સ્પોર્ટ્સ / જો શ્રેયસ અય્યર પાસેથી કેપ્ટનશીપ છીનવાઈ, તો આ 5 ખેલાડીઓમાંથી કોઇ એકને મળી શકે જવાબદારી

શ્રેયસ ઐયરની કેપ્ટનશીપ હેઠળ ટીમ ઈન્ડિયાનું પ્રદર્શન અત્યાર સુધી ખૂબ જ નિરાશાજનક રહ્યું હોવાનું માનવામાં આવી રહ્યું છે. ટીમ ઈન્ડિયાએ પહેલીવાર આયર્લેન્ડ સામે T20 શ્રેણી ગુમાવી હતી, જે ભારતીય ક્રિકેટ માટે એક મોટો ઝટકો માનવામાં આવ્યો હતો. ત્યારબાદ ઈંગ્લેન્ડ સામેની T20I શ્રેણીમાં પણ ભારતને હારનો સામનો કરવો પડ્યો હતો. સતત મળેલા આ પરિણામો બાદ ટીમના નેતૃત્વને લઈને ચર્ચા વધુ તેજ બની છે.

પોતાને કેપ્ટન તરીકે સાબિત કરવાની તક

હાલમાં શ્રેયસ ઐયર પાસે ઝિમ્બાબ્વે સામેની શ્રેણી અને એશિયન ગેમ્સ જેવી મહત્વપૂર્ણ સ્પર્ધાઓમાં પોતાને કેપ્ટન તરીકે સાબિત કરવાની તક બાકી છે. મીડિયા અહેવાલો અનુસાર ભારતીય ક્રિકેટ કંટ્રોલ બોર્ડ (BCCI) તેમના પ્રદર્શન પર નજીકથી નજર રાખી રહ્યું છે. જો આગામી મેચોમાં પણ ટીમનું પ્રદર્શન સુધરશે નહીં, તો ઐયરને કેપ્ટનશીપમાંથી દૂર કરવાનો નિર્ણય લેવામાં આવી શકે છે. જો આવું બને, તો ટીમ ઈન્ડિયાના નવા T20 કેપ્ટન તરીકે કેટલાક મજબૂત દાવેદારો સામે આવી રહ્યા છે.

પ્રથમ નામ સૂર્યકુમાર યાદવ

સૌથી પ્રથમ નામ સૂર્યકુમાર યાદવનું સામે આવે છે. સૂર્યકુમાર યાદવ અગાઉ પણ ટીમ ઈન્ડિયાનું નેતૃત્વ કરી ચૂક્યા છે અને તેમની કેપ્ટનશીપ હેઠળ ટીમે સારું પ્રદર્શન કર્યું હતું. તેમના અનુભવો અને આક્રમક ક્રિકેટને ધ્યાનમાં રાખીને ફરી એકવાર તેમને ટીમની કમાન સોંપવામાં આવી શકે છે. મુંબઈ ઈન્ડિયન્સ તરફથી પણ તેઓ નેતૃત્વની ક્ષમતા બતાવી ચૂક્યા છે. બીજા દાવેદાર તરીકે હાર્દિક પંડ્યાનું નામ ચર્ચામાં છે. હાર્દિક હાલમાં ઈજાને કારણે ટીમની બહાર છે, પરંતુ તેઓ અગાઉ ટીમ ઈન્ડિયાનું નેતૃત્વ કરી ચૂક્યા છે. આંતરરાષ્ટ્રીય ક્રિકેટમાં કેપ્ટન તરીકેનો તેમનો અનુભવ અને દબાણમાં નિર્ણય લેવાની ક્ષમતાને ધ્યાનમાં રાખીને BCCI ફરી એકવાર તેમને જવાબદારી સોંપી શકે છે.

જસપ્રીત બુમરાહ

ત્રીજા મજબૂત વિકલ્પ તરીકે જસપ્રીત બુમરાહનું નામ પણ સામે આવી રહ્યું છે. બુમરાહ હાલમાં T20I ક્રિકેટથી થોડા સમય માટે દૂર છે, પરંતુ ટીમની જરૂરિયાતને ધ્યાનમાં રાખીને તેમની વાપસી થઈ શકે છે. તેમને T20 ટીમની કેપ્ટનશીપ સોંપવાનો વિકલ્પ પણ ચર્ચામાં છે. જો તેમને કેપ્ટન બનાવવામાં આવે, તો તેમના વર્કલોડને નિયંત્રિત કરવા માટે ટેસ્ટ ક્રિકેટમાં આરામ આપવામાં આવી શકે છે. અનુભવી ખેલાડી તરીકે બુમરાહ ટીમને સારી રીતે સંભાળી શકે છે.

ઇશાન કિશન

ચોથા દાવેદાર તરીકે ઇશાન કિશનનું નામ પણ લેવામાં આવી રહ્યું છે. ઇશાન કિશને ઘરેલુ ક્રિકેટમાં પોતાની કેપ્ટનશીપ સાબિત કરી છે. હાલમાં તેઓ વિશ્વના નંબર-1 T20I બેટ્સમેન તરીકે ઓળખાય છે. ઉપરાંત IPLમાં SRHના કેપ્ટન તરીકે પણ તેમણે સારું પ્રદર્શન કર્યું હોવાનું માનવામાં આવે છે. તેમની યુવા ઉર્જા અને આક્રમક અભિગમને કારણે તેઓ ભવિષ્યના કેપ્ટન તરીકે એક મજબૂત વિકલ્પ બની શકે છે.

રજત પાટીદાર

પાંચમા દાવેદાર તરીકે રજત પાટીદારનું નામ પણ ચર્ચામાં છે. તેમની કેપ્ટનશીપ હેઠળ RCBએ છેલ્લા બે વર્ષમાં બે ટ્રોફી જીતી હોવાનું કહેવાય છે. IPL 2026માં પણ તેમણે બેટિંગ અને નેતૃત્વ બંનેમાં પ્રભાવશાળી પ્રદર્શન કર્યું હતું. શ્રેયસ ઐયરની જેમ તેઓ પણ મિડલ ઓર્ડરમાં મહત્વની ભૂમિકા ભજવે છે. તેથી જો BCCI નવા ચહેરા પર વિશ્વાસ મૂકવા માંગશે, તો રજત પાટીદાર પણ કેપ્ટનશીપ માટે એક મજબૂત વિકલ્પ બની શકે છે.

આ પણ વાંચો : કેમ T20 વર્લ્ડકપ ચેમ્પિયન ટીમ ઈન્ડિયા સતત બે સિરીઝ ગુમાવી ચૂકી? જાણો હારના 5 કારણ

હાલ માટે શ્રેયસ ઐયર પાસે પોતાનું સ્થાન મજબૂત કરવાની તક છે. ઝિમ્બાબ્વે શ્રેણી અને એશિયન ગેમ્સમાં તેમનું પ્રદર્શન આગામી નિર્ણયમાં મહત્વની ભૂમિકા ભજવી શકે છે. જો તેઓ ટીમને જીત અપાવવામાં સફળ રહેશે તો તેમની કેપ્ટનશીપ યથાવત રહી શકે છે, પરંતુ જો પરિણામોમાં સુધારો નહીં આવે તો BCCI નવા કેપ્ટનની પસંદગી તરફ આગળ વધી શકે છે. હાલમાં સૂર્યકુમાર યાદવ, હાર્દિક પંડ્યા, જસપ્રીત બુમરાહ, ઇશાન કિશન અને રજત પાટીદાર જેવા પાંચ ખેલાડીઓ સંભવિત દાવેદાર તરીકે ચર્ચામાં છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ