તમારા કામનું / PhonePe, GPay કે Paytm નહીં ખોલવું પડે! એક જ જગ્યાએ જુઓ UPI પેમેન્ટની હિસ્ટ્રી

આજના સમયમાં મોટાભાગના લોકો રોજિંદા પેમેન્ટ માટે UPIનો ઉપયોગ કરે છે. ઘણી વખત એક જ વ્યક્તિ અલગ-અલગ પેમેન્ટ માટે PhonePe, Google Pay અને Paytm જેવી એપનો ઉપયોગ કરે છે. આવી સ્થિતિમાં કોઈ જૂનું પેમેન્ટ શોધવાનું હોય ત્યારે કઈ એપમાં પેમેન્ટ કર્યું હતું તે યાદ રહેતું નથી. પરંતુ આ માટે દરેક એપ અલગ-અલગ ખોલવાની જરૂર નથી. તમારા બેંક એકાઉન્ટની Transaction History અથવા Account Statementમાં UPIથી થયેલા તમામ વ્યવહારોની માહિતી એક જ જગ્યાએ મળી શકે છે.

એક જ જગ્યાએ કેવી રીતે મળશે તમામ UPI ટ્રાન્ઝેક્શન?

જો તમે અલગ-અલગ UPI એપથી પેમેન્ટ કર્યું હોય તો તમારા બેંક એકાઉન્ટમાં થયેલા તમામ ટ્રાન્ઝેક્શનની માહિતી બેંકની મોબાઇલ એપ અથવા નેટ બેંકિંગમાં જોઈ શકાય છે. સૌથી પહેલા તમારી બેંકની મોબાઇલ એપ ખોલીને લોગિન કરો. ત્યારબાદ Accounts, Bank Account અથવા Transaction History જેવા વિકલ્પ પર જાઓ. અલગ-અલગ બેંકની એપમાં આ વિકલ્પોના નામ અલગ હોઈ શકે છે.

હવે તે બેંક એકાઉન્ટ પસંદ કરો જેની સાથે તમારું PhonePe, Google Pay અથવા Paytm UPI જોડાયેલું છે. અહીં તમને ખાતામાંથી થયેલા ડેબિટ અને ક્રેડિટ ટ્રાન્ઝેક્શનની માહિતી જોવા મળશે. આ રીતે અલગ-અલગ UPI એપ ખોલ્યા વગર પણ એક જ જગ્યાએથી તમારા પેમેન્ટની માહિતી મેળવી શકાય છે.

જૂનું પેમેન્ટ શોધવું બનશે સરળ

ધારો કે તમે કોઈ દુકાન પર ₹500નું પેમેન્ટ કર્યું હતું પરંતુ તે પેમેન્ટ PhonePeથી કર્યું હતું કે Google Payથી તે યાદ નથી. આવી સ્થિતિમાં બેંકની Transaction Historyમાં તે તારીખની આસપાસના વ્યવહારો જોઈ શકો છો. ત્યાંથી ₹500ના પેમેન્ટને સરળતાથી ઓળખી શકાય છે.બેંક સ્ટેટમેન્ટમાં સામાન્ય રીતે પેમેન્ટની તારીખ, રકમ, બેલેન્સ, UPI રેફરન્સ નંબર અને રિસીવર સાથે જોડાયેલી માહિતી જોવા મળે છે. જેના કારણે જૂના પેમેન્ટને ઓળખવાનું સરળ બને છે. જો બેંક એપમાં લાંબી ટ્રાન્ઝેક્શન હિસ્ટ્રી હોય તો ઘણી બેંકો તારીખ પ્રમાણે ટ્રાન્ઝેક્શન શોધવા અથવા સ્ટેટમેન્ટ ડાઉનલોડ કરવાની સુવિધા પણ આપે છે.

UPI એપની હિસ્ટ્રી પણ છે ઉપયોગી

બેંક સ્ટેટમેન્ટથી તમારા ખાતામાંથી થયેલા પેમેન્ટની માહિતી મળી જાય છે પરંતુ કોઈ ચોક્કસ પેમેન્ટની વધારાની માહિતી માટે સંબંધિત UPI એપની હિસ્ટ્રી વધુ ઉપયોગી થઈ શકે છે. PhonePeમાં જૂના પેમેન્ટ PhonePeની હિસ્ટ્રીમાં જોઈ શકાય છે. Google Payમાં Google Payની Activity અને Paytmમાં Transaction વિભાગમાંથી જૂના વ્યવહારો જોઈ શકાય છે.

એટલે બેંક સ્ટેટમેન્ટને તમામ UPI પેમેન્ટનો કોમન રેકોર્ડ માનવો અને વધુ માહિતી માટે સંબંધિત UPI એપની હિસ્ટ્રીનો ઉપયોગ કરવો વધુ યોગ્ય છે. આ રીતે જરૂરિયાત પ્રમાણે બંને જગ્યાએથી માહિતી મેળવી શકાય છે.

આ પણ વાંચોઃ જલ્દી-જલ્દી પતાવી દેજો આ કામ! નહીં તો ગેસ સિલિન્ડર બુક નહીં થાય?

UPI PIN અને OTP ક્યારેય શેર ન કરો

UPI હિસ્ટ્રી જોવા માટે કોઈ અનજાણી વેબસાઇટ અથવા થર્ડ પાર્ટી એપનો ઉપયોગ ન કરવો જોઈએ. આવી જગ્યાએ UPI PIN, બેંકિંગ પાસવર્ડ અથવા OTP નાખવાથી તમારા બેંક ખાતાની સુરક્ષા જોખમમાં મુકાઈ શકે છે. UPI PIN માત્ર પેમેન્ટને અધિકૃત કરવા માટે હોય છે અને તેને કોઈની સાથે શેર કરવો નહીં.

જો તમારા ખાતામાં કોઈ અજાણ્યો ટ્રાન્ઝેક્શન જોવા મળે તો તેને અવગણશો નહીં. માત્ર UPI એપની હિસ્ટ્રી ચેક કરવાને બદલે બેંક એકાઉન્ટનું સ્ટેટમેન્ટ પણ તપાસો. કોઈ શંકાસ્પદ વ્યવહાર જણાય તો તરત જ તમારી બેંકનો સંપર્ક કરવો જરૂરી છે.

સૌથી સરળ રીત કઈ છે?

જો તમારે માત્ર એ જાણવું હોય કે કોઈ ચોક્કસ તારીખે તમારા ખાતામાંથી કેટલા રૂપિયા ગયા તો બેંકની Transaction History સૌથી સરળ વિકલ્પ છે. અહીં અલગ-અલગ UPI એપથી થયેલા વ્યવહારો એક જ ખાતાના રેકોર્ડમાં જોવા મળી શકે છે.

જ્યારે કોઈ ચોક્કસ UPI પેમેન્ટની વધુ વિગતો જોઈએ ત્યારે PhonePe, Google Pay અથવા Paytmની પોતાની હિસ્ટ્રી ચેક કરવી વધુ યોગ્ય છે. એટલે દરેક એપમાં એક પછી એક હિસ્ટ્રી શોધવાને બદલે પહેલા બેંક સ્ટેટમેન્ટ તપાસી શકાય છે. આ રીતે તમારા UPI પેમેન્ટનો રેકોર્ડ એક જ જગ્યાએ સરળતાથી શોધી શકાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ