અમદાવાદ / રામોલની જીવન જ્યોત સ્કૂલના વિદ્યાર્થીઓ વચ્ચે મારામારી, કારણ જાણીને ચોંકી જશો

Ahmedabad School Student Fight : અમદાવાદમાં સ્કૂલના વિદ્યાર્થીઓ વચ્ચે થતી અથડામણની વધુ એક ઘટના સામે આવી છે. વિગતો મુજબ રામોલ વિસ્તારમાં આવેલી જીવન જ્યોત સ્કૂલના વિદ્યાર્થીઓ વચ્ચે સામાન્ય બાબતે શરૂ થયેલો વિવાદ બાદમાં મારામારીમાં ફેરવાયો હતો. ઘટનાને પગલે પોલીસે તાત્કાલિક કાર્યવાહી કરીને ત્રણ વિદ્યાર્થીઓની અટકાયત કરી છે.

શું છે સમગ્ર મામલો ?

પ્રાથમિક વિગતો મુજબ રામોલ વિસ્તારમાં આવેલ જીવન જ્યોત સ્કૂલમાં અભ્યાસ કરતા કેટલાક વિદ્યાર્થીઓ વચ્ચે શાળામાં ચપ્પલ મૂકવાના મુદ્દે બોલાચાલી થઈ હતી. શરૂઆતમાં લાગતો સામાન્ય વિવાદ સમય જતાં વધુ ઉગ્ર બન્યો અને બંને પક્ષના વિદ્યાર્થીઓએ એકબીજા પ્રત્યે અદાવત રાખી હતી.

પછી ગઈકાલે સાંજે રામોલ વિસ્તારમાં આવેલા એક મેદાનમાં બંને પક્ષના વિદ્યાર્થીઓ સામસામે આવી ગયા હતા. ત્યાં ઉગ્ર મારામારી થતાં આસપાસના લોકો એકત્ર થઈ ગયા હતા. ઘટનાની જાણ થતાં પોલીસ પણ તાત્કાલિક સ્થળ પર પહોંચી હતી અને પરિસ્થિતિને કાબૂમાં લીધી હતી.

આ પણ વાંચો : અંતે ગિરનારમાં બાળક પર હુમલો કરનાર સિંહનું કરાયું રેસ્ક્યૂ, જુઓ Video

આ તરફ પ્રાથમિક તપાસમાં સામે આવ્યું છે કે, મારામારીમાં સામેલ મોટાભાગના વિદ્યાર્થીઓ સગીર વયના હતા. પોલીસે સમગ્ર ઘટનામાં ગુનો નોંધીને 18 વર્ષના બે યુવકો અને એક સગીર કિશોરની અટકાયત કરી છે. હાલ પોલીસ સમગ્ર મામલે વધુ તપાસ કરી રહી છે અને અન્ય કોઈ વિદ્યાર્થીની સંડોવણી છે કે નહીં તે દિશામાં પણ તપાસ ચાલી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ