વર્લ્ડ / ટ્રમ્પના દાવા વચ્ચે વેનેઝુએલાના રાષ્ટ્રપતિની તસવીર વાયરલ! અને નિકોલસ માદુરો ચર્ચામાં

અમેરિકાએ વેનેઝુએલાના રાષ્ટ્રપતિ નિકોલસ માદુરોની ધરપકડ કરી છે. રાષ્ટ્રપતિ ડોનાલ્ડ ટ્રમ્પે શનિવારે વહેલી સવારે એક મોટો દાવો કરતા કહ્યું કે અમેરિકાએ વેનેઝુએલામાં મોટા પાયે લશ્કરી કાર્યવાહી હાથ ધરી છે અને આ કાર્યવાહીમાં રાષ્ટ્રપતિ નિકોલસ માદુરો અને તેમની પત્નીને અટકાયતમાં લઈને દેશમાંથી બહાર કાઢવામાં આવ્યા છે. ટ્રમ્પે આ નિવેદન પોતાના સોશિયલ મીડિયા પ્લેટફોર્મ પર આપ્યું હતું. તેમણે કહ્યું હતું કે આ કાર્યવાહી યુએસ કાયદા અમલીકરણ એજન્સીઓના સહયોગથી કરવામાં આવી હતી. ટ્રમ્પના જણાવ્યા અનુસાર આ સમગ્ર કામગીરી વિશે વિગતવાર માહિતી થોડા કલાકોમાં પ્રેસ કોન્ફરન્સ દ્વારા આપવામાં આવશે. યુએસ ડેલ્ટા ફોર્સ દ્વારા માદુરોની ધરપકડ કરવામાં આવી છે.

શું માદુરો ચીન ભાગી જવાના હતા?

ટ્રમ્પ વેનેઝુએલાના રાષ્ટ્રપતિ નિકોલસ માદુરો પર સતત દબાણ વધારી રહ્યા છે. અમેરિકાએ કેરેબિયનમાં મોટી સૈન્ય હાજરી તૈનાત કરી છે. ડ્રગ બોટ પર નિયમિતપણે હુમલા કરવામાં આવે છે. આ પછી, માદુરોએ ડ્રગ હેરફેર અને તેલ જેવા સંવેદનશીલ મુદ્દાઓ પર ચર્ચા કરવા માટે પોતાની તૈયારી દર્શાવી છે. વેનેઝુએલાના સરકારી ટીવી સાથેની મુલાકાતમાં, માદુરોએ અમેરિકા સાથે વાટાઘાટો કરવા માટે પોતાની તૈયારી દર્શાવી. તેમણે ઉમેર્યું કે અમેરિકા ગમે ત્યાં અને ગમે ત્યારે વાટાઘાટો કરી શકે છે. શુક્રવારે તેમણે કારાકાસમાં ચીનના ખાસ દૂત કિયુ ઝિયાઓકી સાથે મુલાકાત કરી. એવી અટકળો છે કે ચીન આવા હુમલાઓથી વાકેફ હતું અને તેણે રાષ્ટ્રપતિ નિકોલસ માદુરોને દેશમાંથી હાંકી કાઢવાની ઓફર કરી હતી. જોકે, તેઓ ચીન જતા પહેલા જ તેમની ધરપકડ કરવામાં આવી હતી.

અમેરિકાએ વેનેઝુએલા પર હુમલો કર્યો

આ દાવાના થોડા કલાકો પહેલા, વેનેઝુએલાની રાજધાની કારાકાસમાં જોરદાર વિસ્ફોટો સંભળાયા હતા. પ્રત્યક્ષદર્શીઓના જણાવ્યા અનુસાર શહેરના ઘણા વિસ્તારોમાં લગભગ દોઢ કલાક સુધી વિસ્ફોટોના અવાજો સંભળાયા હતા.લગભગ 2 વાગ્યાથી બપોરે 1:30 વાગ્યા સુધી. આકાશમાં લડાકુ વિમાનો ઉડતા જોવા મળ્યા હતા. અને ઘણા વિસ્તારોમાં કાળા ધુમાડાના ગોટા દેખાતા હતા. શહેરના દક્ષિણ ભાગમાં આવેલા એક મોટા લશ્કરી મથકની આસપાસ વીજળી ગુલ થઈ ગઈ હતી. ગભરાઈને લોકો રસ્તાઓ પર ઉતરી આવ્યા અને પોતાના મોબાઈલ ફોનથી વીડિયો બનાવવા લાગ્યા. સોશિયલ મીડિયા પર પોસ્ટ કરાયેલા વીડિયોમાં વિસ્ફોટોમાંથી નીકળતી તેજસ્વી લાઇટો અને ધુમાડો સ્પષ્ટપણે દેખાય છે.

આ પણ વાંચોઃ 'હમ ના તો સરેન્ડર...', ટ્રમ્પની દાદાગીરી પર વેનેઝુએલા અડીખમ, આપ્યું મોટું નિવેદન

વેનેઝુએલાની સરકારે એક નિવેદનમાં જણાવ્યું હતું કે આ હુમલાઓ ફક્ત કારાકાસ સુધી મર્યાદિત ન હતા. પરંતુ મિરાન્ડા, અરાગુઆ અને લા ગુએરા રાજ્યોમાં લશ્કરી થાણાઓને પણ નિશાન બનાવવામાં આવ્યા હતા. આ પછી રાષ્ટ્રપતિ માદુરોએ રાષ્ટ્રીય કટોકટીની જાહેરાત કરી અને સુરક્ષા દળોને સંપૂર્ણ એલર્ટ પર રાખ્યા. જોકે, હવે સૌથી મોટો પ્રશ્ન એ છે કે: શું ટ્રમ્પની સેનાએ ખરેખર તેમની ધરપકડ કરી છે?

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ