તમારા કામનું / Aadhaar યુઝર્સ માટે UIDAIનો મોટો નિર્ણય, હવે 31 ડિસેમ્બર સુધી શરૂ રહેશે આ સર્વિસ

હવે આધાર સાથે જોડાયેલા ઈમેલ આઈડી અપડેટ કરવા માટે કોઈ ફી ચૂકવવાની જરૂર રહેશે નહીં. UIDAI દ્વારા શરૂ કરાયેલી નવી સુવિધા હેઠળ 31 ડિસેમ્બર 2026 સુધી ઈમેલ અપડેટ કરવાની સેવા સંપૂર્ણપણે મફત રહેશે. ખાસ વાત એ છે કે આ કામ હવે ઘર બેઠાં મોબાઇલ ફોનથી જ થઈ શકશે.

હવે ઈમેલ અપડેટ માટે નહીં ચૂકવવી પડે ફી

અગાઉ આધાર કાર્ડમાં ઈમેલ આઈડી અપડેટ કરાવવા માટે આશરે 75 રૂપિયા અને GSTનો ખર્ચ કરવો પડતો હતો. પરંતુ હવે UIDAIએ આ ચાર્જ સંપૂર્ણપણે માફ કરી દીધો છે. આ નવી વ્યવસ્થાથી આધારધારકો કોઈપણ ખર્ચ વગર પોતાની જૂની ઈમેલ બદલી શકશે અથવા નવી ઈમેલ આઈડી આધાર સાથે લિંક કરી શકશે.

આધાર સેવા કેન્દ્ર જવાની જરૂર નહીં

UIDAIના Aadhaar Mobile App દ્વારા હવે અનેક સેવાઓ ઓનલાઈન ઉપલબ્ધ બની રહી છે. ઈમેલ અપડેટ કરવાની સુવિધા પણ તેમાં સામેલ કરવામાં આવી છે. આ કારણે લોકોને આધાર કેન્દ્ર સુધી જવાની જરૂર નહીં પડે અને થોડા સરળ સ્ટેપ્સમાં જ મોબાઇલ પરથી પ્રક્રિયા પૂર્ણ કરી શકાશે. સાથે જ આધાર કેન્દ્રો પરનો ભાર પણ ઓછો થશે.

ઈમેલ આઈડી અપડેટ રાખવુ કેમ જરૂરી?

આજના ડિજિટલ યુગમાં ઈમેલ આઈડી અનેક સરકારી અને ખાનગી સેવાઓ માટે મહત્વપૂર્ણ બની ગઈ છે. બેન્કિંગ, વીમા, સરકારી યોજનાઓ, ઓનલાઈન વેરિફિકેશન તેમજ વિવિધ નોટિફિકેશન માટે ઈમેલનો ઉપયોગ થાય છે. આધાર સાથે યોગ્ય ઈમેલ જોડાયેલી હોય તો મહત્વપૂર્ણ અપડેટ્સ અને માહિતી સમયસર મળી રહે છે.

આ પણ વાંચોઃ Metaને કેન્દ્રની નોટિસ, માંગ્યો જવાબ, આપ્યો 7 જ દિવસનો સમય

31 ડિસેમ્બર 2026 સુધી મળશે મફત સુવિધા

UIDAIએ સ્પષ્ટ કર્યું છે કે આ સેવા 31 ડિસેમ્બર 2026 સુધી નિઃશુલ્ક રહેશે. એટલે કે આ સમયગાળા દરમિયાન કોઈપણ આધારધારક પોતાના મોબાઇલ એપ દ્વારા ઈમેલ આઈડી અપડેટ કરી શકશે અને તેના માટે કોઈ ચાર્જ લેવામાં આવશે નહીં.

મોબાઇલ એપથી કેવી રીતે કરશો ઈમેલ અપડેટ?

સૌપ્રથમ સ્માર્ટફોનમાં UIDAIનું અધિકૃત Aadhaar App ડાઉનલોડ કરો. ત્યારબાદ આધાર નંબરની મદદથી લોગિન કરો અને જરૂરી વેરિફિકેશન પ્રક્રિયા પૂર્ણ કરો. લોગિન થયા પછી "Update Email" અથવા "Update Aadhaar Details" વિકલ્પ પસંદ કરો. અહીં નવી ઈમેલ આઈડી દાખલ કરીને વિગતો ચકાસો અને રિક્વેસ્ટ સબમિટ કરો. પ્રક્રિયા પૂર્ણ થયા બાદ તમને Service Request Number (SRN) મળશે, જેના દ્વારા તમે અપડેટની સ્થિતિ ઓનલાઈન ટ્રેક કરી શકશો. UIDAIની આ નવી સુવિધાથી આધાર સંબંધિત કામગીરી વધુ સરળ, ઝડપી અને સંપૂર્ણ ડિજિટલ બની ગઈ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ