રાજનીતિ / હોમપિચ પર જ ક્લીન બોલ્ડ થયા અસદુદ્દીન ઓવૈસી! શું મુસ્લિમ વોટોનું બદલાઈ ગયું સમીકરણ?

• તેલંગાણામાં કોંગ્રેસ તો આગળ પણ AIMIMને મોટો આંચકો 
• AIMIM પ્રમુખ અસદુદ્દીન ઓવૈસીની પાર્ટી તમામ સીટો પર પાછળ
• ગત વિધાનસભા ચૂંટણીમાં તેમની પાર્ટીએ 7 બેઠકો જીતી હતી

તેલંગાણા વિધાનસભા ચૂંટણી બાદ હાલ મતગણતરી ચાલી રહી છે. આ દરમિયાન હવે કોંગ્રેસ શરૂઆતથી જ આગળ ચાલી રહી છે. જોકે AIMIM પ્રમુખ અસદુદ્દીન ઓવૈસીની પાર્ટીને તેલંગાણાની તમામ 119 બેઠકો પર ચાલી રહેલી મત ગણતરીમાં મોટો આંચકો લાગ્યો છે. ઓવૈસીની પાર્ટી તમામ સીટો પર પાછળ ચાલી રહી છે. નોંધનિય છે કે, ગત વિધાનસભા ચૂંટણીમાં તેમની પાર્ટીએ 7 બેઠકો જીતી હતી.

રાજ્યમાં કોંગ્રેસની સરકાર બનશે તેવું લાગી રહ્યું છે. કોંગ્રેસ 73 સીટો પર અને BRS 33 સીટો પર આગળ છે. જ્યારે ભાજપ 9 બેઠકો પર આગળ છે. અહીં કોંગ્રેસ અને BRS વચ્ચે સીધો મુકાબલો છે. સવારે 9.45 વાગ્યા સુધીના ટ્રેન્ડમાં ઓવૈસીની પાર્ટી 5 સીટો પર આગળ હતી, પરંતુ હવે તે પાછળ રહી ગઈ છે. ઓવૈસી પોતે હૈદરાબાદના સાંસદ છે અને આ વિસ્તાર તેમનો પ્રભાવ વિસ્તાર માનવામાં આવે છે. 

આ જ કારણ છે કે તેણે આ વિસ્તારમાં તમામ ઉમેદવારોને મેદાનમાં ઉતાર્યા છે. તેમને મુસ્લિમ મતદારોનું ઘણું સમર્થન છે અને તેમના બળ પર ઓવૈસી અહીં લાંબા સમયથી સારું પ્રદર્શન કરી રહ્યા છે. ઓવૈસીનો પરિવાર હૈદરાબાદ સીટ પરથી રાજનીતિ કરે છે. 2018ની ચૂંટણીમાં આ સીટ પર તેમને સૌથી વધુ વોટ શેર મળ્યા હતા. તે સમયે BRSને 119માંથી 88 બેઠકો મળી હતી. કોંગ્રેસને 21 અને AIMIMને 7 બેઠકો મળી છે.