ક્રાઈમ / જોજો તમારી સાથે આવું ન બને! રાજકોટમાં ગઠિયો ATM કાર્ડ બદલી ગયો, અલગ-અલગ ઠેકાણેથી 4.35 લાખ ઉપાડી લીધા

રાજકોટ જિલ્લાના ઉપલેટામાં સાયબર ફ્રોડ અને એટીએમ કાર્ડ અદલા બદલીનો એક ચોંકાવનારો કિસ્સો સામે આવ્યો છે. જેમાં ઉપલેટાના એક નિવૃત્ત રેલવે કર્મચારીની નજર ચૂકવી અજાણ્યો ગઠિયો ATM કાર્ડ બદલી ગયો હતો અને અલગ-અલગ ગામો તથા શહેરોમાંથી રૂ. 4.35 લાખથી વધુની રકમ ઉપાડી રફૂચક્કર થઈ ગયો હતો. સમગ્ર મામલે ભોગ બનનાર વૃદ્ધે ઉપલેટા પોલીસ મથકે ફરિયાદ નોંધાવતા પોલીસે સીસીટીવી ફૂટેજ અને ટ્રાન્ઝેક્શન વિગતોના આધારે તપાસનો ધમધમાટ શરૂ કર્યો છે.

લિફ્ટ માંગીને કાર્ડ બદલી નાખ્યું

ઉપલેટાના સ્વામિનારાયણ સોસાયટી પાસે આવેલ ભગવતી પાર્ક-2 વિસ્તારમાં રહેતા અને રેલવે વિભાગના નિવૃત્ત કર્મચારી સેવાદાસભાઈ રામકૃષ્ણદાસ ગોંડલિયા SBI ના ATM પરથી પૈસા ઉપાડવા માટે ગયા હતા. આ દરમિયાન એટીએમમાં હાજર એક અજાણ્યા શખ્સે પોતાને પણ પૈસા ઉપાડવા જવું છે અહીંયા પૈસા નીકળતા નથી અને મારી પાસે મોટરસાયકલ પણ નથી તેમ કહી લિફ્ટ માંગી હતી. સેવાદાસભાઈએ માનવતા દાખવી તેને પોતાના મોટરસાયકલ પર બેસાડી કોલકી રોડ પર ટેલીફોન એક્સચેન્જ બિલ્ડીંગના પ્રાંગણમાં આવેલ SBI ના ATM સેન્ટર પર લઈ ગયા હતા. ATM સેન્ટરમાં સેવાદાસભાઈ પૈસા ઉપાડીને પોતાના પાકીટમાં મુકતા હતા ત્યારે જ ગઠિયાએ ચતુરાઈપૂર્વક તેમની નજર ચૂકવી પોતાની પાસે રહેલું બીજું ATM કાર્ડ સેવાદાસભાઈના કાર્ડ સાથે બદલી નાખ્યું હતું.

ગઠિયો 4.35 લાખ ઉપાડી ગયો

સેવાદાસભાઈને આ બાબતની કોઈ જાણ ન હતી અને ઉતાવળ હોવાથી તેઓ પોતાના ઘરે પરત ફર્યા હતા. થોડા દિવસો બાદ જ્યારે તેઓ ઘર માટે ટીવી ખરીદવા રાજકોટ તેમના બેનને ઘરે ગયા હતા અને TV ખરીદવા માટે પોતાના ભાણેજ સાથે બે થી ત્રણ ATM માંથી નાણાં ઉપાડવાનો પ્રયાસ કર્યો ત્યારે કાર્ડ અદલાબદલી થઈ ગયાનો ભાંડો ફૂટ્યો હતો. પરંતુ ત્યાં સુધીમાં ઘણું મોડું થઈ ચૂક્યું હતું. તા. 17 સપ્ટેમ્બર થી તા. 27 સપ્ટેમ્બર સુધીમાં ગઠિયાએ આ 11 દિવસના સમયગાળામાં અલગ-અલગ ગામો અને શહેરોના ATM માંથી સેવાદાસભાઈની મરણમૂડી સમાન ₹4,35,000/- ઉપાડી લીધા હતા.

વધુ વાંચો : કીર્તિ પટેલની સાથીદાર અને સસ્પેન્ડેડ મહિલા કોન્સ્ટેબલ નયના બારૈયાની ધરપકડ, કયા ગુનામાં કાર્યવાહી?

નિવૃત્ત તલાટી મંત્રીને લાગ્યો લાખોનો ચૂનો

તાજેતરમાં જ ધોરાજીના સુપેડી ગામમાં નિવૃત્ત તલાટી મંત્રીને ડિજિટલ લગ્ન કંકોત્રીની ફાઈલથી લાખો રૂપિયાનો ચૂનો લાગ્યો હતો, જેની શાહી હજુ સુકાઈ નથી ત્યાં ઉપલેટામાં આ બીજી મોટી ઘટના સામે આવી છે. હાલ તો ઉપલેટા પોલીસે ગુનો નોંધી CC TV કેમેરા અને બેંક ટ્રાન્ઝેક્શનના આધારે આરોપીને શોધવા ચક્રો ગતિમાન કર્યા છે, ત્યારે જોવાનું એ રહે છે કે પોલીસ આ ગઠિયાને કેટલા સમયમાં દબોચી પીડિતને તેના નાણાં પરત અપાવી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ