામાં આવ્યા હતા. મેનેજરની હાજરીમાં રૂમનો દરવાજો ખોલવામાં આવતા જ અંદરનું દ્રશ્ય જોઈને હોટલનો સ્ટાફ સ્તબ્ધ થઈ ગયો હતો. રૂમમાં પંખાના હૂક સાથે દોરડું બાંધીને યુવક-યુવતી ગળેફાંસો ખાધેલી હાલતમાં લટકતા હતા. હોટલ સંચાલકોએ વિલંબ કર્યા વિના તાત્કાલિક કંટ્રોલ રૂમ મારફતે ચાંદખેડા પોલીસને આ અંગે જાણ કરી હતી.

બંને મૃતકો સંતરામપુરના, યુવતી કરતી હતી નર્સિંગનો અભ્યાસ

ઘટનાની માહિતી મળતા જ ચાંદખેડા પોલીસે સ્થળ પર પહોંચીને તપાસનો ધમધમાટ શરૂ કર્યો હતો અને બંને મૃતદેહોને પોસ્ટમોર્ટમ અર્થે ખસેડ્યા હતા. પોલીસની પ્રાથમિક ઓળખ અને હોટલના રજિસ્ટરની તપાસમાં જાણવા મળ્યું છે કે મૃતક યુવકનું નામ જયદીપ પટેલીયા અને યુવતીનું નામ નીતા ડામોર છે. આ બંને મૃતકો મૂળ મહીસાગર જિલ્લાના સંતરામપુરના રહેવાસી હતા. પોલીસ તપાસમાં એ પણ સામે આવ્યું છે કે મૃતક નીતા અમદાવાદમાં જ રહીને નર્સિંગનો અભ્યાસ કરતી હતી.

આ પણ વાંચોઃ ગિનીસ વર્લ્ડ રેકોર્ડમાં AMCનું નામ નોંધાયું, 1 કલાકમાં ભાડજ ખાતે વાવ્યા 3 લાખ 61 હજાર વૃક્ષ

સ્યુસાઇડ નોટ ન મળી, પ્રેમપ્રકરણ કારણભૂત હોવાની ચર્ચા

પોલીસે ઘટનાસ્થળ એટલે કે હોટલના રૂમની ઝીણવટભરી તલાશી લીધી હતી, પરંતુ મૃતક યુવક કે યુવતી પાસેથી કોઈ પણ પ્રકારની સ્યુસાઇડ નોટ (આત્મહત્યા પૂર્વે લખાયેલી ચિઠ્ઠી) મળી આવી નથી. જોકે, પોલીસની પ્રાથમિક પૂછપરછ અને આસપાસની કડીઓ જોડતા આ આત્મહત્યા પાછળ પ્રેમપ્રકરણ કારણભૂત હોવાનું પ્રબળ આશંકા વ્યક્ત કરવામાં આવી રહી છે. બંને વચ્ચેના સંબંધોને પરિવારની સ્વીકૃતિ ન મળવાને કારણે કે અન્ય કોઈ અંગત વિવાદને લીધે આ આત્યંતિક પગલું ભર્યું છે કે કેમ, તે દિશામાં ચાંદખેડા પોલીસે ગુનો નોંધીને ઊંડાણપૂર્વકની તપાસ હાથ ધરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ