જૂનાગઢ / અંતે ગિરનારમાં બાળક પર હુમલો કરનાર સિંહનું કરાયું રેસ્ક્યૂ, જુઓ Video

Girnar Lion Rescue : જૂનાગઢના પવિત્ર ગિરનાર પર્વત પરથી એક હૃદયદ્રાવક ઘટના સામે આવી છે. ગિરનારની નવી સીડી પર સિંહના હુમલામાં 11 વર્ષીય બાળકનું કરુણ મોત થતાં સમગ્ર રાજ્યમાં શોકની લાગણી ફેલાઈ છે. આ ઘટના બાદ વન વિભાગ, પોલીસ અને સ્થાનિક તંત્ર એલર્ટ મોડમાં આવી ગયું છે .સંયુક્ત રેસ્ક્યુ ઓપરેશન હાથ ધરીને વિસ્તારમાં સર્ચ શરૂ કરવામાં આવ્યું હતું. કાર્યવાહી દરમિયાન એક સિંહને પકડી પાડવામાં આવ્યો હતો અને તેની તબીબી તપાસ માટે પશુચિકિત્સકોની ટીમને પણ બોલાવવામાં આવી હતી.

શું હતી સમગ્ર ઘટના ?

મળતી માહિતી મુજબ ગિરનારની નવી સીડીના આશરે 50મા પગથિયા નજીક સિંહે અચાનક બાળક પર હુમલો કર્યો હતો. પ્રાથમિક વિગતો મુજબ મહેમદાવાદ તાલુકાના મોડજ ગામથી એક પરિવાર ગિરનાર યાત્રા માટે આવ્યો હતો. વહેલી સવારે અંદાજે પાંચ વાગ્યાના સમયે પરિવાર ગિરનારની સીડીઓ ચઢી રહ્યો હતો. તે દરમિયાન લગભગ 50મા પગથિયાંની આસપાસ 11 વર્ષનો મયુરસિંહ મહેન્દ્રસિંહ ચૌહાણ પોતાના કાકા સાથે આગળ વધી રહ્યો હતો. અચાનક અંધારામાંથી એક સિંહ બહાર આવ્યો અને કિશોર પર હુમલો કરીને તેને મોઢામાં પકડી જંગલ તરફ ખેંચી ગયો. સમગ્ર ઘટના એટલી ઝડપથી બની કે પરિવારજનો બાળકને બચાવી શક્યા નહોતા.

આ તરફ ઘટનાની જાણ થતાં જ સ્થાનિક લોકો અને વન વિભાગના કર્મચારીઓ તાત્કાલિક સ્થળે દોડી આવ્યા હતા. જંગલ વિસ્તારમાં સર્ચ ઓપરેશન હાથ ધરવામાં આવ્યું છે. પ્રાથમિક માહિતી મુજબ હજુ સુધી બાળકનો સંપૂર્ણ મૃતદેહ મળી આવ્યો નથી. શોધખોળ દરમિયાન બાળકનો એક પગ, બુટ અને કપડાં મળી આવ્યા હોવાનું જાણવા મળ્યું છે. વન વિભાગ દ્વારા સમગ્ર વિસ્તારની સઘન તપાસ ચાલુ રાખવામાં આવી છે.

ચાર દિવસથી ગિરનારની સીડીઓ પર હતી સિંહની અવર-જવર

સ્થાનિક લોકોના જણાવ્યા અનુસાર છેલ્લા ત્રણથી ચાર દિવસથી ગિરનારની સીડીઓ આસપાસ સિંહની અવરજવર જોવા મળી રહી હતી. તેમ છતાં યાત્રાળુઓની સુરક્ષા માટે પૂરતી તકેદારી લેવામાં આવી હતી કે નહીં તે અંગે પણ હવે સવાલો ઊભા થયા છે.

આ પણ વાંચો : ફરીવાર સિંહનો હુમલો, ગિરનારના 50 પગથિયેથી જ બાળકને સિંહ ઉપાડી ગયો

શું કહી રહ્યા છે પરિવારજનો ?

આ સમગ્ર ઘટનાને લઈને બાળકના પરિવારજનોએ પણ સુરક્ષા વ્યવસ્થા અંગે ગંભીર ચિંતા વ્યક્ત કરી છે. તેમનું કહેવું છે કે, ગિરનારની સીડીઓ પર ખાસ કરીને રાત્રિ અને વહેલી સવારે પૂરતી લાઇટિંગની વ્યવસ્થા હોવી જોઈએ. હજારો યાત્રિકો અંધારામાં ગિરનાર ચઢતા હોય છે અને પ્રકાશના અભાવે આસપાસ કોઈ વન્યજીવ હોય તો તેની જાણ થઈ શકતી નથી. જો યોગ્ય પ્રકાશ વ્યવસ્થા હોય તો આવી દુર્ઘટનાઓ ટાળવામાં મદદ મળી શકે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ