વર્લ્ડકપ 2026 / વાહ.., FIFAએ અજમાવ્યો કમાણીનો જોરદાર રસ્તો, ફાઇનલ બાદ અજમાવશે ખેલ

FIFA વર્લ્ડ કપ 2026 હવે નિર્ણાયક તબક્કા તરફ આગળ વધી રહ્યો છે. આ દરમિયાન FIFAએ ચાહકો માટે ખાસ યાદગાર વસ્તુ વેચવાની જાહેરાત કરી છે. ફાઇનલ મેચ માટે ઉપયોગમાં લેવાનારી પિચના ટુકડાઓ વેચવામાં આવશે. જોકે તેની કિંમત સાંભળીને ઘણા લોકો ચોંકી ગયા છે.

FIFA વેચશે ફાઇનલ પિચના ટુકડા

વિશ્વ ફૂટબોલની સર્વોચ્ચ સંસ્થા FIFAએ જાહેરાત કરી છે કે 19 જુલાઈએ અમેરિકાના ન્યૂ જર્સી સ્થિત મેટલાઇફ સ્ટેડિયમમાં રમાનારી વર્લ્ડ કપ ફાઇનલમાં ઉપયોગમાં લેવાનારી પિચના ટુકડાઓ વેચવામાં આવશે. FIFAનું કહેવું છે કે ચાહકો માટે આ ફૂટબોલ ઇતિહાસનો એક ખાસ ભાગ હશે.

એક ટુકડાની કિંમત કેટલી?

FIFA સ્ટોર પર ઉપલબ્ધ માહિતી અનુસાર પિચના એક ટુકડાની કિંમત 450 ડોલર રાખવામાં આવી છે. ભારતીય ચલણ મુજબ આ રકમ અંદાજે 43 હજાર રૂપિયા જેટલી થાય છે. આ નિર્ણય બાદ FIFA ફરી એકવાર ઊંચી કિંમતોને લઈને ચર્ચામાં આવી ગયું છે.

ટુકડાનું કદ પણ જાહેર

FIFAએ જણાવ્યું છે કે દરેક ટુકડાનું માપ 17.5 x 17.5 x 17.5 રહેશે. જોકે આ માપ ઇંચમાં છે કે અન્ય કોઈ એકમમાં તે અંગે સ્પષ્ટતા કરવામાં આવી નથી. આ બાબતે FIFA તરફથી હજુ વધુ માહિતી આપવામાં આવી નથી.

ફાઇનલ બાદ થશે ડિલિવરી

ફૂટબોલ ચાહકો અત્યારથી જ આ ટુકડાઓ માટે ઓર્ડર આપી શકે છે. ફાઇનલ મેચ પૂર્ણ થયા બાદ ખરીદદારોને તેમની ડિલિવરી કરવામાં આવશે. હાલમાં આ સેવા માત્ર અમેરિકા અને યુરોપના સરનામાઓ માટે ઉપલબ્ધ હોવાનું જણાવાયું છે.

આ પણ વાંચોઃ બે વખત ચોરાઈ, યુદ્ધમાં બૂટના બોક્સમાં છુપાવી રાખવી પડી, એક કૂતરાએ શોધી કાઢી: FIFA World Cup Trophyનો 95 વર્ષનો રોમાંચક ઇતિહાસ

ફાઇનલ ટિકિટ પણ છે ખૂબ મોંઘી

FIFA પહેલાથી જ વર્લ્ડ કપની ટિકિટોના ભાવને લઈને ટીકાનો સામનો કરી રહ્યું છે. ફાઇનલ મેચની સામાન્ય ટિકિટનો ભાવ 32,970 ડોલર સુધી પહોંચ્યો છે. જ્યારે ભોજન અને પીણાંની સુવિધા સાથેની પ્રીમિયમ ટિકિટ 34,500 ડોલરમાં વેચાઈ રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ