વિશ્વ / વર્લ્ડ બેંકનું ડરામણું એલર્ટ: મિડલ ઈસ્ટ યુદ્ધના કારણે વૈશ્વિક અર્થતંત્ર સંકટમાં, ભારત માટે સારા સમાચાર

પશ્ચિમ એશિયામાં ચાલી રહેલા સૈન્ય સંઘર્ષ અને તેના કારણે વૈશ્વિક એનર્જી સપ્લાયમાં ઉભા થયેલા અવરોધોએ આખી દુનિયાના આર્થિક ગણિતને બગાડી નાખ્યું છે. વર્લ્ડ બેંકે તેના અર્ધવાર્ષિક અહેવાલ ગ્લોબલ ઈકોનોમિક પ્રોસ્પેક્ટ્સમાં ચેતવણી આપી છે કે જો એનર્જી સપ્લાયની સ્થિતિ વધુ ગંભીર બનશે અને ફાઇનાન્સિયલ માર્કેટ પર દબાણ વધશે, તો વૈશ્વિક અર્થતંત્ર સંપૂર્ણપણે મુશ્કેલીમાં મુકાઈ શકે છે. કોવિડ મહામારી બાદ આ વૈશ્વિક વિકાસ દરનો સૌથી નીચો સ્તર છે.

ભારત અને ચીનના ગ્રોથ રેટમાં મોટો ફેરફાર

વર્લ્ડ બેંકના અહેવાલ મુજબ વૈશ્વિક પ્રતિકૂળ પરિસ્થિતિઓ છતાં ભારત વિશ્વની સૌથી ઝડપથી આગળ વધતી મોટી ઈકોનોમીનો પોતાનો દરજ્જો જાળવી રાખશે..

ભારતનો અંદાજ: નાણાકીય વર્ષ 2026-27 (FY27) માં ભારતનો જીડીપી ગ્રોથ રેટ 6.6% રહેવાની ધારણા છે. જો કે, આ દર નાણાકીય વર્ષ 2025 ના અંદાજિત 7.7% ના વિકાસ દરની સરખામણીએ ઘણો ઓછો છે.

ચીનનો અંદાજ: વિશ્વની બીજી સૌથી મોટી ઈકોનોમી ધરાવતા ચીનનો આર્થિક વિકાસ દર આ વર્ષે ઘટીને 4.2% રહેવાનો અંદાજ મૂકવામાં આવ્યો છે, જે વર્ષ 2025 માં 5% હતો. જાન્યુઆરીમાં વર્લ્ડ બેંકે ચીન માટે 4.4% નો અંદાજ લગાવ્યો હતો.

અમેરિકા અને યુરોપિયન દેશોની સ્થિતિ

વિશ્વની સૌથી મોટી ઈકોનોમી ધરાવતા અમેરિકા (USA) ના ગ્રોથ રેટના અંદાજમાં વર્લ્ડ બેંકે કોઈ ઘટાડો કર્યો નથી. અમેરિકા આ વર્ષે 2.2% ના દરે આગળ વધશે તેવી આશા છે, જે વર્ષ 2025 ના 2.1% કરતાં થોડું વધારે છે. અમેરિકા પોતે એક મોટો એનર્જી પ્રોડ્યુસર દેશ હોવાથી, તે અન્ય તેલ આયાત કરતા દેશોની સરખામણીએ વધુ મજબૂત સ્થિતિમાં છે. આ ઉપરાંત અમેરિકાને મોટા ટેક્સ કટ અને આર્ટિફિશિયલ ઈન્ટેલિજન્સમાં થઈ રહેલા તોતિંગ રોકાણનો પણ મોટો ફાયદો મળી રહ્યો છે, જો કે ત્યાંની સામાન્ય જનતા પેટ્રોલ અને મોંઘવારીથી હજુ પણ પરેશાન છે.

બીજી તરફ, યુરો કરન્સીનો ઉપયોગ કરતા 21 યુરોપિયન દેશોની સામૂહિક ગ્રોથ રેટ આ વર્ષે માત્ર 0.8% રહેવાનો અંદાજ છે, જે વર્ષ 2025 માં 1.4% હતો. વર્લ્ડ બેંકે વિકાસશીલ અને ઉભરતા બજારો ધરાવતા દેશો માટે વર્ષ 2026 ના ગ્રોથ અંદાજને 0.4% ઘટાડીને મહામારી પછીના સૌથી નીચલા સ્તરે એટલે કે 3.6% પર લાવી દીધો છે.

યુદ્ધ અને સ્ટ્રેટ ઓફ હોર્મુઝના કારણે મોંઘવારીનો વિસ્ફોટ

ઈરાન અને ઈઝરાયેલ વચ્ચેના યુદ્ધની સૌથી ભયાનક અસર વૈશ્વિક વેપાર પર પડી છે. ઈરાને અમેરિકા અને ઈઝરાયેલના હુમલાના જવાબમાં સ્ટ્રેટ ઓફ હોર્મુઝને બંધ કરી દીધું છે. આ એ દરિયાઈ માર્ગ છે જ્યાંથી વિશ્વનો 1/5 ભાગ એટલે કે 20% જેટલો તેલ અને નેચરલ ગેસનો વેપાર પસાર થાય છે. આ નાકાબંધીના કારણે એનર્જીની કિંમતોમાં ભારે ઉછાળો આવ્યો છે. વર્લ્ડ બેંકના અંદાજ અનુસાર, બેન્ચમાર્ક બ્રેન્ટ ક્રૂડ ઓઈલની કિંમત આ વર્ષે સરેરાશ 94 ડોલર પ્રતિ બેરલ રહેશે, જે વર્ષ 2025 કરતાં 36% વધુ છે અને બેંકના જાન્યુઆરીના અંદાજ કરતાં 50% જેટલી વધારે છે.

આ પણ વાંચોઃ ક્રાઇમ / મણિપુરમાં ભારે બબાલ, 6 લોકોની ઘાતકી હત્યા, લાશો જોઈને ધ્રુજી ઉઠ્યા લોકો

ખાદ્ય કટોકટી અને ખાતરના વેપાર પર અસર

આ યુદ્ધના કારણે માત્ર ક્રૂડ ઓઈલ જ નહીં, પરંતુ ફર્ટિલાઈઝરના વૈશ્વિક કારોબારને પણ મોટો ફટકો પડ્યો છે. વિશ્વમાં ખાતરનો એક બહુ મોટો હિસ્સો પર્શિયન ગલ્ફના માર્ગેથી નિકાસ કરવામાં આવે છે. વર્લ્ડ બેંકે આશંકા વ્યક્ત કરી છે કે ખાતર મોંઘું થવાના કારણે વિશ્વભરના ખેડૂતો તેનો ઉપયોગ ઘટાડી શકે છે, જેના લીધે ભવિષ્યમાં વૈશ્વિક સ્તરે અનાજ અને ખાવા-પીવાની વસ્તુઓની મોટી અછત સર્જાઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ