ઝટકો / ગુજરાતમાં LPGના ભાવમાં મોટો ફેરફાર, કોમર્શિયલ સિલિન્ડર મોંઘો, ઘરેલુ ભાવમાં ફેરફાર નહીં

તહેવારો શરૂ થાય તે પહેલાં સામાન્ય માણસ અને વ્યવસાયો બંને મોંઘવારીના મારથી પ્રભાવિત થયા છે. મહિનાના પહેલા દિવસે એટલે કે 1 ઓક્ટોબરથી ઓઇલ માર્કેટિંગ કંપનીઓએ LPG સિલિન્ડરના ભાવમાં વધારો કર્યો છે. 19 કિલોગ્રામના કોમર્શિયલ LPG સિલિન્ડરની કિંમતમાં ₹62.50નો વધારો કરવામાં આવ્યો છે. દિલ્હીમાં હવે તેની કિંમત ₹2,810 થઈ છે. આ ભાવવધારાની સીધી અસર હોટલ, રેસ્ટોરન્ટ, ખાણીપીણીની દુકાનો, કેટરિંગ સંસ્થાઓ અને નાના વ્યવસાયોના ખર્ચ પર પડી શકે છે. LPGનો ખર્ચ લાંબા સમય સુધી ઊંચો રહે તો ખાણીપીણીની વસ્તુઓના ભાવ પર પણ તેની અસર જોવા મળી શકે છે.

અમદાવાદમાં LPGનો ભાવ કેટલો થયો?

ગુજરાતમાં ખાસ કરીને અમદાવાદના ગ્રાહકો માટે 1 ઓક્ટોબરના LPG ભાવ મહત્વના છે. રિપોર્ટી અનુસાર અમદાવાદના ભાવ મુજબ 14.2 કિલોના ઘરેલુ LPG સિલિન્ડરનો ભાવ ₹949 છે અને તેમાં હાલ કોઈ વધારો થયો નથી. બીજી તરફ 19 કિલોના કોમર્શિયલ LPG સિલિન્ડરનો ભાવ ₹2,831.50 થયો છે. સપ્ટેમ્બરમાં અમદાવાદમાં 19 કિલોના કોમર્શિયલ સિલિન્ડરનો ભાવ ₹2,768 હતો. એટલે નવા ભાવ પ્રમાણે તેમાં ₹63.50નો વધારો થયો છે. અમદાવાદમાં 5 કિલોના ઘરેલુ LPG સિલિન્ડરનો ભાવ ₹352 છે, જ્યારે 47.5 કિલોના કોમર્શિયલ સિલિન્ડરનો ભાવ ₹7,074.50 છે. 47.5 કિલોના સિલિન્ડરના ભાવમાં પણ વધારો થયો છે. આ ભાવ ખાસ કરીને એવા વ્યવસાયો માટે મહત્વના છે જ્યાં મોટા પ્રમાણમાં ગેસનો ઉપયોગ થાય છે.

ઘરેલુ ગેસના ભાવમાં કોઈ ફેરફાર નહીં

રાહતની વાત એ છે કે 14.2 કિલોગ્રામના ઘરેલુ LPG સિલિન્ડરના ભાવમાં કોઈ ફેરફાર કરવામાં આવ્યો નથી. દિલ્હીમાં તેનો ભાવ ₹942, મુંબઈમાં ₹941.50 અને ચેન્નાઈમાં ₹957.50 રહેશે. અન્ય શહેરોમાં ઘરેલુ LPGના ભાવની વાત કરીએ તો પટણામાં 14.2 કિલોના સિલિન્ડરની કિંમત ₹1,031.50 અને લખનૌમાં ₹979.50 છે. મુંબઈમાં ઘરેલુ સિલિન્ડર ₹941.50, કોલકાતામાં ₹968 અને ચેન્નાઈમાં ₹957.50 છે. હૈદરાબાદમાં ઘરેલુ LPGનો ભાવ ₹994, જ્યારે રાંચીમાં ₹1,010.50 છે. એટલે દેશભરમાં ઘરેલુ LPGના ભાવમાં હાલ કોઈ વધારો કરવામાં આવ્યો નથી. બીજી તરફ કોમર્શિયલ સિલિન્ડર મોંઘો થવાથી વેપારીઓ અને વ્યવસાયિક ગ્રાહકો પર વધારાનો ખર્ચ આવ્યો છે.

ગુજરાતના અન્ય શહેરોમાં પણ LPGના અલગ ભાવ

ગુજરાતમાં શહેર પ્રમાણે LPGના ભાવમાં થોડો તફાવત જોવા મળે છે. અમદાવાદમાં 14.2 કિલોના ઘરેલુ સિલિન્ડરનો ભાવ ₹949 છે. ગાંધીનગરમાં ઘરેલુ સિલિન્ડરનો ભાવ ₹949.50, જ્યારે રાજકોટમાં ₹947 છે. રાજકોટમાં 19 કિલોના કોમર્શિયલ LPG સિલિન્ડરનો ભાવ ₹2,800 છે. દાહોદમાં 14.2 કિલોના ઘરેલુ સિલિન્ડરનો ભાવ ₹969 અને 19 કિલોના કોમર્શિયલ સિલિન્ડરનો ભાવ ₹2,915 નોંધાયો છે. એટલે ગુજરાતમાં પણ શહેર પ્રમાણે LPGના ભાવમાં તફાવત જોવા મળે છે.

તહેવારો પહેલાં વેપારીઓનો ખર્ચ વધશે

તહેવારો દરમિયાન હોટલ, રેસ્ટોરન્ટ, નાસ્તાની દુકાનો અને કેટરિંગ વ્યવસાયમાં કામ વધે છે. આ સમયે કોમર્શિયલ LPGના ભાવમાં વધારો થતાં રસોડાના ખર્ચમાં વધારો થઈ શકે છે. ખાસ કરીને નાના વેપારીઓ માટે દરેક સિલિન્ડર પર વધેલો ખર્ચ મહત્વનો બની શકે છે. LPG સિવાય કાચો માલ, પેકેજિંગ અને અન્ય ખર્ચ પણ વ્યવસાય સાથે જોડાયેલા હોય છે. તેથી કોમર્શિયલ ગેસનો ભાવ વધે ત્યારે કુલ ખર્ચ પર તેની અસર પડે છે. જોકે વેપારીઓ ગ્રાહકો પાસેથી વધેલો ખર્ચ વસૂલ કરશે કે નહીં, તે દરેક વ્યવસાયના ખર્ચ અને ભાવ નક્કી કરવાની નીતિ પર આધાર રાખે છે.

આ પણ વાંચો : ગુજરાતી પાયલોટ કેપ્ટન સ્મિત મચ્છારે કેવી રીતે 180 ઈઝરાયેલીઓનો જીવ બચાવ્યો? નેતન્યાહૂએ સલામી આપી

LPG ગ્રાહકો માટે આધાર બાયોમેટ્રિક પ્રમાણીકરણ જરૂરી

LPGને લઈને 1 ઓક્ટોબરથી બીજો મહત્વનો ફેરફાર પણ છે. સબસિડી મેળવતા LPG ગ્રાહકો માટે આધાર બાયોમેટ્રિક પ્રમાણીકરણ જરૂરી બન્યું છે. જે ગ્રાહકોએ e-KYC અથવા જરૂરી બાયોમેટ્રિક પ્રક્રિયા પૂર્ણ કરી નથી, તેમને સરકારી સબસિડી મેળવવામાં મુશ્કેલી પડી શકે છે. જોકે તેનો અર્થ એવો નથી કે આવા ગ્રાહકોનું ગેસ કનેક્શન કાપી નાખવામાં આવશે અથવા સિલિન્ડરની ડિલિવરી બંધ થઈ જશે. ગ્રાહકોએ પોતાના LPG કનેક્શન સાથે જોડાયેલી KYC અને આધારની માહિતી સમયસર અપડેટ કરવી જોઈએ. જો આધાર અથવા KYCમાં કોઈ ફેરફાર હોય તો સંબંધિત ગેસ કંપની અથવા સ્થાનિક વિતરક પાસેથી તેની પુષ્ટિ કરવી યોગ્ય રહેશે. સબસિડી મેળવવાની યોગ્યતા અથવા પ્રક્રિયા અંગે કોઈ શંકા હોય તો ગ્રાહકોએ પોતાના LPG વિતરકનો સંપર્ક કરવો જોઈએ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ